Ludacris yahamirije umukunzi we Eudoxie Agnan urukundo rw’akaramata amusaba ko yazamubera umugore we undi ntiyazuyaza ahita amwemerera.

Ku mugoroba wo kuwa Gatanu tariki 26 Ukuboza 2014 nibwo Ludacris n’umukunzi we bafashe indege bava Atlanta berekeza Costa Rica maze imbere y’inshuti zabo Monica, Shannon Brown, LeToya Luckett na Marco Andretti asaba Eudoxie ko yazamubera umufasha.

Nk’uko Hollywood Life dukesha iyi nkuru yabitangaje, Ludacris na Eudoxie Agnan bari bamaze imyaka irindwi bakundana ndetse uyu muraperi akaba afashe icyemezo cyo kurushingana n’uyu mukobwa nyuma yo kwiga imico ye akabona ko ari we wazamubera umutima w’urugo.

Ludacris yakoresheje uburyo butangaje asaba umukunzi we ko yazamubera umufasha, ubwo bari bicaye mu ndenge batarahaguruka yamusabye ko yacisha amaso mu idirishya maze akireba hasi, umukobwa agisohora umutwe yabonye amagambo yanditse ku mbuga hasi agira ati, ‘Eudoxie uzemera kubana nanjye?’

Umukobwa yasazwe n’ibyishimo abura aho akwirwa maze mu ijwi riranguriye asubiza Ludacris “ Yego ndabyemeye”

Byabaye ibyishimo bidasanzwe kuri aba bakunzi bombi ndetse basangiza inshuti n’abakunzi babo ibihe byiza bagize ku mbuga zabo za Instagram bashyiraho amafoto n’amagambo yuje urukundo rwinshi.

Ludacris w’imyaka 37 yemeranyije kubana na Eudoxie w’imyaka 27 afite abana babiri yabyaye hanze.