Umuhanzi Nzaramba yibarutse impanga eshatu nyuma y’imyaka 12 ategereje urubyaro

Yanditswe na Nsengiyumva Emmy
Kuya 28 Ukuboza 2020 saa 12:30
Yasuwe :
0 0

Nzaramba Olivier umaze imyaka itandatu akora umuziki uhimbaza Imana yibarutse impanga eshatu nyuma y’imyaka 12 yari ishize ategereje kubona urubyaro.

Nzaramba yatangaje inkuru y’ibyishimo kuri we n’umuryango abinyujije ku rukuta rwe rwa Instagram.

Uyu muhanzi w’imyaka 45 yagaragaje ishimwe rye ku Mana iherutse kumukorera ibitangaza, imuha urubyaro rw’impanga eshatu [abahungu babiri n’umukobwa umwe].

Mu gitondo cyo kuri uyu wa Mbere, tariki 28 Ukuboza 2020, nibwo uyu mugabo yahishuye ko mu kwezi gushize Imana yamukoreye ibitangaza ikamuha impanga eshatu nyuma y’imyaka 12 amaze ashatse.

Yagize ati “Mbere y’uko uyu mwaka wabaye mubi kuri twese urangira ndashaka gushimira Imana iri hejuru y’ibigeragezo. Njye n’umugore wanjye tumaranye imyaka 12 nta mwana dufite ariko twakomeje gutegereza twihanganye kuko tuzi ko ari Imana y’urukundo kandi yo kwizerwa. Tariki 10 Ugushyingo 2020 yaratwibutse iduha abana batatu, abahungu babiri n’umukobwa.”

Nzaramba yasabye abantu bose bashobora kuba barahuye n’ibigeragezo nk’ibye ko badakwiye kuva ku Mana kuko nayo idatererana abayiringiye.

Uyu mugabo kuva mu 2009 atuye mu Bwongereza kubera ko ariho umufasha we yari atuye basezerana kubana akaramata.

Aheruka gushyira hanze indirimbo yise ‘Humura’ irimo ubutumwa bugamije guhumuriza abihebye.

Yabwiye IGIHE ko igitekerezo cyo kuyikora cyaje mbere ya Coronavirus ariko iki cyorezo cyamara kugariza Isi akabona aricyo gihe cyiza cyo kuyishyira hanze.

Nzaramba iyo yivuga yigaragaza nk’umuntu wabaye cyane mu bihe bitandukanye n’iby’agakiza arimo uyu munsi.

Ati “Nabanje kuba mu myidagaduro y’indirimbo zisanzwe, nagize akabari ka mbere mu 2002 aho bitaga mu “Gicopain”, benshi bari banzi nka Olivier Nigga hanyuma nza kugira akabyiniro kitwaga Black & White kategurirwagamo ibitaramo. Rero mu 2010 naje gufata umwanzuro wo kwinjira mu by’agakiza.”

Akomeza ati “Kugira ngo nkizwe sinavuga ko hari impamvu runaka yabiteye ahubwo nkeka ko buri muntu wese agira igihe cye kuko nibuka ko natangiye kugira umuhate mu by’Imana mu 2009 ubwo nageraga mu Bwongereza aho mba ubu.”

“Nahoraga ndeba imiterere myiza y’utubyiniro twa hariya numva hari igihe nzahagatangiza nkatwika (nk’uko ab’ubu babivuga) ariko birangira niyeguriye Imana. Umugore wanjye yanjyanye ahantu yasengeraga ngenda muhereje bihita bituma nkizwa mu buryo ntateguye.”

Mu buhamya bwe avuga ko ubuzima yabayemo mbere na nyuma yo gukizwa bwuzuzanya mu rugendo rw’ubukirisitu.

Umwanzuro wo gutangira kuririmba yawufashe biturutse ku kuba n’ubundi ari ibintu yari asanzwe yiyumvamo ariko atabikora cyane.

Yabaye Manager wa The Ben na Kitoko

Avuga ko kubera kuba mu ruganda rw’imyidagaduro yagiye aba inshuti cyane z’abari barurimo mu gihe cye, ndetse hari n’abo yagiye areberera inyungu mu muziki (Music Management) barimo The Ben na Kitoko.

Ati “Umuntu wa mbere natangiriyeho mba manager w’abahanzi yari Kitoko, ariko we ntabwo byari byo neza ahubwo twakoranaga nk’abavandimwe, icyo gihe yari ari i Nyanza ndamubwira nti noneho ngwino muri Kigali. Tuganira byinshi bijyanye n’uburyo yazamuka.”

“The Ben we byabaye ari nk’impanuka. Yarambwiye ati nta kuntu wamfasha? Ni uko byatangiye, icyo gihe yari amaze gutandukana na Tom Close atangiye kwikorana nk’umuhanzi ku giti cye. Aba bahanzi bose turavugana nka The Ben duherukana ku Bunani ubwo yakoreraga igitaramo mu Bufaransa, Kitoko we kubera ko aba mu Bwongereza turavugana cyane, benshi mu bahanzi turi abavandimwe.”

Nzaramba Olivier asanzwe ari umuhanzi w'indirimbo zo kuramya no guhimbaza Imana
Nzaramba n'umufasha we bari bamaze imyaka 12 amaso bayahanze Nyagasani ngo abahe urubyaro
Nyuma y'imyaka 12 nta rubyaro, Nzaramba n'umufasha we bibarutse impanga eshatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .