Umuhanzi w’umukire! King James yahishuye byinshi byibazwa ku buzima bwe (Video)

Yanditswe na Muhumuza Simeon, Muvunyi Arsène
Kuya 21 Kanama 2019 saa 03:26
Yasuwe :
0 0

Ruhumuriza James wamamaye nka King James, ni umwe mu bahanzi b’abanyarwanda bigaruriye imitima ya benshi bitewe n’indirimbo ze zuje amagambo afasha abari mu rukundo kumerwa neza.

Umuziki watangiye we kwamamara mu 2009 ubwo yibandaga cyane mu njyana ya R&B, indirimbo ze nka Nzakubona Ryari, Intinyi, Naratomboye n’izindi zimufashije kwamamara mu bihe by’umwaduko w’abahanzi bashya.

Uyu musore afite ibigwi bitandukanye birimo no kuba yaregukanye igikombe cya Primus Guma Guma Super ku nshuro ya kabiri.

Ni umwe mu basaruye amafaranga menshi mu muziki bitewe no kwamamariza ibigo bitandukanye by’ubucuruzi n’ibitaramo bikomeye mu Rwanda no hanze.

Aya mafaranga ntiyayajyanye mu iraha ngo ayarye ashire, ahubwo yashoye mu bindi bikorwa bimwinjiriza birimo Supermarket yise Mango, inzu y’akataraboneka iri ku Ruyenzi n’ibindi.

Ni umusore utuje cyane, abayeho mu buzima butandukanye cyane n’ubw’ibindi byamamare. Abantu bamwibazaho byinshi ku buzima bwe bwite.

Yagiranye ikiganiro kirambuye na IGIHE ahishura byinshi ku muziki we, amateka y’ubuzima kuva akiri umwana kugeza abaye icyamamare.

Reba mu mashusho ikiganiro King James yagiranye na IGIHE

IGIHE: Tubwire ibintu bifatika umuziki umaze kukugezaho.

K.James: Ntabwo njya nibanda cyane mu bintu bifatika nk’inzu kuko ndayifite ahubwo abantu, kuko ni wo mutungo nakuyemo munini, abafana banjye muri rusange, inshuti nungutse niwo mutungo navuga ukomeye kuko ni ibintu bizahoraho.

IGIHE: Iriya nzu ifite agaciro k’amafaranga angahe?

K.James: Ntabwo ndibubijyemo cyane ariko muri rusange narabikoze mbona birakunze ni cyo cyangombwa. Naho iby’amafaranga byo ntabwo ndibubitindeho.

IGIHE: Igitekerezo cyo gushinga Supermarket cyaje gute?

K.James: Cyaje mu buryo bwo gukomeza kwiyubaka. Usibye no gukora umuziki n’ibindi byo mu buzima busanzwe ni mu rwego rwo kwiyubaka no kugira ngo nubake n’umuziki wanjye. Ni uko igitekerezo cyaje mpura n’abantu bari babimenyereye bangira inama.

IGIHE: Nta bahanzi baratangira kuza kwikopesha mu iduka ryawe?
K.James: Oya! Nta muhanzi waza kwikopesha abenshi baba bafite uko babigenza ntabwo bikopesha.

IGIHE: Ni gute uhuza ubucuruzi n’umuziki?

K.James: Bisaba umwanya munini nyine kuko urumva byombi uba ugomba kubikora nta kiba kigomba kuryamira ikindi, ndacyari kubigerageza byombi. Ndagerageza niyo waryama amasaha make cyangwa bikagenda ukundi burya iyo utavunitse ntabwo wumva agaciro k’ibintu.

IGIHE: Ni iki cyatumye winjira cyane mu bucuruzi?

K.James: Ni ibiba biri mu muntu kandi ukagira n’abandi mubana babigushyigikiramo, bakagutera ingufu ariko ubundi umuntu wese ashobora kubikora.

IGIHE: Uheruka i Nyabihu aho wakuriye ryari?

K.James: Mperukayo kera pe! Keretse iyo mpaciye ngiye i Rubavu ariko ubundi mpaheruka kera nko mu 1998 cyangwa 2000.

Ubundi navukiye i Kigali, mu 1995 icyo gihe twagiye i Nyabihu marayo nk’imyaka ine cyangwa itatu nza kugaruka na none i Kigali.

IGIHE: Ni uruhe rwibutso ufite ku buzima bw’i Nyabihu?

K.James: Ni bimwe byo ku ishuri. Gutwara ibyo bita ibiziga, ibicugutu, niho nigiye igare, nahize n’igice kimwe cy’amashuri abanza urumva mpafite amateka menshi.
IGIHE: Bivugwa ko wari umuhanga mu mupira w’amaguru, wakinaga ku wuhe mwanya?

K.James: Nabanje gukina inyuma, ubundi nza gukina imbere wenda bamwe twiganye mu cyiciro rusange barabizi ariko ntabwo nigeze mbona uko mbikomeza bitewe n’aho nigaga.

Naje kujya kwiga aho bitaga i Rwaza ntabwo hari umwanya munini cyane wo gukina umupira. Iyo nza kugira amahirwe nkinga nk’ahantu babiteza imbere cyane wabona nari kuba narabaye umukinnyi.

IGIHE: Ugeze i Kigali kuki utakomeje?

K.James: Nari naratangiye umuziki ari byo noneho nshaka guha umwanya cyane kuruta ibindi.

IGIHE: Muri Korali waririmbaga irihe jwi?

K.James: Naririmbaga Tenor

King James yamamaye mu ndirimbo z’urukundo zuje imitoma

IGIHE: Abantu batandukanye bakomeje kugusaba kurongora, iki gitutu ntacyo kikubwiye?

K.James: Icya mbere nzi ni uko nta mutima mubi babivugana, banyifuriza ibyiza, bifuza ko nanjye ngira urugo nkabyara ngatera imbere mu bundi buryo ariko nta kintu na kimwe kinyirukansa igihe nikigera nzabikora.

Ndabizi iki gisubizo ntibagikunda ariko na none ndabizi ko mpubutse nkaba nabikora nabi nyuma bazababara. Igihe nikigera nzabikora kandi bizabashimisha.

IGIHE: Ni iyihe ndirimbo igaruka ku buzima bwawe bwite mu zo wakoze?

K.James: Ntabwo ari nyinshi ariko harimo nka “Ndagukunda”, “Nzakubona Ryari”, “Buhoro Buhoro” inyinshi zishobora kutaza neza ku buzima bwanjye ariko hari utuntu tuba turimo.

IGIHE: Kuri “Ndagukunda” byagenze gute?

K.James: Indirimbo ubwayo yitwa “Ndagukunda” nari nakunze ndirimbira umuntu nari nakunze ko mukunda.

IGIHE: Byaje kugenda gute?

K.James: Hari igihe ibintu birangira. Byaje kurangira ariko neza. Ni ibintu abantu bumvikanyeho kuko yagombaga kugenda biba byiza ko tubihagarika gutyo.

IGIHE: “Nzakubona Ryari” yo byagenze gute?

K.James: Ni umuntu twari tumaze igihe kinini tuvugana ariko tutarabonana. Icyo gihe nari ngitangira umuziki kera ariko buri munsi yarampamagaraga tukaganira bisanzwe, nza gukuramo igitekerezo kuko twamaze nk’imyaka ibiri tuvugana ariko tutarabonana.

Nongeyemo n’ibindi kugira ngo ibe nk’iy’urukundo ariko igitekerezo ni aho cyavuye.

IGIHE: Pastor P aherutse kutubwira ko uri umuntu ukunda impaka, nibyo?

K.James: Ngira ngo byari kera ahari. Byabaga muri studio, mu buzima busanzwe kuko twarabanaga hari akantu mutumvikanaho mukajya impaka, ni ibintu bisanzwe.

IGIHE: Pastor P we ameze ate?

K.James: Ntabwo akunda kujya impaka ariko! Ahubwo ashobora guhita yicecekera akaza kubikubwira nyuma.

Pastor P wakoze indirimbo nyinshi za King James, amuzi nk'umuntu ukunda kujya impaka

IGIHE: Ugikorana na Clement nta bimenyetso by’urukundo wabonaga hagati ye na Knowless?

K.James: Oya! Ku ruhande rwanjye ntabwo nabibonaga, sinzi wenda niba ari uko twabaga turi mu kazi kenshi n’iyo twahuraga twabaga tugiye mu kazi kandi yaba Clement cyangwa Knowless ni abantu iyo bari mu kazi baba bakarimo nyine, ntabwo nigeze mbibona. Ubwo wenda keretse mu buzima busanzwe nibwo byabaga.

King James yavuze ko ubwo yakoranaga na Clement Ishimwe, atabonaga akanunu k'urukundo rwe na Knowless

IGIHE: Ni ibihe bintu utazibigirwa mu bihe bya PGGSS?

K.James: Buriya njye nibuka Guma Guma ya mbere kuruta n’iya kabiri natwaye, kuko byari bishya tutabizi, tutazi ukuntu turi bubigenze.

Habayemo ibintu byinshi bamwe baje kwita amakata byo gushaka amajwi. Yaba kuyagura, twakoze ibintu byinshi wenda bitajyanye n’abari bashinzwe amatora kuko nta n’ukuntu wari kubabona ariko twagiye mu masoko tugatoresha abantu, twashyizeho abantu batora mu ntara zose.

IGIHE: Wigeze utora umuhanzi mu bahatanye muri PGGSS?

K.James: Umuhanzi wese wansabye kugira icyo nakora naramutoye.

King James yegukanye PGGSS2. Yavuze uburyo we na bagenzi be bakorwa ibikorwa byinshi birimo kujya gushaka amajwi mu masoko

IGIHE: Ni uwuhe muhanzi mu bari kuzamuka ushima impano ye?

K.James: Ni benshi, hari Bushali, King Kivumbi, uyu mwana mushya wo muri Kina Music [Nel Ngabo] hari n’indi ndirimbo nshya yitwa So Special [Kevin Skaa] ba Igor, Amalon, ni benshi bari gukora ibintu byiza cyane.

Reba indirimbo ya Nel Ngabo yitwa Nzahinduka

Indirimbo So Special ya Kevin Skaa

IGIHE: Ibi ibiki ujya wibuka bidasanzwe byakubayeho uri gukora indirimbo?

K.James: Ndi gukora indirimbo yitwa “Mbabarira” twayikoranye na Junior yabanje gukora injyana ndi gushaka uko nyiririmba mu mutwe hahise hazamo ijambo ‘mbabarira’ mpita mbyandika vuba vuba, mbiririmbye Junior ararira.

Umva Mbabarira indirimbo yarijije Junior Multisystem

IGIHE: Ni ryari uba wumva ufite ibyishimo byuzuye muri wowe?

K.James: Ni igihe nta kibazo ufite cyo mu buzima busanzwe
IGIHE: Ni iki kigutera ubwoba?

K.James: Ni inzara.

IGIHE: Ni iyihe ndangagaciro wiyumvamo ubwawe ?

K.James: Ntabwo nkunda kwinjira mu buzima bw’abandi.

IGIHE: Ni uwuhe muntu ku Isi wishimira ukanamwubaha cyane?

K.James: Ni mama wanjye.

IGIHE: Ni iki utakazaho amafaranga menshi kurusha ibindi?

K.James: Imyenda.

Amafaranga menshi ye ayatakaza ku myambaro...

IGIHE: Ni ryari ushobora gufata icyemezo cyo kubeshya?

K.James: Igihe biri ngombwa ushaka nko gukiza ikintu.

IGIHE: Ni iki wanga mu buzima bwawe?

K.James: Nanga umuntu ushobora kumbuza amahoro. Ikindi kandi buriya ntabwo nkunda amafoto cyane.

IGIHE: Ni nde muntu mu bari ku Isi ufata nk’usuzuguritse?

K.James: Ntawe
IGIHE: Ni izihe Ndangagaciro wishimira kubona ku mugabo?

K.James: Kwiyubaha.

Icyangombwa indirimbo King James aherutse gushyira hanze

IGIHE: Ni izihe ndangagaciro wishimira kubona ku mugore?

K.James: kwiyubaha na none.

IGIHE: Ni iki gikomeye wishimira wagezeho mu buzima bwawe?

K.James: Ni abantu ni inshuti, n’aho umuziki wanjye wangejeje ni ibintu nishimira cyane.

IGIHE: Uramutse upfuye ukazuka uri inyamaswa wahitamo kuba iyihe?

K.James: Nahitamo hagati y’inngwe n’intare.

IGIHE: Ni he wifuza kuba mu buzima bwawe?

K.James: Ni mu Rwanda?

IGIHE: Ni ikihe kintu cy’agaciro utunze?

K.James: Ni inzu.

IGIHE: Ni iki cyakubabaje mu buzima bwawe ukumva wihebye?

K.James: Akenshi bihita bishira, ntabwo nkunda gushwana, ibyo bintu bindinda kuba nagira ibintu bimbabaza kuko ndiyizi mbabaye mbabara cyane.

IGIHE: Ni iki uha agaciro cyane mu nshuti zawe?

K.James: Ni ukudahemuka.

IGIHE: Ni uwuhe muntu mu mateka ufatiraho icyitegererezo?

K.James: Buriya nakundaga cyane Martin Luther King, nakunze no gukurikirana ibintu bye. Uwundi birumvikana ni Perezida wacu Paul Kagame.

IGIHE: Ni iki gikomeye wicuza mu buzima bwawe?

K.James: Sinzi niba nabyita kwicuza ariko ni ikintu mba narakoze ariko simba narabaye wenda umuhanzi. Nifuje gucuruza kera sinabikora kandi hari hari uburyo kuko nari umunyeshuri sinabijyamo cyane.

IGIHE: Wumva wapfa mu buhe buryo?

K.James: Uko nzaba meze kose ariko nishimye, ntari kubabara.

IGIHE: Ni iyihe ntego ugenderaho mu buzima bwawe?

K.James: Ni ukutiyima.

King James yujuje inzu nziza mu mafaranga yakuye mu muziki
King James ni umwe mu bahanzi nyarwanda bamaze kubaka izina mu njyana ya R&B

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza