Uko Ally Soudy yafashije Umuhire Rebecca wahatanye muri Miss Rwanda 2018 kwinjira mu itangazamakuru

Yanditswe na Nsengiyumva Emmy
Kuya 9 Kamena 2020 saa 02:03
Yasuwe :
0 0

Umuhire Rebecca ni umwe mu bakobwa biyamamazaga mu irushanwa rya Miss Rwanda 2018 icyakora utarabashije kugira ikamba yegukana nubwo yageze mu cyiciro cya nyuma cyaryo. Kugeza ubu yamaze kwinjira mu itangazamakuru aho ari gukora ibiganiro bimaze kubaka izina kuri Radiyo Isango Star.

Nubwo yinjiye mu itangazamakuru ariko ngo ntabwo zari inzozi ze yewe ntiyari yarigeze abitekerezaho.

Ati “Ubuse navuga ngo iki? Ni kwakundi uba utaramenya nk’ikintu ushaka cyangwa uzakora rwose kuko numvaga ibyo nize by’imibare n’Ubugenge ntazabikomeza ariko ntarabona ibindi najyamo.”

Ally Soudy niwe wamwinjije mu itangazamakuru ashimye cyane ijwi rye ubwo yasubizaga akanama nkemurampaka muri Miss Rwanda 2018.

Uyu mugabo wari mu biruhuko mu Rwanda yabyungukiyemo ahita anaba umuyobozi w’ibirori byo gutanga ikamba rya Miss Rwanda 2018.

Ubwo Umuhire Rebecca yasubizaga akanama nkemurampaka Ally Soudy yakozwe ku mutima n’ijwi rye ahita yiyemeza kumufasha kwinjira mu itangazamakuru.

Umuhire ati “Nyuma yaje kunyandikira ambwira ko mfite ijwi ryiza mbishatse navamo umunyamakuru mwiza, yansabye ko yamfasha anjyana ku Isango gutyo muri Mata 2018 nari ntangiye kwimenyereza umwuga.”

Umuhire utari ufite amahitamo menshi yisanze amaze umwaka kuri radiyo Isango Star ari mu igerageza icyakora ubu yamaze guhabwa akazi.

Usibye kuba yarahise yinjira mu itangazamakuru, yanahise afata icyemezo kuri ubu akaba yaratangiye kwiga itangazamakuru, aho icyorezo cya Covid-19 cyasanze ari gusoza umwaka wa kabiri.

Umuhire Rebecca ufite ijwi rikundwa cyane n’abakurikira ibiganiro bya Isango Star azwi mu biganiro nka; “Isango na muzika” na “Isango relax time”.

Yavuze ko gukora ibiganiro nk’ibi bikomeye kandi byagiye bikundwa ari iby’agaciro kuri we cyane ko aba yicaye kuri micro zanyuzeho abandi banyamakuru b’amazina akomeye mu Rwanda.

Isango relax time yanyuzemo abanyamakuru; Sandrine Isheja, Aissa Cyiza, Antoinette Niyongira n’abandi bamenyekanye cyane mu gihe Isango na muzika yo yanyuzemo Ally Soudy, Phil Peter n’abandi benshi bakomeye.

Ikiganiro na Umuhire Rebecca

Ally Soudy yanyuze ku Isango Star aho yanajyanye Umuhire Rebecca
Umuhire Rebecca asigaye akora mu biganiro bikomeye ku Isango Star
Umuhire Rebecca yiyamamaje muri Miss Rwanda 2018
Ubwo yasubizaga abagize akanama nkemurampaka, ijwi rye ryakoze ku mutima Ally Soudy ahita avumbura impano uyu mukobwa afite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .