00:00:00 IGIHE NETWORK KN KINYARWANDA EN ENGLISH FR FRANCAIS

Udushya twaranze igitaramo cy’urwenya ‘Iwacu Comedy Show’ (Amafoto)

Yanditswe na Mahoro Vainqueur
Kuya 7 Ugushyingo 2022 saa 11:29
Yasuwe :

Igitaramo cy’urwenya ‘Iwacu Comedy Show’ cyabaye ku nshuro ya mbere mu Rwanda kikabera mu mahema ya Camp Kigali kuri iki cyumweru, cyaranzwe n’udushya twinshi.

Iki gitaramo cyateguwe n’abanyarwenya bahuriye mu itsinda rya Zuby Comedy cyari kiyobowe na Clapton Kibonge afatanyije na Miss Uwase Muyango.

Ni igitaramo cyari cyatumiwemo umunyarwenya MC Tricky n’itsinda rya Kanyamukwengo bose bo muri Kenya baje biyongera kuri Bamenya, Rusine Patrick, Fally Merci, Muhinde Comedy, Zuby Comedy , Nyambo , Killer man , Mirembe Jane n’abandi.

Udushya twaranze iki gitaramo

DJ Bissoso wacuranze muri iki gitaramo kubera imbeho yari mu mujyi wa Kigali yari yizaniye icyayi na chapati acuranga anasoma ku cyayi ari nako asangira na bamwe mu bari bitabiraiye iki gitaramo.

Dj Bisosso yageze hagati abonye chapati zimushiranye agira icyo asaba abari mu gitaramo. Ati“Niba mutari abapagani hagire umuntu uza hano avugane na Nyagasani atubure izi chapati ndabona hano hari benshi bazikeneye.”

Clapton Kibonge wari uyoboye iki gitaramo yaherewemo amafaranga menshi, yateye urwenya avuga ko yaje guhembesha kuko yabyaye bakamuhemba ‘likes’ gusa.

Ati “Bya bintu birimo akantu we, ntabwo ndi gusabiriza man, ndi guhembesha narabyaye mumpa likes gusa no kureba amafoto yanjye gusa.”

Yakomeje atera urwenya avuga ko abakobwa bakunda abasore bananutse kuko aribo bashoboye gufata neza abagore no kubashimisha.

Umunyarwenya Fally Merci wiyita umwana wo mu batambyi yatangiye asoma ijambo ry’Imana riri muri Ezekeiyeli 4:15. Haragira hati "Maze arambwira ati dore amabyi y’abantu nyagukuyeho, nguhaye ibisheshe by’amase y’inka uzabe ari byo utekesha ibyo kurya byawe.”.

Seth wo muri Zuby Comedy, Nyabitanga, Bamenya, Killer man , Nyambo bakinnye umukino wa Miss Mulenge usanzwe umenyerewe kuri Zuby Comedy.

Muri iyi kinamico bakinnye, Bamenya yakinnye ari umwarimu wateye inda umunyeshuri we (Nyabitanga) nyuma akajya kwitabira irushanwa rya Miss Mulenge riyobowe na Killer man na Seth.

Umunyarwenya Rusine Patrick wishimiwe cyane muri iki gitaramo yinjiye abyina nk’uko asanzwe abigenza yanzika agira ati “ Iyo umaze gukora igitaramo cyawe rero iyo ugeze ahantu nkaha ntabwo wigora cyane, Bissoso rata hari ubwo ucyivuna cyane, uzabiharire ba Dj Marnaud.”

Yagarutse kuri Aline Gahongayire amubaza uko yaririmbye indirimbo igihumbi kandi mu mwaka akora album imwe, ati “Keretse niba warashyizemo n’izo mu gitabo.”

Rusine yagarutse kuri Muyoboke Alex amubaza impamvu acyicaye i Kigali kandi abahanzi yakoranye na bo bamaze iminsi bazenguruka hirya no hino ku Isi bakora ibitaramo hanze y’u Rwanda.

Samu, umwe mu bagize itsinda rya Zuby Comedy yasabye umuhanzikazi Aline Gahongayire kuzakorana indirimbo n’umuraperi Bushali.

Bushali wari muri iki gitaramo aherekejwe na Madamu we ndetse n’umwana wabo bishimiwe cyane kugeza ubwo babasabye kuza imbere bagasuhuza abari bateraniye muri Camp Kigali.

Umunyarwenya Samu yabajije umubyeyi we impamvu yicaye mu myanya y’abishyuye amafaranga make kandi yamuhaye itike yo mu myanya y’icyubahiro.

Ati “Mumwihanganire ni ubwa mbere agiye mu bitaramo nk’ibi , ariko ubundi Mama wahoraga unseka ngo ibi bintu byacu ntakigenda none wishyuye uza kundeba.”

MC Tricky wari umushyitsi mukuru muri iki gitaramo yinjiye ku rubyiniro hasigaye iminota mike ngo igitaramo kirangire mu mwanya muto yari afite yateye urwenya avuga uko yatunguwe n’ubwiza bw’abakobwa b’i Kigali.

MC Tricky yahamagaye Natacha Ndahiro ukina filime abaza abagabo bari muri iki gitaramo ukuntu babayeho babona umukobwa nk’uyu muri Kigali.

Uyu munyarwenya uri mu bakunzwe muri Kenya, yatunguwe n’imyitwarire yabonanye abapolisi bo mu Rwanda.

Ati “Nkigera aha nabonye umupolisi wambaye neza na hano barahari , bakwakira bagusekera bakwereka aho unyura ,mbega ibintu byiza! Ni yo mpamvu abanya-Kenya iyo mugeze inaha mudataha sha.”

Iki gitaramo cyasojwe no kwizihiza isabakuru y’amavuko ya Seth umwe mu bagize itsinda rya Zuby Comedy.

Byagorana kuva muri iki gitaramo udasetse
Bushali n'umuhungu we basabwe gusuhuza abari bateraniye muri Camp Kigali
Bushali asuhuza abari bitabiriye iki gitaramo
Biba bigoye kugera mu gitaramo nk'iki ukavamo udasetse
Bamenya na Nyabitanga banyuze benshi muri iki gitaramo
Bamenya yakinnye atereta Nyabitanga wakinnye ari umunyeshuri we
Aline Gahongayire yitabiriye iki gitaramo aterwaho urwenya
Aline Gahongayire yagarutsweho cyane bamusaba gukorana indirimbo na Bushali
Akanyamuneza kari kose ku babashije kwitabira iki gitaramo
Fally Merci yatangiye abwiriza abari bateraniye muri Camp Kigali
DJ Bissoso yashimishije benshi
DJ Bissoso yacuranze yinywera icyayi
Dj Bissoso yasangiye chapati na bamwe mu bitabiriye iki gitaramo
DJ Bissoso yasekeje benshi asaba ko hagira utubura icyayi na chapati yari yazanye kuko byari bikenewe na benshi
Clapton Kibonge yakira amafaranga bamuhaga akabyita guhembesha nyuma yo kubyara
Kibonge yakiriye amafaranga menshi muri iki gitaramo
Byari bigoye kwihanganira urwenya rwari muri iki gitaramo
Itsinda rya Kanyamukwego ryishimiwe cyane
Killer man na Seth wo muri Zuby Comedy batera urwenya
Inkweto umunyarwenya Fally Merci yaserukanye
Fally Merci yanyuze benshi muri iki gitaramo
Rusine wishimiwe cyane muri iki gitaramo yishimira amafaranga yahawe
Nyambo ni uku yaserutse
Nyaxo nawe yari yaje gushyigikira bagenzi be
Muri iki gitaramo hakiniwemo umukino wa Miss Mulenge
Miss Uwase Muyango yari ayoboye iki gitaramo
MC Tricky yatunguwe n'ubwiza bw'abakobwa b'i Kigali
Muyoboke Alex yagarutsweho cyane muri iki gitaramo
MC Tricky wari umushyitsi mukuru muri iki gitaramo ni gutya yinjiye ku rubyiniro
Killer man yishimiwe cyane
Umunyarwenya Mitsutsu yari yaje gushyigikira bagenzi be
Umukinnyi wa filimi Pattyno yari yaje gushyigikira bagenzi be
Umuhanzi Mani Martin mu bitabiriye iki gitaramo cy'urwenya

Amafoto: Prince Munyakuri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .