00:00:00 IGIHE NETWORK KN KINYARWANDA EN ENGLISH FR FRANCAIS

Ubuhamya bw’umugore wa Clapton Kibonge wacunagujwe azira gushaka umusore ukennye

Yanditswe na Peacemaker Pundit
Kuya 27 May 2024 saa 10:05
Yasuwe :

Ntambara Jacky yahishuye ibibazo yanyuzemo birimo kuba inshuti ze n’abo biganye barahoraga bamubaza impamvu yemeye gushakana na Mugisha Emmanuel uzwi nka Clapton Kibonge muri sinema nyarwanda, kuko yari akennye cyane muri icyo gihe.

Mu ijoro ryo ku itariki 25 Gicurasi 2024 inshuti n’umuryango wa Clapton Kibonge na Ntambara Jacky barasangiye, barasenga kandi bashima Imana ku bw’ibitangaza yakoreye uyu munyarwenya wamamaye muri sinema y’u Rwanda nyuma yo gukira indwara yari yafashe imyanya y’ubuhumekero.

Ntambara Jacky, umugore wa Clapton Kibonge yatanze ubuhamya bwuzuye agahinda burimo inzira ndende banyuzemo bava mu bukene kugeza babashije kubaka inzu, kugura imodoka n’ibindi.

Mu kubara inkuru y’urushako rwe, Ntamara wanyuzagamo agasuka amarira, yavuze ko yashatse afite imyaka 22 y’amavuko.

Ati “Benshi mu nshuti zanjye bahoraga bambwira ngo kuki washatse umugabo w’umukene kandi uhora arwaye? Nanjye nkihangana kuko nari narafashe icyemezo. Uyu mugabo wanjye mureba yabayeho atarya, atanywa atunzwe n’imiti, yari umukene bikabije.”

“Ndibuka rimwe yigeze kuremba ari mu gicuku, twari dufite ibihumbi bitanu by’amafaranga y’u Rwanda mu rugo, nahamagaye inshuti yanjye ngo indwaneho tujye kwa muganga. Ubundi iyo habaga ikibazo niyambazaga inshuti zanjye kuko twe nta kintu twari dufite. Ababyeyi be bajyaga bohereza ibitoki, ibishyimbo bikadutunga kuko ubuzima bwari bugoye”

Ntambara Jacky yavuze ko imfura yabo ariyo yazanye umugisha ubuzima butangira guhinduka.

Ati “Nahuye na Kibonge muri Mata 2014, dushakana muri Kanama 2018. Imfura yacu ni Mugisha Nella Oriane, akivuka mu rugo habayeho impinduka ku bijyanye n’ubutunzi ariko hasigara ikibazo cy’uburwayi. Umugabo wanjye yari afite uburwayi ku buryo yari afite ibikomere. Sinigeze mubaza indwara arwaye ariko nawe ntiyigeze ansobanurira.”

“Yararaga akorora ijoro ryose ku buryo hari inshuti zanjye zambwira ngo uzicuza kuba warashatse umukene w’umurwayi.”

Clapton Kibonge yabwiye IGIHE ko umugore we yamwihanganiye kuko iyo ashaka yari kwigendera ariko Imana yamubaye hafi aramurwaza kugeza akize.

Ati “Njyewe nari umukene kandi ndwaye, uzi ko hari umugabo wancumbikiye yambwiraga kujya kwikodeshereza akangurira ishuka kuko nta bushobozi nari mfite. Rero Imana yarahabaye ubu nubatse inzu, mfite abana batatu ni ukuri ndi umuhamya w’uko Imana iriho.”

Ntambara yavuze ko nyuma yo gushakana na Clapton Kibonge yacunagujwe n'inshuti ze zimushinja gushaka umusore w'umukene
Clapton Kibonge yahaye umugore we imodoka
Clapton Kibonge n'umugore we bamaze kubyarana abana batatu
Imodoka yo mu bwoko bwa Hyundai Tucson niyo Clapton Kibonge yahaye umugore we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .