Kayiranga Benjamin , umuhanzi akaba n’umutekinisiye nyarwanda ukorera mu Bufaransa yahawe umudali w’icyubahiro ku bw’uruhare yagize mu kwita ku miyoboro y’amashanyarazi mu myaka 20 amaze akora uyu mwuga.
Mu kiganiro Ben Kayiranga yagiranye na IGIHE yadutangarije ko iri shimwe yarihawe kubera ubwitange yagaragaje mu myaka 20 amaze akora umwuga w’ubutekinisiye mu kubungabunga no kwita ku miyoboro y’amashanyarazi mu bigo by’uburezi.
Ati “Uyu mudali utangwa na Minisiteri y’Umutekano mu Bufaransa. Nawuhawe nk’umutekinisiye , mu rwego rwo kunshimira ko maze imyaka 20 mbakorera. Maze iyi myaka nkorera Leta mu cyiciro cy’uburezi bw’ amashuri ya leta aho nshinzwe sécurité na installations électriques na réseaux informatiques(umutekano w’insinga z’amashanyarazi).”
Umuyobozi wa Ben Kayiranga mu by’amashanyarazi akimugezaho iyi nkuru y’uko Minisiteri yamugeneye ishimwe, ibyishimo byaramurenze bimutera imbaduko yo gushora izi mbaraga n’ubumenyi afite mu Rwanda kugira ngo umutekano w’insinga z’amashanyarazi urusheho kuba mwiza ndetse n’inkongi za hato na hato zivugutirwe umuti uhamye.
Ati “Mu Rwanda naho umutekano w’insinga z’amashanyarazi urakenewe. Mbirimo, umwaka ushize nandikishije ikompanyi yanjye ibikora muri RDB . Ubu mfite ibyemezo byo gutanga izo services mu Rwanda.”
Umuhanzi Kayiranga Benjamin wamamaye cyane mu muzika ku izina rya Ben Kayiranga, ahawe iri shimwe nyuma y’amezi make asezeranye imbere y’amategeko ndetse akaba yitegura gusezerana imbere y’Imana. Ben Kayiranga na Uwizeyimana Josephine basezeranye imbere y’amategeko ku itariki ya 18 Nyakanga 2014, muri Nyakanga 2015 nibwo bazasezeranira imbere ya Pasiteri mu Bufaransa ari naho basigaye babana.
Ati, “Ubukwe buzabera inaha, tuzaca imbere ya Pasiteri mu kwezi kwa karindwi .Mu muziki ndabona album ‘Ntunsige’ nakoranye na Pastor P igiye kubona inzira yokugera ku bakunzi banjye binyuze kuri internet. Ikindi ni uko nishimiye indirimbo ya Gospel nakoranye na Serge Iyamuremye , amashusho yakozwe na Davido nayo yarangiye.”
TANGA IGITEKEREZO