Iyi nama iri kubera mu Bushinwa kuva ku wa 27 Kanama kugeza ku wa 9 Nzeri 2026, ni urubuga rwo guhuza abahanzi, abayobozi n’abakora mu nzego z’umuco n’inganda ndangamuco baturutse mu bihugu bitandukanye.

U Rwanda ruhagarariwe muri iyi nama na Niragire France, Umuyobozi w’Inama y’Igihugu y’Abahanzi, hamwe n’umubitsi wayo, Rwagasana Braddock Le Sage, unashinzwe gushakira Inama y’Igihugu y’Abahanzi ubushobozi.

Uretse abahagarariye u Rwanda, abandi bitabiriye iyi nama baturuka mu bihugu bitandukanye birimo Kenya, Ethiopia, Zimbabwe, Afurika y’Epfo, Cape Verde, Pakistan, Iraq na Barbados, ndetse n’ibindi.

Iyi nama iri kwibanda ku kurebera hamwe uko ubuhanzi bushobora gutezwa imbere hifashishijwe ibishya, ikoranabuhanga n’imicungire inoze, ndetse n’uko ibihugu byasangira ubunararibonye mu kubungabunga umuco no kuwugeza ku ruhando mpuzamahanga.

Hazarebwa kandi uburyo umurage ndangamuco, ubuhanzi gakondo n’ubuhanzi bugezweho bishobora guhuzwa, bikabyara ibihangano bishya kandi bigatanga umusanzu mu iterambere ry’ubukungu bw’ibihugu.

Abitabiriye iyi nama bafite kandi amahirwe yo kumenya uburyo u Bushinwa bukoresha ikoranabuhanga mu kubungabunga umurage ndangamuco no guteza imbere inganda ndangamuco, ndetse no gusangira ubunararibonye n’abandi bitabiriye iyi nama.
Muri rusange, iyi nama ni umwanya wo gushimangira ubufatanye hagati y’ibihugu mu guteza imbere ubuhanzi, umuco n’inganda ndangamuco, hibandwa ku guhanga udushya no gukoresha ikoranabuhanga mu kubungabunga no guteza imbere umurage w’ibihugu.

Niragire France ni umwe mu bahagarariye u Rwanda muri iyi nama

Ni inama yitabiriwe n'ibihugu byinshi

Niragire France yatanze ikiganiro muri iyi nama

Nyuma y'iyi nama abayitabiriye bafatanye amafoto y'urwibutso