Mu Rwanda hagiye kubera igitaramo cya Silent Disco cyahuruje aba-Dj bakomeye

Yanditswe na Uwiduhaye Theos
Kuya 1 Ugushyingo 2018 saa 10:46
Yasuwe :
0 0

Kuri uyu wa Gatandatu ahitwa Pacha Club Kimironko, hazabera igitaramo cya ‘Silent Disco’ aho abakunzi b’umuziki batarama buri wese yumva ubwoko bw’indirimbo yifuza nta rusaku rwumvikana.

Iki gitaramo cyateguwe na Vj Spinny usanzwe ari umwe mu bavanga imiziki bakomeye muri Uganda afatanyije na Decent Entertainment ya Muyoboke Alex.

“Silent Disco”, ni uburyo bumaze kumenyerwa mu bitaramo bitandukanye byo mu Rwanda ariko bwamamaye cyane guhera mu 2016.Byari bisanzwe bikorwa cyane mu bindi bihugu byateye imbere nko mu Bwongereza, Leta Zunze Ubumwe za Amerika, Afurika y’Epfo n’ahandi.

Ni ibirori biba biyobowe n’abahanga mu kuvanga imiziki ariko bakabikorera ahantu hatumvikana urusaku. Umufana wese witabira ibirori ahabwa ibimufasha kumva umuziki (headphones) bikoresha ihuzanzira ritagira umugozi [wireless], nibyo bifasha mu kumva indirimbo hatumvikanye urusaku.

Buri wese aba abyina ibye bitewe na sheni yashyizeho kuko haba hateguwe aba Djs barenze umwe.

Iki gitaramo cya Vj Spinny azagihuriramo n’abandi ba-Djs bakomeye mu Rwanda barimo, Miller, Marnaud, Vj Mupenzi uwitwa Bryan uzaturuka muri Uganda n’abandi benshi. Kwinjira bizaba ari amafaranga y’u Rwanda ibihumbi bitanu.

Mu kiganiro na IGIHE Vj Spinny yavuze ko yishimiye kuza gutaramira mu Rwanda yizeza abazitabira igitaramo yateguye kuryoherwa bidasanzwe.

Ati « Ndishimye bikomeye kuba ngarutse mu rugo ! Abazaza mu gitaramo twateguye ndabizeza ko bazishima mu buryo buhambaye.”

Yavuze ko umwihariko wa mbere w’iki gitaramo ari ukuba kigiye guhuriramo aba-Djs benshi bakunzwe mu Rwanda muri iki gihe ndetse na Dj Bryan ukunzwe muri Afurika y’Iburasirazuba, uyu asanzwe akora kuri televiziyo ya NTV ikomeye muri Uganda.

Yavuze ko ibanga akoresha kugira ngo ibitaramo nk’ibi bya Silent Disco ategura bikundwe mu karere ka Afurika y’Iburasirazuba ari uburyo baba babiteguye.

Ati "Ibanga dukoresha ni ugushyiramo imbaraga zacu zose tugerageza kuzana abahanzi batandukanye n’aba-Djs batandukanye kandi bagezweho, Silent Disco ni nyinshi ariko itegurwa na Vj Spinny iba ifite umwihariko kuko dukoresha uruvangitirane rw’imiziki yo mu Rwanda no hanze.”

Vj Spinny ubusanzwe witwa Kalisa Joseph afite imyaka 23 y’amavuko, akomoka mu Rwanda mu Mujyi wa Kigali, akaba yaratangiye kwiyumvamo impano yo kuvanga imiziki mu 2010 akiri mu mashuri yisumbuye muri Lycée de Kigali (LDK).

Abicishije mu ikompanyi ye bwite yashinze yitwa Spinny Events, Vj Spinny ategura ibirori ngarukacyumweru bya “Girls in the city” bikabera muri Atmosphere Lounge, ibyamamare hafi ya byose muri Kampala usanga bibyiganiramo ku bw’umuziki w’uyu musore umaze kwigaragaza i Kampala.

Yagiye ategura ibitaramo bya Silent Disco byinshi yaba mu Mujyi wa Kigali, i Bujumbura mu Burundi ndetse bimaze kuba inshuro nyinshi i Kampala.

Vj Spinny ubwo yageraga mu Rwanda
Afata ifoto na Miss Mushambokazi wari waje kumwakira
Muyoboke Alex na Jordan Mushambokazi wari uri muri Miss Rwanda 2018 bari baje kumwakira
Vj Spinny afite akanyamuneza ko kuza gutaramira mu Rwanda

Amafoto: Muhizi Serge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza