Senderi Hit na Intore Tuyisenge basohoye indirimbo bakoze mu rurimi rw’Ikirashi

Yanditswe na Hakizimana Jean Paul
Kuya 25 Gashyantare 2020 saa 01:51
Yasuwe :
0 0

Abahanzi babiri bavuka mu Karere ka Kirehe aribo Senderi Hit na Intore Tuyisenge basohoye indirimbo iririmbwe mu rurimi shami ruzwi nk’Ikirashi mu rwego rwo kumenyekanisha uru rurimi banarurinda kuzimira.

Iyi ndirimbo bayisohoye kuri uyu wa Gatanu tariki 21Gashyantare 2020 ubwo hizihizwaga umunsi mpuzamahanga w’ururimi kavukire. Uyu munsi ukaba warizihirijwe mu Karere ka Kirehe ahahawe umwanya ururimi shami rw’ikinyarwanda rukoreshwa na bamwe mu baturage bo mu Karere ka Kirehe ruzwi nk’Ikirashi.

Abaturage bakoresha uru rurimi bahawe umwanya baganira banabyina imbyino zitandukanye ziririmbwe muri uru rurimi rw’ururashi. Abaturage bahimbawe cyane nyuma yo kumva ko abahanzi babiri bakomoka muri aka Karere babakoreye indirimbo bise Ikirashi aho bafatanyije nabo mu kuyibyina.

Senderi yavuze ko iyi ndirimbo bayikoze bagira ngo bashimire leta ku iterambere imaze kugeza ku baturage bavuga ikirashi.

Yagize ati “Mbere 1994 abaturage bavuga Ikirashi bari babayeho nabi bamwe barwaye imvunja ibirenge bikitambika none ubu batujwe mu midugudu bahabwa agaciro ntabwo bakibayeho nka mbere.”

Yongeyeho ati “Ikindi twayikoze kubera uyu munsi mpuzamahanga w’ururimi kavukire kugira ngo abantu bareke kwibagirwa indimi zacu gakondo.”

Yavuze ko gufata amafaranga yabo bakayasohoramo indirimbo ari ukugira ngo bakomeze guteza imbere uru rurimi kugira ngo rwoye kuzima ahubwo abantu bakomeze baruvuge.

Intore Tuyisenge we yavuze ko bakimara kumenya ko uyu munsi mpuzamahanga uzizihirizwa mu Karere ka Kirehe barebye umusanzu batanga bagasanga bakwiye gukora indirimbo ishishikariza abantu gukomeza kwibuka ururimi rw’Ikirashi.

Ati “Iyo ururimi rutabungabunzwe rurazimira, njye na Senderi twahisemo rero gukora iyi ndirimbo kugira ngo turusigasire. Iyo tuvuze Ikirashi bimfasha kwibuka abakurambere bacu muri aka Karere tuvukamo kuko nirwo bavugaga nubwo twe tutagize amahirwe yo kurumenya neza.”

Tuyisenge yavuze ko bagiye kongera imbaraga mu kurusakaza kugira ngo rumenyekane cyane. Yavuze ko kuri ubu inyinshi mu ndirimbo ze azajya agerageza agashyiramo amagambo make y’ururimi rw’Ikirashi.

Abakuze bakoresha ururimi rw’Ikirashi bafite agahinda baterwa nuko abato batagishaka kurumenya ngo kuko ku ishuri batarukoresha bakibaza uburyo nibasaza ruzakendera bikabababaza.

IGIHE yaganiriye na bamwe mu barukoresha batubwira amagambo amwe namwe n’ibisobanuro byayo mu Kinyarwanda.

Gusuhuzanya mu Kirashi iyo ari mu gitondo bakoresha ‘Murayire ge, haba hacyeye bagakoresha ‘Aganda’ cyangwa ‘Musibire ge’ kubwira umuntu uti “Amakuru ki uvuga Agandi shi, Mwiriwe mute bavuga Mwasiba kurungi. Iyo ushaka kubwira umuntu uti uvuye he bakoresha Waruga hi, muryoherwe ni Munuriwe.

Ibice by’umubiri nk’izuru ryitwa Enyindo, ukutwi ni ugutwi, irisho ni ijisho, urutoki rw’insina ni Engemu, amasaka yitwa umugusha, amashaza akitwa ubushaza, ibishyimbo byitwa ibiharage, ibitoki ni ibitiki ihene ni Embuzi, inka ni Ente.

Akanyamuneza kari kose ku baturage ubwo Senderi na Tuyisenge baririmbaga indirimbo y'Ikirashi
Byari ibyishimo ku bumvaga uru rurimi
Senderi Hit
Intore Tuyisenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza