Ibi uyu muraperi yabibwiye IGIHE ubwo yari abajijwe aho ikibazo cye n’Umujyi wa Kigali kigeze, ahamya ko bamusabye gusenya yabatakambira ntibamwumve ibyatumye yubahiriza ibyo yasabwe.

Ati “Buri kintu kigira ingorane, kiriya ni kimwe mu bikorwa nari natangije ariko hajemo kariya kabazo ariko nyine turacyakora. Ntabwo nari nitije ubutaka bw’Umujyi wa Kigali kuko sinarinzi ko ari ubwabo kuko ntabwo bubanditseho bwari bwanditse ku muntu dukodesha, ikindi ibyo nari nubatsemo ni ibintu byimukanwa. Icyo nakuyeho ni agace bantegetse.”

Abajijwe uko byagenze cyane ko yari yatakambye asaba gukoreramo umwaka umwe, Jay C yagize ati “Ntabwo nawubonye.”

Umuraperi Jay C yari aherutse gutakambira Umujyi wa Kigali, awusaba kutamusenyera ubwugamo yari yubatse mu busitani bw’aho afite ‘restaurant’ mu Karere ka Kicukiro mu Murenge wa Nyarugunga mu Kagali ka Rwimbogo icyakora nkuko yabigarutseho ntabwo ubusabe bwe bwumviswe.

Jay C yavugaga ko ari we wateye indabyo ziri muri uyu mwanya yanatunganyije

Jay C uhamya ko ari we na nyiri inzu akodesha batunganyije aha hari hasagutse ku butaka umujyi wari waguze ubwo waguraga umuhanda, yari yasabye ko yatizwa ubu butaka akabwitaho nk'uko yari asanzwe abigenza ariko bukanamubyarira umusaruro ariko byaranze

Jay C yamaze kwisenyera iki gice kiri mu mutuku icyakora ntabwo byamubujije gukora kuko ibikorwa byakomeje