00:00:00 IGIHE NETWORK KN KINYARWANDA EN ENGLISH FR FRANCAIS

SEKA Fest igarukanye ibyamamare mu bitaramo by’iminsi ibiri

Yanditswe na Mahoro Vainqueur
Kuya 12 Ugushyingo 2022 saa 08:55
Yasuwe :

Nyuma y’imyaka ibiri iserukiramuco ry’urwenya rya Seka Fest ritaba ku mpamvu za Covid-19, uyu mwaka rigarukanye udushya n’abanyarwenya barenga bane bakomeye ku mugabane wa Afurika.

Muri iri serukiramuco hatumiwe Loyiso Gola w’imyaka 39 na Celeste Ntuli w’imyaka 44 abanyarwenya bakomoka muri Afurika y’Epfo ubu batuye mu Bwongereza bagiye gutaramira mu Rwanda ku nshuro ya mbere.

Aba banyarwenya bafite izina rikomeye muri Afurika biteganyije ko bazafatanya n’abarimo Kigingi w’i Burundi, Salvado bo muri Uganda n’abandi bataratangazwa.

Abanyarwenya bo mu Rwanda bazasusurutsa abaturarwanda muri iri serukiramuco kugeza ubu nabo ntibaramenyekana.

Uyu mwaka SEKA Fest izaba ku wa 3 Ukuboza 2022, mu bitaramo bizabera muri Bus, ku mugoroba habe igitaramo cy’abanyarwenya muri Kigali Convention Center.

Ku munsi ukurikiyeho ku wa 4 Ukuboza 2022, hazaba igitaramo cy’aba banyarwenya bakuru muri Kigali Convention Center, n’ibitaramo bizayoborwa na Arthur Nkusi.

Loyiso Gola na Celeste Ntuli baherutse gutaramira mu gihugu cya Uganda mu kwezi ku Ukwakira muri Africa Laughs yabaga ku nshuro ya 6.

Bimwe mubyo wamenya kuri Loyiso Gola na Celeste Ntuli bagiye gutaramira i Kigali bwa mbere

Loyiso Gola

Loyiso Gola izina ribanza ‘Layiso’ ni izina rikomoka mu rurimi rwa ‘Xhosa’ risobanura ‘Gutsinda’.

Ni umunyarwenya wabigize umwuga, mu 2010 yashinze ikiganiro cy’urwenya gica kuri televiziyo mu masaha y’ijoro yise ‘Late Nite News with Loyiso Gola’.

Niwe munyarwenya wa mbere wo muri Afurika ufite ikiganiro cy’urwenya cy’isaha imwe gica ku rubuga rwa Netflix.

Ku myaka 19 yatsinze amarushanwa y’urwenya Sprite Soul Comedy ndetse aba uwa kabiri mu rindi rushanwa ry’abanyarwenya rya Freshest Five Comedy ryabereye i Johannesburg.

Yakoze ibitaramo bye bwite (One Man Show) bigera kuri birindwi kuva mu 2006.

Ni umunyarwenya ubifatanya no gukina filime, umwuga yatangiye mu 2006, amaze kugaragara muri 4 zirimo ; Bunny Chow Know Thyself , Outrageous, Copposites , Catching Feelings.

Afite ibihembo bitandukanye birimo ; Sprite Soul Comedy Tour yegukanye mu 2002 , South African Comedy Award yatwaye mu 2007 na The Savanna SA Comic’s Choice Award yegukanye mu 2014.

Ikiganiro cya mbere cy’urwenya yakoze kuri televiziyo cyabaye mu 2002 cyitwaga Phat Joe Live talk show gica kuri SABC 1.

Celeste Ntuli

Celeste Ntuli bakunze gutazira ‘Queen of the Zulu Comedy’ avuka i Empangeni, ni umwana wa gatandatu mu bana umunani.

Ni umunyarwenya ubifatanya no gukina filime, mu 2005 nibwo yatangiye gutera urwenya akora igitaramo cye cya mbere cy’urwenya mu rusengero ruri mu mujyi wa Durban.

Gusetsa mu buryo bw’umwuga yabitangiye mu 2010 , niwe munyarwenya wa mbere w’umugore watangiye gukora ibitaramo by’urwenya by’umuntu umwe ‘One-woman show’’ muri Afurika y’Epfo.

Mu mwuga wa sinema yakinnye muri filime zitandukanye zirimo Isibaya, 10 Days in Sun City, Lockdown, Looking For Love na Trippin with Skhumba.

Yegukanye ibihembo bitandukanye birimo Golden Horn Award yegukanye mu 2014, Flying Solo Award na Comedy G Award yatwaye mu 2019.

Umunyarwenya Kigingi nawe ategerejwe i Kigali muri Seka Fest
Patrick Salvado nawe ategerejwe i Kigali
Loyiso Gola agiye gutaramira mu Rwanda bwa mbere
Celeste Ntuli umwe mu banyarwenya bakunzwe muri Afurika agiye gutaramira mu Rwanda bwa mbere
Ibitaramo by'uyu mwaka hari ibizabera muri Bus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .