Stella Nantumbwe wabaye Miss Uganda 2013 wahagarariye iki gihugu muri Big Brother Africa yiyita Ellah, yaba ari mu rukundo na Mo Red umwana w’umuherwe Sarah Kizito nyiri Centenary Park.

Biravugwa ko aba bombi bari mu rukundo nyuma y’uko mu ijoro ryo kuwa 11 Ukuboza 2014 basohokanye mu kabari ka Acacia bakahagirira ibihe byiza byatumye abababonye bemeza ko hari urukundo rudasanzwe hagati yabo.

Nk’uko Redpepper yabitangaje, aba bombi bagaragaye basomana byimbitse mu ruhame ndetse bivugwa ko batahanye nubwo ntawamenye aho berekeje.

Uyu musore Ellah ari gukundana na we ngo yamwambuye mugenzi we witwa Anita Kyarimpa bigeze guhangana mu matora ya Miss Uganda 2013. Anita wambuwe umusore ngo na we yatangiye kurwana inkundura ashakisha uburyo yakwisubiza umukunzi we biteguraga kurushinga gusa ngo biri kure nk’izuba.

Miss Stella Nantumbwe akomeje kurangwa no gukunda ndetse no gusomana n’abasore dore ko ari nabyo yakunze kugaragaramo cyane ubwo yari muri Big Brother Africa.

Nyuma yo gutangaza ko agiye gukomeza umuziki, Ellah azajya akora ikiganiro cyitwa Scoop on Scoop segment gitambuka kuri Urban TV yo muri Uganda.

Uyu umukobwa akomeje gusekerwa n’amahirwe nyuma yo kutegukana Big Brother Africa ya 9 dore ko yasezerewe ku tariki 30 Ugushyingo 2014 amazemo iminsi 56 gusa.

Ku itariki ya 13 Nyakanga 2013 nibwo Stella Nantumbwe w’imyaka 22 y’amavuko yatorewe kuba Nyampinga w’igihugu cya Uganda atsinze abakobwa bagenzi be 22.