Sentore na babyara be bahuriye mu ndirimbo ifite amashusho y’udushya

Yanditswe na Munyengabe Murungi Sabin
Kuya 31 Kanama 2018 saa 08:58
Yasuwe :
0 0

Sentore Jules na babyara be Ruti Joel na King Bayo basohoye amashusho y’indirimbo ‘Diarabi’ bahuriyemo ifite amashusho arimo udushya yanafashwe mu buryo bw’umwihariko.

’Diarabi’, ni ijambo rivuga ’umukunzi’. Iri rizwi cyane mu rurimi rwa Bambara rukoreshwa na 80% by’abaturage ba Mali by’umwihariko mu gice cyo hagati no mu Majyepfo y’igihugu.

Aba uko ari batatu, Jules Sentore, Ruti Joel ndetse na King Bayo bakora umuziki wa Gakondo bakanahuza isano y’amaraso nk’abuzukuru ba Sentore Athanase bose bakomoraho inganzo.

Sentore arambye mu muziki, Ruti na we afite ijwi ryumvikanamo ubuhanga ndetse mu gihe gito amaze aririmba inganzo ye yakirijwe yombi. King Bayo[ubusanzwe witwa Ishimwe Soumare Frank] we ni mushya mu muziki ndetse akaba atuye muri Mali aho yize.

Mu kiganiro na IGIHE, Jules Sentore yavuze ko bakoranye iyi ndirimbo ku gitekerezo cyazanwe na King Bayo bagenzi be baragishima bemeranya gufatanya nk’abavandimwe.

Ati “Icyaduteye ingufu zo gukorana indirimbo, icya mbere ni ubuvandimwe dufitanye. Twayikoze ku gitekerezo cyazanwe na King Bayo we asanzwe aba muri Mali, yifuzaga ko yasubirayo hagize icyo dukorana, twari turi mu rugo duhita dufata icyemezo tujya muri studio kwa Madebeat, turayikora irarangira.”

Yongeyeho ati “Amashusho twayafashe turi mu rugendo kuva hano Kigali tugana i Rubavu, twari tugiye gutembera ariko ni no mu rwego rwo kwerekana ibyiza biri mu Rwanda, aho hose mubona mu mashusho y’indirimbo ni aho twagiye duca.”

Muri iyi ndirimbo, aba bahanzi bashyizemo ubwiganze bw’imbyino gakondo nk’umushayayo no guhamiriza kw’intore, by’akarusho ubutumwa bw’urukundo bavugamo bukinwa n’abana bato mu buryo bukurura imbamutima z’ureba amashusho.

Sentore Jules, ubwo yari mu ifatwa ry'amashusho y'iyi ndirimbo

Muri iyi ndirimbo, aba bahanzi uko ari batatu bagaragaramo bari mu modoka mu rugendo Kigali-Rubavu. Iyo bageze kuri Nyirangarama bakora agashya bakajya ku cyokezo bakotsa inyama mu buryo ubona ko babiteguye igihe kinini.

Sentore avuga ko mu gufata amashusho, “Twari turi mu bihe by’ubukonje, twageze i Rubavu dusanga hari imvura ikomeye cyane. Ikintu cyatugoye ni ubukonje bwari buhari”.

Ruti Joel, umwe mu buzukuru ba Sentore ufite ubuhanga mu muziki wa gakondo
King Bayo we asanzwe atuye muri Mali ari naho yize amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza