Ev. Kwizera Emmanuel na mukuru w’umugore we witabye Imana baranzwe mu rusengero

Yanditswe na Nsengiyumva Emmy
Kuya 29 Ukuboza 2019 saa 04:42
Yasuwe :
0 0

Umuvugabutumwa Kwizera Emmanuel ukorera ivugabutumwa mu Itorero Evangelical Restoration Church (ERC) na Coco Kaligirwa uvukana n’umugore we wa mbere witabye Imana baranzwe mu rusengero mbere gato y’uko bakora ubukwe.

Kuri iki Cyumweru tariki 29 Ukuboza 2019 nibwo Ev. Kwizera na Kaligirwa baranzwe mu rusengero na Pasiteri Aaron Ruhimbya wabasabiye umugisha no guhirwa mu rugendo rwo kubaka umuryango mushya binjiyemo.

Pasiteri Ruhimbya yagize” Ubuhamya bwanyu burarinzwe, ubu mujye mugendana , musangire muri za Restaurents zose. Mugendane kugeza iriya tariki. Imana ibahe umugisha.”

Ubukwe bw’aba bombi buteganyijwe tariki 21 Werurwe 2020 mu gihe mu ntangiriro z’Ugushyingo 2019 aribwo Ev. Kwizera yambitse impeta Kaligirwa amusaba ko barushinga undi nawe nta gushidikanya aramwemerera.

Kaligirwa ni mukuru w’umugore wa Kwizera ndetse ni we wasigaye yita ku bana Kunda yabyaranye na Kwizera.

Kunda yitabye Imana tariki ya 6 Kanama 2017, azize indwara ya kanseri y’umwijima yari amaranye amezi atanu. Yaguye mu bitaro byitiriwe Umwami Faisal aho yari amaze icyumweru arwariye.

Abasenganye n’abakoranye na we bamufataga nk’inkoramutima ndetse bamushima ubutwari bwamuranze no kwicisha bugufi yagiraga imbere y’abantu bose.

Ku wa 5 Kanama 2018 mu rusengero rwa Restoration Church ku Kimisagara ubwo hibukwaga umwaka Kunda amaze yitabye Imana, Umuvugabutumwa Kwizera yatangaje ko yatangije umuryango ‘La Kunda Foundation’ ugamije gushyigikira ibikorwa byiza byaranze umugore we.

Uyu muryango wibanda ku gufasha abana bakennye kurusha abandi kwiga, gufasha abashakanye kubaka ingo zabo neza no gukora amasengesho yo gusengera ibihugu bitarageramo ubutumwa bwiza.

Kwizera Emmanuel akorera umurimo w’Imana mu Muryango Nyafurika w’Ivugabutumwa (AEE) muri Kenya. Yamenyekanye cyane mu murimo w’Imana kuva akiri muri Kaminuza y’u Rwanda i Butare, ari naho yakiriye Yesu nk’Umwami n’Umukiza we.

Umugore we wa mbere Kunda yatabarutse afite imyaka 37, yamusigiye abana batatu barimo abakobwa babiri n’umuhungu umwe.

Mu ntangiriro z'Ugushyingo 2019 nibwo Ev. Kwizera yateye ivi asaba Coco ko yamubera umufasha arabyemera
Pasiteri Aaron Ruhimbya niwe wabaranze abasabira n'umugisha
EV.Kwizera na Coco bitegura kurushinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .