00:00:00 IGIHE NETWORK KN KINYARWANDA EN ENGLISH FR FRANCAIS

Kingdom of God Ministries igiye gusohora album iriho indirimbo zahimbwe na Nsabigaba uherutse kwitaba Imana

Yanditswe na Akayezu Jean de Dieu
Kuya 14 Kanama 2021 saa 09:09
Yasuwe :
0 0

Itsinda rya Kingdom of God Ministries rigiye gushyira hanze album yo kwibuka no guha icyubahiro uwahoze ari umuririmbyi n’umwanditsi wabo witwaga Nsabigaba Jean Paul ‘Danny’ witabye Imana muri Werurwe 2021.

Uyu mushinga wa album izaba igizwe n’indirimbo ziri hagati y’umunani n’icumi, hari nyinshi muri zo zari zaratangiye gukorwa mbere y’uko Danny atabaruka ndetse ngo eshanu muri zo ni we wari warazanditse.

Ubuyobozi wa Kingdom of God Ministries buvuga ko izi ndirimbo zose zizasohoka ziri mu buryo bw’amajwi n’amashusho, mu buryo bumaze kumenyerwa bwa ‘Live recording’ aho ziri gutunganywa na Producer Nicolas ukorera mu Ishusho Studio.

Mu kiganiro yagiranye na IGIHE, Mucyo Michel, ushinzwe itangazamakuru muri Kingdom of God Ministries yavuze ko iyi album irasohoka mu gihe cya vuba kuko bari barayiteguye mbere y’uko Danny yitaba Imana.

Ati “Urabona ko mu minsi ishize twari twagize ibyago tubura umuvandimwe, mu ndirimbo zigize album hari izo yari yagiye atwandikira, dushaka guhita tubikora kubera ko yari amaze igihe gito apfuye tubihuriza hamwe n’izindi twari dufite tutarakora rero tugiye kuzisohorera rimwe.”

Yakomeje agira ati “Ni mu rwego rwo kumwibuka ariko twahise dukora n’izo ndirimbo yari yarahimbye.”

Mucyo yavuze kandi ko uyu mushinga ugiye gukorwa binyuze mu bufatanye bagiranye na Ishusho Ltd itunganya indirimbo z’abahanzi.

Ati “Ni umushinga uri kubera mu Ishusho Studio, twagiranye na bo ibiganiro, ubu dutegereje kujya gutangira bizatangira kuri 25 Kanama 2021, kandi ni ibintu bizamara nk’iminsi ibiri cyangwa itatu.”

Danny yari uw’ingenzi kuri Kingdom of God Ministries

Ku wa 8 Werurwe 2021, ni bwo inkuru y’inshamugongo yakwirakwiye ku mbuga nkoranyambaga, benshi bashengurwa no kumva urupfu rwa Nsabigaba wasanzwe amanitse mu mugozi yapfuye.

Uyu mugabo wari ufite imyaka 25 yari atuye mu Kagari ka Nyamata Ville, Umurenge wa Nyamata mu Karere ka Bugesera.

Danny yapfuye hashize umwaka umwe gusa akoze ubukwe n’umukunzi we uba muri Leta Zunze Ubumwe za Amerika.

Mucyo yabwiye IGIHE ko babuze umuntu w’ingenzi muri korali yabo kandi bamwifuriza ko Imana imutuza mu ijuru.

Yavuze kandi ko uretse kuba Danny yari umuririmbyi wa Kingdom of God Ministries, yari umuntu w’ingenzi cyane kuko ari na we wayoboraga amasengesho anafite izindi nshingano zitandukanye.

Ati “Yari umuririmbyi ariko ashinzwe n’amasengesho. Ikindi cy’umwihariko kuri we yari afite impano ikomeye yo guhimba no kwandika indirimbo muri Kingdom of God Ministries.”

Uretse iyi album, Kingdom of God Ministries ihatanye mu irushanwa ‘Rwanda Gospel Stars Live’ aho yaserukanyemo umushinga wo gufasha urubyiruko ruva kugororerwa i Iwawa mu gushyira mu bikorwa ibyo rwigiyeyo.

Abagize iri tsinda bavuze ko mu gihe uru rubyiruko rwaba rufashijwe gushyira mu bikorwa ibyo rwigiyeyo nta kabuza bagirira umumaro umuryango Nyarwanda kandi ntibongere kwishora mu ngeso mbi.

Bamwe mu bayobozi ba Kingdom of God Ministries bagiranye ibiganiro ku mikoranire na Ishusho Ltd
Danny wari umwe mu bagize Kingdom of God Ministries yitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .