Umuramyi Papi Clever yarushinze na Ingabire Dorcas (Amafoto)

Yanditswe na Ishimwe Israel
Kuya 7 Ukuboza 2019 saa 04:41
Yasuwe :
0 0

Umuhanzi uhimbaza Imana Tuyizere Papi Clever yahamije isezerano ryo kubana akaramata na Ingabire Dorcas bamaze igihe bakundana.

Papi Clever yasezeranye imbere y’Imana na Ingabire kuri uyu wa Gatandatu tariki ya 7 Ukuboza 2019 muri Dove Hotel ku Gisozi.

Ubukwe bw’aba bombi bwabaye nyuma y’icyumweru Papi Clever asabye akanakwa Ingabire mu birori byabereye mu Karere ka Musanze ku wa 30 Ugushyingo 2019. Kuri uwo munsi banasezeranye byemewe n’amategeko y’u Rwanda mu muhango wabereye mu Murenge wa Muhoza.
 

Isezerano ryo kubana byemewe n’Itorero ADEPR babarizwamo ryaheshejwe umugisha na Pasiteri Ndayizeye Isaïe, ubarizwa muri Ntora English Church Service aho Papi Clever asengera.

Papi Clever mu ijambo rye yavuze ko "Imana ntizicuza ko nahawe Ingabire."

Akimara kumwambika impeta y’urudashira yamubwiye amagambo meza ahita amuririmbira agace gato k’indirimbo "I Will Always Love You" ya Whitney Houston.

Nyuma yo guhabwa icyemezo cy’abashakanye gishimangira ko babaye umwe, Papi Clever na Ingabire bafatanyije kuririmba indirimbo ye yitwa "Yego" irimo ubutumwa bushimangira ko nta wahindura umugambi w’Imana.

Ibi birori byitabiriwe n’inshuti n’abavandimwe b’imiryango yombi. Ni umuhango witabiriwe kandi n’abapasiteri batandukanye bayobowe n’Umuvugizi wa ADEPR, Rev. Karuranga Euphrem.

Papi Clever yarushinze agaragiwe n’abasore biganjemo abo bafatanya (band) mu kuramya no guhimbaza Imana.

Mu gusezerana kwa Papi Clever na Ingabire haririmbye Korali Goshen y’i Musanze yareze umukunzi we na Ntora Worship Team abereye umuyobozi.

Parrain we ni Pasiteri Nsenga Emmanuel wo muri Eglise Vivante. Umukunzi we yari agaragiwe (Marraine) na Ingabire Carine, umugore w’umuhanzi Alexis Dusabe.

Nyuma yo gusezerana imbere y’Imana, Papi Clever, abatumiwe bakiriwe mu Busitani bwa Gigi’s ku Gisozi.

Papi Clever yabengutse Ingabire bahuje umuhamagaro we na we ari umuramyi. Uyu mukobwa ufite ijwi ryiza yanyuze muri Korali Goshen ikorera ivugabutumwa muri ADEPR Musanze.

Nyuma yo kwimukira i Kigali, Ingabire ashobora gusanga umukunzi we muri Ntora Worship Team abereye umuyobozi.

Izina rya Papi Clever uyobora Ntora Worship Team ibarizwa muri ADEPR rimaze igihe ryumvikana mu bakunzi b’indirimbo zahimbiwe Imana.

Yakoze indirimbo nyinshi zirimo “Ugendane Nanjye”, ‘‘Narakwiboneye’’, ‘‘Uburyohe’’, ‘‘Ahari Kurira’’, “Utwumvire”, "Uvuze Yego", "Uri uwo Kwizerwa" na “Impamvu z’Ibifatika’’ aheruka gushyira hanze.

Agezweho cyane kubera umushinga w’indirimbo zo mu gitabo yatangiye gusubiramo ndetse yifuza gusoza zose uko ari 547.

Album ya mbere y’izi ndirimbo yayise “Amakuru y’Umurwa” ikubiyeho indirimbo 12 zo mu gitabo.

Papi Clever yinjiye mu ishuri rya muzika muri Kigali Music School mu 2012 ariho yanatangiriye umuziki nk’umwuga mu 2014. Yagiye yandika indirimbo nyinshi zirimo n’iza Hyssop Choir yo muri ADEPR Kiruhura aho yazamukiye mbere yo gutangira kwandika ize bwite.

Papi Clever yaherekejwe na Pasiteri Nsenga Emmanuel wo muri Eglise Vivante wamubereye Parrain mu gihe umukunzi we yagaragiwe (Marraine) na Ingabire Carine usanzwe ari umugore w’umuhanzi Alexis Dusabe
Papi Clever na Ingabire Dorcas bahamije isezerano ryo kubana nk'umugabo n'umugore mu Itorero rya ADEPR
Abasore bambariye Papi Clever mu ifoto na Ingabire Dorcas wari ufite akanyamuneza ku maso
Papi Clever ukunzwe cyane mu ndirimbo zo mu gitabo yari agaragiwe n’abasore biganjemo abo bafatanya (band) mu kuramya no guhimbaza Imana
Ingabire Dorcas n'abakobwa bamugaragiye bari bafite ibyishimo ku munsi we udasanzwe
Umunsi w'ubukwe uba ariwo gufata amafoto y'urwibutso
Abasore baserukanye na Papi Clever bari babyambariye...
Ingabire ufite ijwi ryiza yanyuze muri Korali Goshen ikorera ivugabutumwa muri ADEPR Musanze
Ingabire yamwenyuye...Amasezerano yo kubaka urugo rwe yasohoye
Ingabire ubu ni umugore wa Papi Clever imbere y'Imana n'abantu
Umuramyi Papi Clever yarushinze na Ingabire Dorcas bamaze igihe bakundana
Wari umunsi w'akanyamuneza...
Papi Clever asanganira umugore we
Akanyamuneza kari kose ku bageni nyuma yo kwambikana impeta y'urudashira
Papi Clever yijeje umukunzi we ko azamukunda iteka ryose kugeza Yesu agarutse
Akana ko mu jisho...
Abasore n'inkumi bambariye Papi Clever na Ingabire na bo bamwenyuye
Aba bombi bahuje umuhamagaro kuko ari abaramyi bo mu rusengero
Bakoze ubukwe bubereye ijisho
Papi Clever yasomye umukunzi we ku ijosi nk'ikimenyetso cy'urukundo cya Papi Clever amufitiye
Papi Clever n'umukunzi we Ingabire bari bagaragiwe na Pasiteri Nsenga Emmanuel n'umugore wa Dusabe Alexis. Aha bayobowe na Pasiteri Ndayizeye Isaïe wabasezeranyije
Abasore n'inkumi bambariye Papi Clever na Ingabire bajyanishije
Akanyamuneza ni kose kuri Papi Clever na Ingabire Dorcas
Abasore bambariye Papi Clever ni uwo mwambaro baserukanye

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .