Umbera mushya iteka! Niyo Bosco ufite ubumuga bwo kutabona yongeye kubyutsa amarangamutima ya benshi

Yanditswe na Uwiduhaye Theos
Kuya 19 Kanama 2020 saa 03:30
Yasuwe :
0 0

Niyokwizerwa Bosco umaze kwamamara mu muziki w’u Rwanda nka Niyo Bosco, amaze amezi make atangiye gusakara mu matwi ya benshi; ariko yigwijeho igikundiro mu buryo bukomeye.

Ni umusore w’impano itangaje! Kuva ku ndirimbo ya mbere yashyize hanze yise ‘Ubigenza Ute’ ubu ifite abayirebye basaga miliyoni imwe n’ibihumbi Magana ane, kugeza ku ndirimbo aheruka gushyira hanze; zose abantu bazireba amarira azenga mu maso.

Mu mezi arindwi amaze atangiye kumenyekana ntakibarizwa mu bahanzi bakizamuka nk’uko benshi bibagendekera, ahubwo ni umwe mu bitezweho byinshi mu muziki w’u Rwanda kandi byatangiye kwigaragaza ko azagera kure.

Ni umuhanga uhambaye! Iyo aririmbye indirimbo zigira inama abantu nta n’umwe utazumva, yagera mu rukundo byo bikaba akarusho.

Ntabwo ari umuhanga mu kuririmba gusa kuko no kwandika si agafu k’imvugwarimwe, byagera ku gukirigita imirya ya Guitar ho ushobora kuzitura mutavu wari ufite ari imwe, ukayimwihera.

Kugeza ubu amaze gukora indirimbo zirimo ‘Ubigenza Ute?’, ‘Ibanga’, ‘Ubumuntu’ ndetse na ‘Imbabazi’ yashyize hanze ku mugoroba wo kuri uyu wa Kabiri tariki 18 Kanama 2020.

Bitandukanye n’izindi ndirimbo yashyize hanze, iyi nshya yo ni iy’urukundo kandi yasamiwe hejuru kubera ubutumwa burimo.

Agaragara mu mashusho yayo yinginga umukobwa bakundanye kugira ngo yongere amugirire imbabazi, ubuzima bwabo bw’urukundo busubire nk’uko bwari bumeze mbere, buherere.

Hari aho aririmba ati “Njye ndemera amakosa yose nagukoreye nta mbereka, niyo mpamvu yanteye kuzinduka iya rubika, ku bw’urubanza ruhora rwisubira mu mutima wanjye kuko wanyimye amatwi. Gerageza wumve ko nanjye ari ibyangwiririye, twajyaga dusangira agahiye none tugeze ku kabisi urananiwe. Gira ibambe biganza bitajyaga bishira igaba.”

Akomeza abwira uyu mukobwa baba barakundanye ko yisubiyeho kandi yanamaze kwigaya. Akamusaba kwambara umwambaro w’imbabazi yajyaga amwereka. Ati “Ni ukuri umva ko nanjye ari ibyangwiririye.”

Mu bitekerezo byatanzwe kuri iyi ndirimbo ku rubuga rwa Youtube bisaga 240, benshi bafashwe n’amarangamutima, bavuga ko uyu musore afite impano ikomeye kandi ari mu bo ejo h’u Rwanda hazaba hashingiyeho.

Uwitwa Nick’5 Benjamin ati “Umbera mushya iteka! Komereza aho. Uje wari ukumbuwe. Kusanya imbaraga z’umutima utsinde inzigo.”

Nicol Nicol, yagize ati “Bosco, buri gihe ubikora neza byuzuye. Imana ikomeze iguhire muri byose ukomeze udusangize, kuko njye nkwigiraho byinshi.”

Uwitwa Kabayiza Willy ati “Indirimbo zawe zirandiza buri gihe kubera amagambo arimo n’ubuhanga uzikorana. Wabikoze neza na none, kandi komereza aho ntuzacike intege ufite ikintu kizahindura Isi.”

Undi we yagize ati “Turakwemera kandi cyane impano yawe nyagasani ajye ayagura buri munsi.” Eddy Fight Manzi 250 we ati “Uri impano Imana yihereye abanyarwanda komereza aho turagukunda Bosco.”

Masezerano Prosper nawe yavuze ko yumvise iyi ndirimbo amarira akazenga mu maso.

Niyo Bosco yavutse mu 2000 mu karere Nyamasheke ariko kuri ubu atuye mu Mujyi wa Kigali aho yimukiye n’umuryango we urimo abana umunani mu 2006.

Avuga ko kutabona yabitewe n’indwara ya malariya yarwaye afite imyaka ibiri bikarangira imusigiye ubumuga. Kenshi iyo uganira n’uyu musore akubwira ko adafite amakuru menshi ku buzima bwe kuko byinshi mu byo avuga yabibwiwe n’ababyeyi be.

Uyu musore ukiri muto avuga ko yagize amahirwe yo kwiga kugeza mu cyiciro rusange cy’amashuri yisumbuye, nyuma yo kurangiza umwaka wa gatatu w’amashuri yisumbuye mu 2019 yahise yifuza gukora umuziki ndetse anawiga. Kuri ubu yinjiye mu muziki ariko akaba anawihugura muri HVP Gatagara i Rwamagana.

Niyo Bosco avuga ko yagerageje kwivuza bikanga ndetse ngo yabwiwe ko nta cyahinduka ku buzima bwe n’iyo yakwivuza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .