Ubuzima bushariye Sonia Rolland yabayemo mu Bufaransa avuye mu Rwanda

Yanditswe na Muhonzire Sylvine
Kuya 6 Werurwe 2021 saa 05:21
Yasuwe :
0 0

Sonia Rolland wavutse ku mubyeyi w’umunyarwandakazi n’umufaransa, akaza kuba Nyampinga w’u Bufaransa mu 2000, yagarutse ku byaranze ubuzima bwe akiri umwana avuga ko byamutonze kujya kuba mu buzima buciriritse mu Bufaransa avuye mu bwiza yari abayemo mu Rwanda.

Yabivugiye mu kiganiro yagiranye na Radio Europe 1 ikorera mu Bufaransa, aho yavuze ko umuryango we wimukiye mu Bufaransa uhunze Jenoside yakorewe Abatutsi mu 1994, afite imyaka 13.

Sonia yatumiwe mu kiganiro nk’umwe mu bakinnyi ba filime yitwa ‘Tropiques Criminels’ itambuka kuri televiziyo yo mu Bufaransa France 2, aho akina ari umupolisi ukomoka mu kirwa cya Martinique.

Mu kiganiro yagarutse ku buzima bwe umuryango we utarajya gutura mu Mujyi wa Bourgogne, avuga ko byamutonze cyane kuva mu Rwanda akajya kuba mu buhungiro, mu gihugu kibamo abazungu gusa nta mwirabura ndetse akabaho ubuzima buciriritse ugereranyije nubwo yari abayemo.

Ati “Twari dufite inzu nini nziza, ubusitani, n’abakozi bo mu rugo benshi (babiri bari abo mu rugo n’abakoraga mu busitani batatu).”

Yakomeje avuga ko bageze mu Bufaransa nyina yabonye akazi muri supermarché, se ahita akora akazi gaciriritse kandi yari afite ikinyamakuru kinini mu Rwanda cyandika.

Ati “Kubaho mu buzima buciritse byaradutonze cyane. Bwari ubuzima bwo mu buhingiro, ariko ubuhungiro navuga ko bwari bwiza kuko nari nzi Igifaransa, nzi n’umuco w’Abafaransa ho gake ariko uburyo babaho ntabwo nari mbizi na gato.”

“Nta birabura bari bahari, nitwe muryango wonyine w’abirabura wari uhari. Iyo najyaga ku ishuri bambazaga ibibazo bibi. Rimwe na rimwe bakambaza niba iwacu twarabaga muri nyakatsi muri Afurika.”

Sonia Rolland avuga ko bitamutunguraga cyane kuko yari azi uburyo abazungu bafata Afurika. Gusa ageze mu marushanwa ya Nyampinga mu Bufaransa yahuye n’ibibazo by’ivangura cyane ku buryo yakirirye amabaruwa 2700 amutuka anamuca intege, ariko ko ari umunyamahirwe kuba yarabaye Miss w’u Bufaransa imbuga nkoranyambaga zitaraza.

Ati “Ibyo byose byubatse umuntu uzi kwihangana.”

Nyuma y’uko abaye Miss w’u Bufaransa mu 2000, Sonia yahise agana umwuga wo gukina filimi yatangiye mu 2001, ndetse kugeza ubu amaze gukina mu zirenga 20.

Yavuze ko umuryango ukigera mu Bufaransa, ubuzima bwabashaririye kubera ko bari babayeho neza mu Rwanda
Sonia Rolland yabaye Nyampinga w'u Bufaransa mu 2000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .