Mu gihe hasozwaga igikorwa cy’amarushanwa yiswe ‘Star Search Odyssey’ yo kugaragaza impano zitandukanye abanyeshuri baba bafite bafatanya n’amasomo, bateguriwe na kampani igamije guteza imbere impano ‘Akeza Talent Ltd’, byagaragaye ko baba bafite impano nyinshi bafashwa guteza imbere zikazababera umwuga.
Iki gikorwa cyahuzaga abana biga ku bigo by’amashuri bitatu ‘ESSI Nyamirambo’, ‘ES Saint Joseph de Nyamirambo’ na ‘G.S Saint André’ biherereye i Nyamirambo, byagaragaye ko abana b’abanyeshuri bagiye bafite impano zitandukanye kandi ubona ko bafashijwe bazibyaza umusaruro zikabageza ku rwego rushimishije, ndetse n’igihugu kikagira abahanzi bo mu nzego zose.
Mu mpano zagaragajwe, harimo iyo kuririmba, kubyina imbyino gakondo, gusetsa no kwerekana imideli, aho abanyeshuri barushanyijwe mu buryo bukurikira:
Imbyino:
1. ESSI Nyamirambo: Itorero
2. G.S Saint André: Itorero
Gusetsa:
1. G.S Saint André: Mfuranzima Cedrick
2. ESSI Nyamirambo: Aimable
3. E.S Saint Joseph de Nyamirambo
Kuririmba:
E.S Saint Joseph de Nyamirambo: Hakizimana Jean
Uwagaragaje guhanga udushya:
Mfuranzima Cedrick
Mu bihembo biteganyijwe, harimo igikombe cyahawe uwagaragaje udushya mu mpano ye, gufashwa kuzamurirwa impano no kuzigaragaza ndetse no kumenyekanishwa, aho uwatsinze mu kuririmba azakorerwa indirimbo imwe n’amashusho yayo, naho abakinnyi basetsa bakazahuzwa n’abategura bakanikisha filimi kugira ngo babone aho batangirira umwuga bazakesha impano bafite.
Aganira na IGIHE, Cyiza Uwimanimpaye Marie Clemence, umuyobozi wa Akeza Talent Ltd yagize ati: “Biranshimishije cyane kubona ko abana baba bifitemo impano nk’ibyo batugaragarije imbere aha. Tugamije kubafasha, kandi tuzaguma tubakurikirana, ndetse nta n’ubwo tuzagarukira mu bigo by’amashuri gusa kuko dufite na gahunda yo kugera ku rubyiruko rutanize ndetse n’urwo mu cyaro. Ni igikorwa kizajya gikorwa kenshi cyane, kuko impano zivuka buri munsi.”
Mfuranzima Cedrick, n’ibyishimo byari byamusaze, yagize ati: “Biranshimishije cyane kubona ari jyewe uhize abandi, nkaba mpawe igihembo gikuru. Ibi binyongereye imbaraga mu kongera ibikorwa byanjye byo gusetsa, kandi ndahamya ko nzabigira umwuga uzantunga.”
Aya marushanwa yabereye ku ishuri ryisumbuye rya ESSI Nyamirambo, ariko akaba azajyenda akorerwa n’ahandi hantu hatandukanye.
TANGA IGITEKEREZO