Uyu muhanzi ufite igitaramo muri Leta ya Ohio ku wa 19 Nzeri 2026, yabwiye IGIHE ko kuba agiye muri iki gitaramo nta kibazo byatera kuri Urban Boyz, kuko ari akazi yari yarafashe mbere yo kugaruka mu Rwanda.

Safi Madiba yagize ati “Aka ni akazi nari naremeye mbere yo gutaha mu Rwanda. Ngiye gusimbuka ndangize amasezerano y’abandi, ariko nzahita ngaruka mu Rwanda kuko dufite byinshi byo gukora nka Urban Boyz.”

Uyu muhanzi yavuze ko kuba agiye gukora iki gitaramo ari wenyine bidakwiye kugira uwo bitera impungenge, kuko bidasobanuye ko hari ikibazo muri Urban Boyz, cyane ko yabiganiriyeho na bagenzi be.

Ati “Abavandimwe twaraganiriye, barabizi. Mfite akazi nari naremeye mbere y’uko twongera guhuza. Barabizi ko twese ubu umutima twawushyize ku itsinda kandi nzahita ngaruka dukomereze aho tugejeje.”

Safi Madiba yavuze ko no mu gihe azaba atarava mu Rwanda, hari bimwe mu bikorwa bya Urban Boyz bazaba bakora, yizeza abakunzi b’iri tsinda kuzagira ibihe byiza.

Urban Boyz yari imaze imyaka icyenda isa n’iyatandukanye, yongeye kwiyunga mu minsi ishize ndetse imaze iminsi mu bitaramo binyuranye. By’umwihariko, amakuru ahari ahamya ko iri mu mishinga y’indirimbo nshya bateganya gusohora mu minsi iri imbere.

View this post on Instagram

A post shared by Niyibikora Safi (@safimadiba_official)

Safi Madiba ugiye gutaramira muri Amerika, yamaze impungenge abakunzi ba Urban Boyz