Uwamahoro Angel Malaika yasezeranye n’umukunzi imbere y’amategeko

Yanditswe na Nsengiyumva Emmy
Kuya 21 Kanama 2020 saa 08:20
Yasuwe :
0 0

Umunyarwandakazi uba muri Leta Zunze Ubumwe za Amerika, Angel Malaika Uwamahoro, wamamaye cyane mu guhimba imivugo no gukina ikinamico na filime, yasezeranye imbere y’amategeko n’umukunzi we Christian Kayiteshonga.

Kuri uyu wa 20 Kanama 2020, mu Mujyi wa Boston muri Leta Zunze Ubumwe za Amerika habereye umuhango wo gusezerana imbere y’amategeko hagati ya Uwamahoro na Kayiteshonga.

Nyuma yo gusezerana imbere y’amategeko byitezwe ko aba bazaba bakora ubukwe busanzwe, icyakora amakuru yabwo akomeje kugirwa ibanga.

Uwamahoro na Kayiteshonga bari bamaze imyaka myinshi bagaragaza urukundo bafitanye by’umwihariko ku mbuga nkoranyambaga.

Uwamahoro yamenyekanye bitewe n’imivugo irimo ubuhanga bukomeye yagiye atambutsa mu mihango ikomeye yabaga yitabiriwe na Perezida Kagame nka Rwanda Day.

Ni umukinnyi w’ikinamico uri ku rwego rwo hejuru kuko yanabashije kugira uruhare mu mukino witwa Miracle in Rwanda werekaniwe i Broadway muri New York.

Malaika afite n’impano yo gukina filime aho yakinnye mu yitwa Notre Dame du Nil yaturutse ku gitabo cya Mukasonga Scholastique. Azi no kuririmba cyane ko DJ Marnaud aherutse kumwifashisha mu ndirimbo aherutse gushyira hanze yise ‘Reka Turye Show’.

Kayiteshonga wamaze gusezerana imbere y’amategeko na Uwamahoro nawe ni umusore usanzwe utuye muri Leta Zunze Ubumwe za Amerika aho benshi bamuzi nk’umuhanga mu bijyanye no gufata amafoto n’amashusho mu birori n’imihango itandukanye.

Malaika Uwamahoro azwi cyane nk'umuhanga mu guhanga imivugo, gukina ikinamico na filime
Byari ibyishimo kuri aba bombi kuri uyu munsi wabo w'amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .