Uko Miss Umutoni yabaye umunyamakuru, ingorane yahuye nazo n’urukundo rwe n’umukinnyi Biramahire

Yanditswe na Nsengiyumva Emmy
Kuya 16 Gashyantare 2020 saa 07:59
Yasuwe :
0 0

Umutoni Josiane ni umunyamakuru wa Radio10 na TV10 akaba umwe mu bakobwa bitabiriye Miss Rwanda mu mwaka wa 2017 ariko by’umwihariko akaba umukunzi wa Rutahizamu w’ikipe ya Buildcom FC akaba n’umukinnyi w’ikipe y’Igihugu Amavubi.

Uyu mukobwa mu kiganiro kirekire na IGIHE, yatuganirije ku buzima bwe muri Miss Rwanda, mu itangazamakuru ndetse n’ubuzima bwe bw’urukundo.

Umutoni yitabiriye Miss Rwanda mu mwaka wa 2017 icyakora ntiyabasha kurenga icyiciro cya Pre-Selection, aha ninaho yamenyaniye n’abantu banyuranye barimo n’umwe mu bategura Miss Rwanda wamufashije kubona aho yinjirira mu itangazamakuru.

Ati”Nyuma yo kuva muri Miss Rwanda nari nahakuye inshuti nyinshi, umwe mu baritegura wari ubabajwe nuko mvuyemo yaranyegereye ambaza ikigiye gukurikiraho mubwira ko ngiye kwiga kuko nari ndi mu wa mbere muri Jomo Kenyatta.”

Uyu muyobozi wari muri Miss Rwanda atashatse kugarukaho ni we wamufashije kubona akazi kuri TV10 nyuma yo kugerageza kuri Royal Tv ntibimukundire.

Akigerayo ngo yisanze ahise yinjira mu myidagaduro kuko aribyo yari amazemo igihe muri Miss Rwanda, uyu yakoze kuri TV10 igerageza ry’ukwezi kose.

Amaze gukora igerageza yahawe akazi kuri TV10 ari naho agikora kugeza uyu munsi nubwo yanyujijemo agahagarika kuva muri 2018 asubirayo muri 2019.

Umutoni yahishuye ko ubwo yinjiraga mu itangazamakuru ry’imyidagaduro abahanzi atibuka umubare bamuharaye bakamutereta cyane ko yari umwana muto kandi uvuye muri Miss Rwanda wagaragazaga uburanga.

Ati”Ntabwo najya kukubeshya, icyakora ubungubu ntabwo bakintereta ubanza narakuze cyangwa narabaye mubi, cyangwa haraje abanda sinzi, gusa icyo gihe baramparaye, abantu benshi baranterese.”

Uyu mukobwa avuga ko yari yarishyize mu mutwe ko abahanzi bakunda gutereta ku buryo atari kubishinga, bityo yiga imitwe yo kujya yijijisha akabagira abasazi igihe babaga bari kumutereta we akabereka ko ari inshuti zisanzwe kuruta uko bakundana.

Uyu mukobwa avuga ko kugeza ubu Imana yamufashije bigashira cyane ko abenshi baburaga icyo bashakaga bakagenda.

Umutoni avuga ko ikintu cyamushoboje kudahura n’ibishuko mu myaka amaze mu itangazamakuru ari uko yaryinjiyemo afite amakenga y’uko abahanzi bakunda gutereta bityo akagira uko abitwaraho.

Uko Umutoni yahuye n’uko yakundanye na Biramahire rutahizamu wa Buidcom Fc yo muri Zambia

Umutoni abajijwe kuri Biramahire Abeddy, yavuze ko amubona bwa mbere uyu mukinnyi yari yitabiriye ikiganiro cya siporo kuri TV10 abona umusore mwiza ariko ntibavugana.

Ubwa kabiri ngo bahuriye muri Restaurant agiye kurya nabwo yongera kubona umusore mwiza yigeze kubona ku kazi iwabo nabwo ahava batavuganye.

Umutoni avuga ko nyuma aribwo yaje kubona amafoto ya Biramahire kuri Instagram, ubwiza bw’uyu mukinnyi bwatumye uyu munyamakurukazi ayakoraho‘Like’.

Biramahire nawe wari ubonye umukobwa mwiza wakunze amafoto ye yanyuze mu gikari amushimira urukundo yamweretse.

Uyu mukobwa avuga ko kuvugana kwabo byatangiye icyo gihe kugeza bahanye nimero za telefone bakajya bavugana ariko batarahura.

Ntibigeze babwirana ko bakundana kugeza muri Nyakanga 2019, iki gihe ngo nibwo Biramahire yabwiye uyu mukobwa ko amukunda icyakora abimubwira kuri telefone kuko yari yaragiye muri Zambia atabimubwiye.

Yavuze ko bimwe mu byo yakundiye Biramahire harimo; Kuba asenga, adakunda inzoga ndetse ari umusore uzi gufata inshingano mu buzima bwe.

Biramahire Abeddy ni umukinnyi wa Buildcom FC yo muzi Zambia akaba yaramenyekanye cyane mu Rwanda ubwo yacaga mu makipe nka Police FC na Mukura. Uyu ariko kandi azwi nka rutahizamu wagiye yiyambazwa kenshi mu ikipe y’Igihugu Amavubi nubwo muri iyi minsi atari guhamagarwa.

Ikiganiro na Umutoni Josiane wahishuye uko abahanzi bamuterese n’uko yahuye na Biramahire Abedy

Biramahire Abeddy rutahizamu w'Ikipe y'Igihugu Amavubi niwe wigaruriye umutima wa Umutoni Josiane
Umutoni Josiane kugeza ubu ni umunyamakuru wa Radio10 na TV10
Uyu mukobwa yitabiriye Miss Rwanda 2017 nubwo yasezerewe muri Pre-Selection

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .