Uko Element wari umuhanzi yinjiye mu gukora indirimbo kubera umujinya w’aba-producer bamusiragizaga

Yanditswe na Nsengiyumva Emmy
Kuya 25 Kanama 2020 saa 02:06
Yasuwe :
0 0

Mugisha Fred Robinson wamenyekanye cyane nka Producer Element, ni umwe mu bakora bakanatunganya indirimbo bagezweho muri iyi minsi bitewe n’izo yakoze ziri kubica bigacika.

Yakoze nyinshi mu ndirimbo zigezweho muri iki gihe nka; Henzapu ya Bruce Melodie, Kola ya The Ben, Kao ya Kevin Kade, Micro ya Davis D, Saa moya ya Bruce Melodie, Care ya Emmy, Ku mutima ya Uncle Austin, Mpa formula ya Juno Kizigenza n’izindi nyinshi.

Producer Element w’imyaka 20 nubwo amaze gukora indirimbo nyinshi ndetse zinagezweho, avuga ko gukora indirimbo atari ibintu yahoze atekereza ko azakora.

Nyuma yo kurangiza amashuri ategereje ibya kaminuza, Element yinjiye mu buhanzi. Nubwo yaririmbaga ariko yari anafite impano yo gucuranga akanakora imidundo ishyirwa mu ndirimbo.

Yaje kugira umujinya ukomeye nyuma yo gusiragizwa n’aba-producer yaganaga ngo bamukorere indirimbo, afata icyemezo cyo gutangira kwikorera umuziki.

Element wavukiye akanakurira i Karongi, urukundo rw’umuziki yararukuranye

Mugisha Fred Robinson cyangwa Producer Element, ni imfura mu muryango w’abana bane, yavukiye mu karere ka Karongi mu ntara y’Iburengerazuba.

Niho yize amashuri abanza ndetse no mu yisumbuye yigaga ariho ataha. Yarangije amashuri yisumbuye mu 2018 muri ‘MPC (Maths, Physics and Computer Science)’.

Urukundo rw’umuziki rwatangiriye muri korali aho yaririmbaga anacuranga piano ku myaka mike cyane.

Ageze mu mashuri yisumbuye nibwo asa n’uwamenye ko afite impano yo gukora umudundo w’indirimbo (Beat), ni nabwo yatangiye kuzikorera abanyeshuri b’inshuti ze babaga bari mu marushanwa mu kigo.

Ati “Byatangiye niga mu wa Gatatu w’ayisumbuye muri St André habaga amarushanwa yo kuririmba, ababaga bafite impano rero barazaga nkabakorera imidundo bagahatana hakagira n’abatsinda.”

Uku gukorera imiziki abanyeshuri byatumye uyu musore abona ko afite impano ariko atarasobanukirwa uko yayibyaza umusaruro.

Element yaje kuba umuhanzi

Nyuma yo kurangiza amashuri mu 2018, Element yaje kugana Country Records nk’umuhanzi ushaka gukoresha indirimbo.

Iki gihe Producer Iyzo yamukoreye indirimbo y’ubuntu kubera ko yari yakunze imiririmbire y’uyu musore.

Iyi ndirimbo yakoze ntabwo yigeze ayisohora, impano ye yari yakunzwe muri Country Records yatumye asabana n’ubuyobozi bwayo.

Usibye kuririmba byari byamujyanye, yanaberetse ubuhanga afite mu gucuranga no gukora imidundo y’indirimbo (Beat).

Nyuma yo gukora iyi ndirimbo, bakanakunda imiririmbire ye, Element yaje gutaha yisubirira i Karongi mu rugo.

Nyuma y’iminsi Nduwimana Jean Paul uzwi nka Noopja, Umuyobozi wa Country Records yaje gushaka uko yafasha umuhanzi mushya yari yabonyemo impano ikomeye.

Element waririmbaga Afrobeat yagarutse i Kigali yiyemeza gukora umuziki, mu mezi ane yakozemo indirimbo nyinshi icyakora zitarangiye.

Gusiragizwa kenshi mu ba producer batandukanye byatumye uyu musore wari ufite impano mu gukora no gutunganya indirimbo z’abahanzi afata icyemezo cyo kwinjira muri uyu mwuga.

Nguko uko yisanze abaye producer muri Country Records nyuma yo kumvikana n’umuyobozi mukuru w’iyi studio.

Mu 2019 nibwo Element yinjiye muri uyu mwuga.

Gutangira gukora indirimbo ntabwo byamworoheye

Mu 2019, Element avuga ko yakundaga kuba ari muri studio akora imidundo y’indirimbo zitandukanye ariko ataragira abahanzi akorera.

Nyuma yaje gufata icyemezo cyo guhamagara Bruce Melodie ngo amukorere indirimbo. Icyakora ntabwo uyu muhanzi yabashije guhita abyumva.

Ati “Nashatse nimero ndamuhamagara mubwira ko mfite ibintu nakoze kandi numvaga yakoramo indirimbo nziza, namusabye kuza yakumva abikunze tugakorana. Icyo gihe ntabwo yongeye kunsubiza bituma ntekereza ko yabisuzuguye.”

Bruce Melodie yaje kujya kureba uyu musore banahise bakorana indirimbo (Itarasohoka), imikoranire yabo itangirira aho.

Nubwo yari amaze gufatisha Bruce Melodie, Element yari atarakorera umuhanzi ukora injyana ya kinyafurika kandi ariwo muziki akunda. Yahisemo guhamagara Uncle Austin nawe bakorana indirimbo ya mbere gutyo.

Imana yafunguye imiryango ku buryo atabitekerezaga

Nyuma y’igihe kitageze ku mwaka atangiye gukora indirimbo z’abahanzi, kuri ubu akaba ari gukorana n’abahanzi bakomeye we asanga ari amahirwe akomeye yagize, ndetse ntanatinya guhamya ko ari Imana yamuhaye umugisha.

Ati “Byose ni Imana, navuga ko hari igihe iba yampaye umugisha, mu rugo natangiye batabyumva ariko ubu ntekereza ko bari mu bafana bakomeye mfite.”

Usibye gukorana n’abahanzi bakomeye bo mu Rwanda, Element kuri ubu muri studio afite indirimbo ari gukorana n’abahanzi bakomeye bo hanze y’u Rwanda nka Sheebah Karungi, Ykee Benda n’abandi benshi barimo n’abo muri Nigeria bakunze uko akora.

Mu gihe gito amaze akora umuziki asanga isomo yize ari uguha agaciro ikintu ukora.

Ati”Inama naha urubyiruko ni uguha agaciro ibyo bakora kuko byababyarira umusaruro.”

Urugendo rwa Producer Eelement mu muziki

Element nubwo akiri muto, akora ibikundwa na benshi
Element (wambaye isengeri y'umuhondo), The Ben na Noopja nyiri Country Records
Element na Pastor P, uyu musore impano ye yemewe na bagenzi be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .