Ni igitaramo uyu munyarwenya yakoranye n’abo mu Rwanda basanzwe bamenyerewe muri ibi bitaramo, ari na bo babanje gususurutsa abitabiriye Gen-Z Comedy.

Mu babimburiye Teacher Mpamire harimo Jonathan, Biden Seka, Eric w’i Rutsiro, Isacal, Ishimwe Joseph, Rumi, Kaduhire Kadudu na Dudu.

Nyuma y’uko aba banyarwenya banyuze imbere y’abakunzi b’ibi bitaramo, Fally Merci usanzwe abitegura yahise yakira MC Murenzi wagize umwanya wo kuganiriza urubyiruko rwitabiriye iki gitaramo.

Uretse kunyura mu rugendo rwe mu bijyanye n’itangazamakuru yamamayemo mbere yo kwerekeza muri Amerika, MC Murenzi yanagarutse ku myiteguro ya Kigali Street Ball ari gutegura mu Mujyi wa Kigali ku wa 19-20 Nyakanga 2025.

Nyuma ya MC Murenzi, Teacher Mpamire yahise ajya ku rubyiniro atangira gususurutsa abakunzi be mu mukino akina yigize umwarimu.

Ni umukino aba yakoze nk’umwarimu uri mu ishuri mu gihe abitabiriye igitaramo aribo aba akoresha nk’abanyeshuri ubundi si ugutera urwenya akivayo.

Nyuma y’uyu mugabo uturuka muri Uganda, hakurikiyeho umunyarwenya Pirate umaze gushyira izina rye ku rwego rwo hejuru, ashimisha abari bitabiriye Gen-Z Comedy.

Teacher Mpamire uzwiho no gukina yigana Perezida Museveni, yongeye gusubira ku rubyiniro akina uyu mukino washimishije abatari bake.

Iki gitaramo cyapfundikiwe na Umushumba, umwe mu banyarwenya bamaze gushyira izina rye ku rundi rwego mu bijyanye no gusetsa.

Benshi mu bitabiriye iki gitaramo bifuzaga gutahana amashusho ya Teacher Mpamire

Teacher Mpamire yabanje gukina nk'umwarimu uri mu ishuri

MC Murenzi yaganirije abitabiriye iki gitaramo kuri 'Kigali Streetball igiye kongera kuba nyuma y'imyaka 18 idategurwa

Teacher Mpamire akina yigana Perezida Museveni bigashimisha abatari bake

Teacher Mpamire yasekeje abatari bake bitabiriye iki gitaramo

Ubwo yari avuye ku rubyiniro, Teacher Mpamire yari yishimiwe bikomeye