Umutoniwase yambaye bikini muri Miss Earth 2018

Yanditswe na Uwiduhaye Theos
Kuya 19 Ukwakira 2018 saa 05:33
Yasuwe :
0 0

Umutoniwase Anastasie uhagarariye u Rwanda mu irushanwa rya Miss Earth 2018 riri kubera muri Philippines, yiyerekeranye mu cyiciro cyo kwerekana ubwiza n’imiterere y’umubiri yambaye bikini.

Igikorwa cyo kwiyerekana mu mwambaro wa Bikini cyabaye kuri uyu wa Gatanu, guhera saa kumi n’ebyiri z’umugoroba muri Philippines [saa sita z’amanywa zo mu Rwanda] ahitwa Brisa Marina Beachfront Resort mu Mujyi wa Bataan.

Abakobwa bari mu itsinda ryiswe ‘Fire’ bo muri Argentine, Armenia, Australia, Bolivia, Curacao, Czech, Denmark, Repubulika y’Abadominikani, u Budage, u Bugereki, Honduras, Korea, Malaysia, Montenegro, Nepal, u Buholandi, Nigeria, Panama, Pologne, Romania, u Burusiya, Sierra Leone, Singapore, Afurika y’Epfo, Espagne, Suède, Thailand, Leta Zunze Ubumwe za Amerika na Venezuela; ni bo biyerekanye bahatanye na Umutoniwase.

Abakobwa begukanye imidari harimo uwo muri Repubulika y’Abadominikani wegukanye umudari wa Zahabu n’aho uwo muri na Venezuela yegukana umudali w’umuringa. Uwo mu Rwanda nta mudali n’umwe yigeze yegukana.

Uyu munsi ubwo yiyerekanaga yagaragaye mu mwambaro wa bikini ugizwe n’isutiya ndetse n’ikariso, byose byijimye bifite ibara ry’umukara yambaye inkweto ndende.

Icyiciro cyo kwerekana imiterere n’umubiri cyiswe ‘Preliminary Judging for Figure and Form’ kiri muri bitatu byibandwaho mu irushanwa rya Miss Earth riri kubera muri Phillipines kuva mu ntangiriro z’uku kwezi.

Ibindi byiciro bifite amanota menshi muri Miss Earth birimo; icyo kureba ubwiza bw’isura no gusuzuma ubumenyi bw’abahatana ku bintu bitandukanye cyane cyane ku bidukikije.

Uwase Hirwa Honorine ‘Igisabo’ umwaka ushize ubwo yitabiraga iri rushanwa yavugishije benshi yanga kwambara bikini ubugira kabiri.

Irushanwa ry’uyu mwaka ryatangiye kuwa 6 Ukwakira, rizasozwa kuwa 3 Ugushyingo ahitwa Mall of Asia Arena mu Mujyi wa Pasay.

Umwaka ushize ikamba ryegukanywe na Karen Ibasco wo muri Philippines wari ku isonga mu basubije neza, ari nacyo cyashingiweho ahigika bagenzi be bari bahatanye.

Umutoniwase ubwo yiyerekanaga yambaye Bikini
Akanyamuneza kari kose kuri Umutoniwase ubwo yahagurukaga mu Rwanda yerekeje muri aya marushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza