Umutoni yabaye igisonga cya mbere cya Miss Africa Arizona

Yanditswe na Uwiduhaye Theos
Kuya 11 Ugushyingo 2018 saa 12:03
Yasuwe :
0 0

Umutoni Joyeuse ukomoka mu Rwanda, yagizwe igisonga cya mbere cya Miss Africa Arizona 2019 muri Leta Zunze Ubumwe za Amerika.

Iki gikorwa cyabaye mu ijoro ryo kuri uyu wa Gatandatu tariki 10 Ugushyingo 2018 ahitwa Bulpitt Auditorium mu Mujyi wa Phoenix, ku nshuro ya karindwi.

Abakobwa biyerekanye mu byiciro bitandukanye ariko icyahesheje amanota menshi Umutoni ni icyo kwiyerekana mu mwambaro ugaragaza igihugu aho yambaye ikanzu ikozwe mu mabara y’ibendera ry’u Rwanda, iyi akaba ari iyo yohererejwe na Ndahiro Liliane wayambaye muri Miss Rwanda 2018.

Umutoni yari ahanganye n’abandi bakobwa bo mu bihugu birimo u Burundi, Senegal, Kenya, RDC, Sudani y’Epfo, Cameroon, Afurika y’Epfo, Nigeria na Zimbabwe.

Umunya-Kenya witwa Naomi Wanjiku ni we wegukanye ikamba, Umutoni Joyeuse aba Igisonga cya mbere, icya kabiri kiba Umunya-Nigeria, Alissa Burgan, n’aho Umunyafurika y’Epfo, Zamantungwa Gugulethu , aba igisonga cya gatatu.

Umutoni yabwiye IGIHE ko kuba yabaye igisonga cya mbere ari ishimwe kuri we ndetse ari guterwa ishema no kuba ariwe muto wari uri mu irushanwa akabasha no kwitwara neza.

Ati “Ni intambwe ikomeye kuba mbashije kugera aha ntatukishije igihugu cyanjye mu bisubizo nabajijwe ngo nereke amahanga ko Afurika cyane cyane u Rwanda rufite ibibazo. Ndishimye cyane kuko ni ubwa mbere nitabiriye amarushanwa ni njye mukobwa muto wari urimo. Ndishimye cyane.”

Uyu mukobwa ufite umushinga ujyanye no gukorera ubukangurambaga abana b’abakobwa bo muri Afurika yose bakunze guhura n’ihohoterwa, yavuze ko bigiye kumutera imbaraga mu gushyira mu bikorwa ibyo yiyemeje no gukabya inzozi yahoranye kuva kera.

Abajijwe icyo kuba yahawe ikamba bigiye kumarira igihugu cyamubyaye, yavuze ko hari byinshi abanyarwanda bagiye kunguka kubera uyu mwanya yabonye.

Ati “U Rwanda rumpora ku mutima. Hano hari abanyarwanda benshi ntekereza ko umushinga wanjye uzabera ikiraro kubera ko n’ubundi hakirimo utubazo two gushyingira abakobwa bakiri bato. Ikindi haracyari abana b’abakobwa bakorerwa ihohoterwa ku mashuri bitewe n’uko ari abirabura. Ndashaka kubakorera ubuvugizi.”

Umutoni w’imyaka 18 yageze muri Amerika mu 2016. Yiga ibijyanye n’amabanki muri Metro Tech High School, aho ateganya kurangiza mu 2019. Atuye mu Mujyi wa Phoenix muri Leta ya Arizona.

Akanyamuneza ni kose kuri Umutoni nyuma yo kugirwa igisonga cya mbere cya Miss Africa Arizana 2019
Byari ibyishimo ku muryango wa Umutoni
Ndahiro Liliane yoherereje iyi kanzu Umutoni ngo azaseruke ayambaye, iza kuba kimwe mu byatumye aza mu myanya myiza
Umutoni Joyeuse wari uhagarariye u Rwanda muri Miss Africa Arizona 2019 yabaye igisonga cya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza