Yaretse kuba umupadiri yihebera umuziki! Intego ya Marius Bison uzwi mu makorali yo muri Kiliziya Gatolika

Yanditswe na Uwiduhaye Theos
Kuya 10 Kamena 2020 saa 09:57
Yasuwe :
0 0

Umusore witwa Jacques Marius Kamana [Marius Bison] waretse kuba umupadiri kubera urukundo rwa muzika; afite icyerekezo cyo gukora cyane no gukomeza guhesha ikuzo impano ye.

Kamana ni umuririmbyi, umwanditsi w’indirimbo n’umucuranzi w’ibikoresho bitandukanye bya muzika birimo gitari na piano akaba ndetse umwarimu n’umuyobozi w’indirimbo mu makorali yo mu Kiliziya Gatolika.

Yatangiye umuziki igihe yigaga mu mashuri yisumbuye aho yize mu iseminari nto ariho benshi mu bitegura kuba abapadiri bahera maze urukundo rwe rwa muzika rukavuka ubwo.

Arangije mu iseminari nto yakomeje mu iseminari nkuru aho yifuzaga kuzaba Padiri ariko bitewe no kwimariramo umuziki ndetse n’inshingano abapadiri baba bafite asanga atazashobora kubibangikanya byombi maze ahitamo kwiyegurira muzika ibyo kuba Padiri aba abiteye umugongo atyo.

Ati “Nabonye inshingano z’abapadiri aba ari nyinshi mpitamo kubireka ahubwo nkiyegurira umuziki kuko ari impano yari indimo kandi kuwuha umwanya uhagije mu buzima bwanjye.”

Yakomeje ati “Mfite gahunda ndetse ndende yo gukora umuziki mu buryo bw’umwuga kandi nkahesha ishema impano mfite. Nje niteguye kandi ndashaka kugaragariza Abanyarwanda icyo nshoboye mu muziki. Icyo nsaba ni ukunshyigikira bakantera inkunga mu gukurikira ibihangano byanjye kandi mbijeje ko ntazabatenguha.”

Marius Bison yahisemo kwitwa iryo zina kugira ngo bizorohere abakunzi b’umuziki we. Marius riri mu mazina yiswe n’ababyeyi naho Bison bisobanuye (Imbogo) rikaba ari izina rya Gisukuti (Totem) yiswe kera kandi akaba arikunda cyane.

Azwi mu ndirimbo zigiye zitandukanye nka ‘Kuba umugabo’, ‘Mbahaye itegeko’, ‘Turwanye Corona’, ‘Umuhamya’, ‘Mu nzu yawe’, ‘Amahoro yuzuye’ n’izindi.

Kuri ubu uyu muhanzi yakoze indirimbo yitwa ‘Mbaye uwawe’ mu buryo bw’amajwi yatunganyijwe na Producer David naho amashusho yayo akorwa na Papa Emile.

‘Mbaye uwawe’ ni indirimbo ifite ubutumwa bw’ingenzi bugaragaza ko Imana yanga icyaha igakunda umunyabyaha wemera guhinduka, inavuga kandi muri make kugarukira Imana no kuva mu bibi.

Marius Bison azwi mu makorali yo muri Kiliziya Gatolika nk'umuririmbyi w'umunyempano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .