Chorale Christus Regnat yasohoye indirimbo yakorewe mu ngo hifashishijwe telefoni

Yanditswe na Uwiduhaye Theos
Kuya 29 Mata 2020 saa 08:17
Yasuwe :
0 0

Chorale Christus Regnat ikorera ivugabutumwa muri Kiliziya Gatolika, Paruwasi ya Regina Pacis, iherereye i Remera mu Mujyi wa Kigali, yashyize hanze indirimbo nshya bise ‘Mu Maboko Yawe’ ihumuriza abantu, yakozwe hifashishijwe telefoni ngendanwa z’abaririmbyi.

Ni indirimbo yagiye hanze muri ibi bihe abantu bose basabwe kuguma mu rugo nk’ingamba yo kwirinda ikwirakwira ry’icyorezo cya Coronavirus.

Ibi byatumye ibikorwa hafi ya byose ku Isi bihagarara, imirimo irasubikwa, inganda zifunga imiryango ndetse insengero n’andi materaniro abantu bahuriragamo basingiza Imana nabyo iki cyorezo nticyabirebeye izuba.

Izo ngaruka ziturutse kuri Coronavirus zakomye mu nkokora abaririmbyi, baba abaririmba ku giti cyabo cyangwa se abaririmba mu buryo bw’amatsinda aribwo Chorale Christus Regnat ibarizwamo.

Nyuma yo kubona ko abantu benshi bihebye bitewe n’impamvu nyinshi iki cyorezo cyateje, iyi korali yahisemo gukora mu nganzo ngo bafashe abakirisitu n’abantu muri rusange kongera gutekereza ku Isumbabyose ari nayo ifite intangiriro n’iherezo.

Iyi ndirimbo ifite ubutumwa buhumuriza, bwubaka kandi bukarema imbaraga buri wese muri iki gihe Isi iri mu ruhuri rw’ibibazo byatewe na Coronavirus.

Yubatse mu magambo y’umwimerere y’Umwanditsi w’indirimbo, umuhimbyi n’umwarimu wa Muzika, Bahati Wellars umwe mu bagize Chorale Christus Regnat wicaye agasesengura ibi bihe agasanga ibyo abantu bari gucamo bagomba kwishyira mu biganza by’Imana.

Hari aho agira ati “Mu maboko yawe Dawe ni ho nshyize amizero yanjye, mu biganza byawe Mana yanjye ni ho nshyize imbaraga zanjye, Dawe rinda ukwemera ngukesha, nirunduriye mu gushaka kwawe Nyagasani ni wowe ungize.”

Iyi ndirimbo yakozwe hifashishijwe ikoranabuhanga. Umuhimbyi Bahati Wellars amaze guhimba indirimbo no kuyandika neza mu manota, abagize Chorale Regnat bagize igitekerezo cyo kuyigira ku mbuga nkoranyambaga buri wese aho ari mu rugo maze abarimu batangira kwigisha nk’uko imyitozo ubusanzwe yo kwiga indirimbo yakorwaga.

Nyuma yo kwiga indirimbo boherereje amanota y’indirimbo utunganya indirimbo mu majwi (audio producer) witwa Emmy Pro ufite studio yitwa Universal record, amaze gukina/gucuranga umuziki arongera arawuboherereza buri wese ashyiramo ijwi rye mu rugo akoresheje telefoni ye maze ayo majwi akusanywa na producer arayahuza akuramo indirimbo y’amajwi.

Bizimana Jérémie usanzwe ari umuhimbyi, umwarimu w’indirimbo ndetse akanamamaza ibikorwa bya Chorale Christus Regnat yabwiye IGIHE ko bahuje amashusho bifashishije ikoranabuhanga bakarangiza iyi ndirimbo.

Ati “Nyuma rero yo gukora audio ntibyagarukiye aho ahubwo twifashishije ikoranabuhanga muri iyi minsi rifasha abantu kuba baririmba batari kumwe nyamara ubabona akababona hamwe ryitwa “Virtual Choir” maze duhuza amashusho buri wese yafashe atunganywa n’umwe mu baririmbyi ba Chorale Christus Regnat witwa Eugene Havugimana ubu uri mu Butaliyani.”

Chorale Christus Regnat ni imwe mu zibarizwa muri Kiliziya Gatolika muri Paruwasi yitiriwe Umwamikazi w’Amahoro (Regina Pacis) i Remera muri Arikidiyosezi ya Kigali.

Chorale Christus Regnat yasohoye indirimbo bakoreye mu ngo bifashishije telefoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .