00:00:00 IGIHE NETWORK KN KINYARWANDA EN ENGLISH FR FRANCAIS

Yarijijwe n’igitaramo cye cyahagaritswe! Adrien Misigaro agiye gusubiza amafaranga abari baguze amatike

Yanditswe na Nsengiyumva Emmy
Kuya 11 March 2020 saa 08:35
Yasuwe :

Tariki ya 8 Werurwe 2020 yabaye umunsi udasanzwe w’amanywa akambye n’ijoro rirerire kuri Adrien Misigaro wahagarikiwe igitaramo cye ’Each One Reach One’ yagombaga gukorera mu Mujyi wa Kigali habura amasaha make ngo kibe.

Iki gitaramo cyari cyateguwe mu rwego rwo gukangurira buri wese mu Banyarwanda gufasha byibuza umuntu umwe wabaswe n’ibiyobyabwenge kubivamo.

’Each One Reach One’ yagombaga kubera i Rusororo kuri Intare Arena ku wa 8 Werurwe no mu Karere ka Huye muri Auditorium muri Kaminuza y’u Rwanda, Ishami rya Huye ku wa 15 Werurwe 2020.

Bitunguranye habura amasaha make ngo igitaramo cy’i Kigali kibe ku Cyumweru, Umujyi wa Kigali wasohoye itangazo ugaragaza ko ibikorwa by’imyidagaduro byose bihuriramo abantu bihagaritswe bikazasubukurwa mu gihe hazatangwa irindi tangazo. Ni ingamba zafashwe bigendanye no kwirinda icyorezo cya Coronavirus cyugarije Isi.

Adrien Misigaro yateguye iki gitaramo binyuze mu muryango udaharanira inyungu yashinze mu Rwanda witwa “Melody of New Hope”.

Nyuma yo guhagarikwa kwacyo, Adrien Misigaro na bagenzi be ntibacitse intege ahubwo bahisemo kugikora kigacishwa ku rubuga rwa Youtube rw’uyu muhanzi.

Muri icyo gitaramo yasabye abafite umutima w’urukundo gukomeza gahunda yo gushyigikira umugambi we wo kugaruza ineza ababaswe n’ibiyobyabwenge.

Nyamara mu magambo ye yagarutse cyane ku gihombo yasigiwe no kuba igitaramo kitarabaye nyamara yari yaragishoyemo imbaraga nyinshi; abara igihombo cya miliyoni zisaga 14 Frw.

Misigaro yatangaje IGIHE uko yakiriye guhagarikwa kw’igitaramo cye n’igihombo byamuteje.

Uyu muhanzi yavuze ko nubwo yababajwe n’ifungwa ry’igitaramo ariko nanone impamvu yatumye gifungwa yumvikana kuko nawe yumva uburemere bwa Coronavirus.

Ati ”Biriya si ibibazo, abantu twemera Imana nyuma y’ibibazo tubona ibisubizo, nta bibazo birimo.“

Misigaro Adrien yavuze ko mu ijoro ribanziriza igitaramo aribwo yabwiwe bwa mbere ko igitaramo cye kitazaba kubera ikibazo cy’icyorezo cya Coronavirus.

Misigaro yavuze ko bakibimubwira atanyuzwe ahubwo yabyukiye ku Biro by’Umujyi wa Kigali baramusobanurira bituma yemera kuva ku izima.

Avuga ko kwakira ko igitaramo cye cyahagaze ari ibintu byamutwaye umwanya munini. Ati ”Amarira y’abagabo ntayo nari ngifite nahise ndira, byari biteye agahinda. Ni igitaramo cyari cyadutwaye imbaraga nyinshi kumva ko kitakibaye byaratubabaje.”

Uyu muhanzi yavuze ko bakoze igitaramo kuri Youtube mu rwego rwo kwanga kugwa mu mutego wa Satani.

Ati "Igitekerezo cyaje nyuma yo kubona uko twari twateguye urubyiniro n’abahanzi b’abahanga bari kuririmba bityo twanze kwangiza amahirwe twari tubonye.”

”Satani yari yaduteye ashaka kudutera agahinda, twanze kwemera ko atsinda nk’abakozi b’Imana twakoresheje impano yacu aho gutaramira Abanyarwanda dutaramira Isi yose.”

Gukorera mu cyumba cy’igitaramo kitarimo abantu avuga ko byari bigoye ariko ari ibintu bari batekereje ndetse Imana ibatiza imbaraga.

Ati ”Twari mu munezero udasanzwe nta nubwo nibukaga ko hatarimo abantu, nabonaga intebe nkabonamo abantu. Iby’Imana burya biba bifite ibyabyo byari byiza cyane.”

Avuga ku mafaranga arenga miliyoni 14 Frw ari gukusanya, Adrien Misigaro avuga atari ayo gushyira ku mufuka ahubwo ari ayo gushyira muri MNH (Melody of New Hope) yashize mu mwaka wa 2019.

Aha yasobanuye ko ayo mafaranga ariyo yari yashoye atekereza ko agomba kwinjira mu gitaramo akayashyira mu mushinga we wa Melody of New Hope.

Misigaro asanga ku bwe nta muntu cyangwa urwego runaka atunga agatoki ahubwo ati ”Nakarenganyije Satani waduteje kiriya cyorezo ariko ingamba zo kukirwanya nibyo hakorwe igishoboka cyose.”

Abajijwe niba iki gihombo yagize bidahungabanyije ubukungu bw’umuryango we yavuze ko nta na kimwe kuko icy’ingenzi ari uko we ari muzima.

Mu bibazo byibajijweho cyane nyuma y’isubikwa ry’igitaramo harimo icyo gusubiza amafaranga abari bamaze kugura amatike.

Adrien Misigaro yavuze ko guhera ku wa Gatanu tariki 12 Werurwe 2020 batangira gusubiza abantu amafaranga y’amatike bakazatangaza aho abantu bazajya kuyafata bitwaje itike baguze.

Ati ”Turaza kubamenyesha aho bayasanga, ushaka gushyigikira Melody of New Hope nta kibazo yayaturekera ariko uwumva yifuza kuyatora we rwose tugiye gushyiraho aho abantu bazayasanga. Tuzabamenyesha.”

Adrien Misigaro yagize igitekerezo cyo gukora igitaramo mu bukangurambaga bwo kurwanya ibiyobyabwenge nyuma yo gusura Ikigo kigororerwamo ababaswe nabyo kiri i Iwawa mu mwaka ushize.

Adrien Misigaro yahishuye uko yarijijwe n’igitaramo cye cyahagaritswe

Gentil Misigaro yahishuye uko ariwe wacuze umugambi wo gukorera igitaramo cya Adrien kuri Youtube

Adrien Misigaro igitaramo cye cyahagaritswe ngo hirindwe Coronavirus
Adrien Misigaro na Gentil Misigaro (ibumoso) bababajwe bikomeye n'ihagarikwa ry'igitaramo batakajemo imbaraga nyinshi bitegura
'Each One Reach One’ ni igitaramo cyari giteguye neza ndetse abakirebye kuri Youtube baranyuzwe
Adrien Misigaro na bagenzi be baririmbiye intebe, asaba inkunga ngo agaruze asaga miliyoni 14 Frw yashoye
Gentil Misigaro akunze kuririmbana na mubyara we Adrien Misigaro ndetse bafitanye indirimbo nyinshi bahuriyemo zirakundwa
Adrien Misigaro na Gentil Misigaro bakoreye igitaramo kuri Youtube. Nta muntu wari mu cyumba cyabereyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .