Umunya-Kenya Papa Dennis wakoranye indirimbo na Tonzi yasanzwe ku muhanda yitabye Imana

Yanditswe na IGIHE
Kuya 8 Gashyantare 2020 saa 03:54
Yasuwe :
0 0

Umuhanzi uri mu bafite ibigwi mu muziki uhimbaza Imana muri Kenya, Dennis Mwangi wamenyekanye nka Papa Dennis yitabye Imana.

Papa Dennis yamamaye cyane mu Karere ka Afurika y’Uburasirazuba ndetse ibihangano bye byanageze mu Rwanda. Uyu muhanzi yakoranye indirimbo na Uwitonze Clementine uzwi nka Tonzi, bise “Njoo’’ yasohotse mu 2015.

Amashusho y’indirimbo ‘Njoo’ yakozwe n’umugabo wo muri Afurika y’Epfo witwa Producer GodFather ufatwa nka nomero ya mbere mu gutunganya amashusho muri Afurika. Iyi ndirimbo yatwaye akayabo ka miliyoni zikabakaba 18 Frw.

Polisi yo muri Kenya yatangaje ko uyu muhanzi yitabye Imana ahanutse mu nyubako iri mu gace ka Pangani mu ijoro ryo ku wa Gatanu, tariki ya 7 Gashyantare 2020.

Umubiri w’uyu muhanzi bitaramenyekana icyo yazize wasanzwe ku muhanda, uri hafi y’Icyicaro cy’Ishyaka rya Jubilee mu Mujyi wa Nairobi.

Daily nation yanditse ko Polisi ikeka ko Papa Dennis ashobora kuba yiyahuye.

Papa Dennis yakoranye indirimbo n’abahanzi bakomeye muri Afurika barimo Abanya-Nigeria Korede Bello, Chidinma na Mr Flavour.

Ni umuhanzi wari uzwiho kugira imyambarire yihariye, ndetse yari mu b’imbere mu bambara amasaha, imyenda n’inkweto bihenze.

Papa Dennis mu mwaka wa 2018 yatangaje ko yita ku myambarire ye mu rwego rwo kugaragaza umugisha yahawe n’Imana.

Papa Dennis yavukiye, anakurira mu gace ka Kitale. Yegukanye ibihembo bitandukanye birimo Mwafaka Awards (2015), Pulse Music Video Awards (2016 na 2017), African Muzik Magazine Awards (AFRIMMA) mu 2018 na Dear Awards yatwaye mu 2019.

-  Reba indirimbo Tonzi yakoranye na Papa Dennis mu 2015

-  Reba indirimbo Nashukuru, Papa Dennis yasohoye mu 2018


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .