Rurashonga! Twiyibutse inzira ya Safi Madiba mu rukundo

Yanditswe na Uwiduhaye Theos
Kuya 21 Kanama 2020 saa 09:28
Yasuwe :
0 0

Umunyarwanda yarateruye ati ‘ntawe utwika inzu ngo ahishe umwotsi!’. Nyuma y’iminsi ishize bihwihwiswa ko Safi Madiba yatandukanye na Judith Niyonizera barushinze ku wa 1 Ukwakira 2017, uyu mugabo yashyize yemera ko ibyabo byarangiye.

Muri Gashyantare uyu mwaka hatangiye gucicikana inkuru ku mbuga nkoranyambaga zivuga ko uyu mugabo yamaze kugera muri Canada aho yajyanye n’uwari umugore we Niyonizera Judith. Bombi nta n’umwe wigeze agira icyo abivugaho kuko Safi yavugaga ko yagiye mu bikorwa bisanzwe bya muzika.

Amakuru yizewe IGIHE yaje kumenya ni ay’uko Safi Madiba yavuye mu Rwanda agiye gutura muri Canada dore ko yari yarashakiwe ibyangombwa n’umugore we.

Safi Madiba icyo gihe yavuze ko yerekeje muri Canada kubera ibitaramo yari afiteyo yari gukomereza muri Leta Zunze Ubumwe za Amerika n’ibindi bihugu byo ku mugabane w’u Burayi.

Yaje kubyemera ubwo yashyiraga hanze indirimbo yise ‘I Love You’ ndetse anavuga ko yayikoreye muri Canada.

Hashize iminsi mike, muri Gicurasi uyu mwaka hacicikanye amakuru yavugaga ko aba bombi batandukanye, ndetse Safi yataye umugore we akajya kuba ku nshuti ye magara.

Akaryoshye ntigahora mu itama!

Ku wa 21 Nzeri 2017 mu gitondo cya kare ku mpapuro z’ibanze z’ibitangazamakuru byandika mu Rwanda ndetse no mu makuru ya mu gitondo ku maradiyo na za televiziyo, hakwirakwiye inkuru ivuga ko Safi ari hafi kurongora umukobwa witwa Niyonizera Judith.

Byemezwaga n’urupapuro rw’ubutumire ndetse n’amafoto y’uyu mukobwa, bamwe bati reka reka uyu mugore Safi ntiyamwemera, cyane ko benshi bari bazi ikizungerezi cyitwa Parfine bari bamaze iminsi batandukanye bakabona bitakunda.

Ntibyatinze nyuma hacicikanye amafoto aba bombi basezerana mu mategeko mu Murenge wa Remera, abantu bati bya bintu umenya aribyo. Ku wa 1 Ukwakira 2017 habaye ibirori byo gusaba no gukwa bibera ahitwa ku Babikira i Rebero mu Karere ka Kicukiro; maze amagambo ashira ivuga!

Bahise batangira kubana ndetse Safi Madiba ntiyasibaga kugaragaza ko akunda byimazeyo umugore we.

Hari nk’igihe yigeze kwandika kuri Facebook na Instagram nyuma y’ubukwe, amagambo aryohereye amutera imitoma, ati “Ndagushimiye Mana kuri uyu munsi w’ibyishimo mu buzima bwanjye! Ngushimiye iyi mpano wampaye! Umugore wanjye, igisobanuro cy’umugore nyawe. Umugore mwiza ku mutima, umugore w’umunyamutima kandi ugira urukundo, umunyembaraga kandi wihangana, uw’ubwiza karemano imbere n’inyuma; hejuru ya byose kandi arasenga.”

Yongeyeho ati “Ndagukunda Judith! Ni wowe nahoze nifuza kugira ngo nuzure. Mfite amashyushyu yo kuzabana nawe ubuzima nsigaje ku Isi. Nzakora igishoboka cyose mbe umugabo mwiza wahoze wifuza. Imana ihe umugisha urugendo rwacu rushya! Yari Madiba.”

Icyo gihe Safi Madiba na Judith bagiye ku kirwa cya Zanzibar mu kwezi kwa buki kwishimira intambwe nshya mu buzima.

Igifungo!

Ku wa 22 Nzeri 2018, Safi yashyize hanze indirimbo yise ‘Igifungo’ yakoreye umugore we.

Hari hashize iminsi mike muri Werurwe uwo mwaka abwiye IGIHE ko mu ndirimbo ‘Igifungo’, yaririmbye inkuru mpamo y’urukundo rwe na Judith anagaruka ku bizazane baciyemo. Muri iyi ndirimbo hari aho avugamo ngo “Niba kugukunda ari icyaha nzemera mfungwe”.

Safi Madiba yaririmbaga byeruye urwo akunda Judith ndetse akaniyama abanzi b’umuryango we.

Icyo gihe yagize ati “Ni indirimbo y’urukundo, amagambo arimo aravuga ngo ‘Niba kugukunda ari icyaha nzemera mfungwe’, aho urabyumva. Ni umugore wanjye. Ubusanzwe indirimbo zose nkora ngira igitekerezo, ariko kuri iyi nshuro navuga ko igitekerezo nagikuye ku mufasha wanjye.”

Isohoka, Safi Madiba icyo gihe yavugaga ko impamvu yakoresheje umugore we mu mashusho ari uko ari mwiza kandi nawe asanzwe akora ibijyanye no kumurika imideli. Ati “Ni umukobwa mwiza nawe kandi ni ni umunyamideli.”

Yongeraho ati “Umunsi namushatse hagiye haza ibitekerezo byinshi, rimwe nkavuga nti ‘ese ko ari njye washatse umuntu, hari ababyishimiye, hari abatarabyishimiye. Ababyishimiye Imana ibahe umugisha, abatarabyishimiye bikaba bibateye ikibazo niyo mpamvu navuze ngo n’iyo hazamo n’igifungo nacyo nzacyemera ariko ntibantandukanye na we.”

Safi Madiba yafunguwe…

Kuri uyu wa 20 Kanama 2020, Safi yatangaje ko yatandukanye byeruye n’umugore we. Mu magambo make yabwiye IGIHE asa nk’aho iby’igifungo yaririmbye yabishingutsemo, ati“Maze amezi atanu nibana njye twaratandukanye. Hari ibintu byinshi tutumvikanyeho biba ngombwa ko dutandukana. Afite uko abayeho nanjye ubu hari uko mbayeho.”

Abajijwe niba ugutandukana kwabo kwaba kwaramaze kwemezwa n’amategeko cyane ko bafitanye isezerano, Safi yagize ati “Njye sinkoreshwa n’amategeko nkoreshwa n’umutima wanjye. Twaratandukanye ntabwo tukiri kumwe.”

Iyi ndirimbo yitwa ‘Igifungo’ yanamaze kuyisiba ku rukuta rwe rwa Youtube yari iriho, ibintu bigaragaza ko yigaritse ibyo yari yaririmbye akiryohewe n’urukundo.

Safi Madiba mu rukundo rutaramba

Butera Knowless

Mu nkuru z’urukundo z’ibyamamare zigaruka mu mitwe ya benshi, iy’urukundo rwa Safi na Butera Knowless ntijya iburamo kuko aba bombi bakundanye Butera Knowless agitangira umuziki mu 2009.

Safi yateteshanyijeho na Butera Knowless ndetse yanamwambitse impeta ya fiançailles. Urukundo rwe na Knowless rushobora kuba rwaranuriraga kurusha indi minsi yose Safi yakundanye! Bivugwa ko bari bafite konti bahuriyeho.

Hari n’igihe yigeze gukoreshereza isabukuru Knowless amwereka inshuti maze mu magambo make, ati “Uyu ni umugore wanjye!”

Mu mpera za 2011 ibyabo byajemo gishigisha ndetse byavuzwe ko Safi ari we wabangamiye Knowless ndetse ngo hari igihe yamukubitaga yasinze. Bivugwa ko ngo Knowless arambiwe guhozwa ku nkeke yahise ajya gutura ku Kacyiru, nyuma y’iminsi mike bahita batandukana.

Bakimara gutandukana bakunze kumvikana baterana amagambo mu ndirimbo zabo, ariko bagera mu itangazamakuru bakabyigarika bakavuga ko byaje bya gihanzi.

Safi Madiba n’aba-Diaspora

Ntabwo Judith ariwe wa mbere uyu musore yigiyeho gukundana n’abakobwa baba hanze y’u Rwanda kuko hari abandi. Cyane ko yakundanyeho n’abandi bamwe urukundo rwe nabo rukarangizwa n’induru n’intugunda.

Yakundanye na Olivia wabaga muri Australie, akundana na Fabiola na Umutesi Parfine bose baba i Burayi; aba bose yashwanye na bo birangira arongoye Judith Niyonizera uba muri Canada none nawe ibyabo byarangiye.

Inkuru za Safi akenshi zisozwa n’induru. Nko mu 2013 hadutse inkuru y’urukundo rwasojwe no kwandagazanya hagati ya Safi n’umukobwa witwa Fabiola wamushyize ku gitutu amwishyuza ibihumbi bitanu by’amadolari yamugurije ajya kugura imodoka ya BMW yagendagamo icyo gihe.

Mu 2017 aba bombi bakimara gutandukana, batangiye kwandagazanya ku mbuga nkoranyambaga ndetse hajya hanze ibiganiro bagiranye baterana amagambo.

Urukundo rwa Safi na Parfine rwarangijwe n’induru gusa

Parfine yabwiye Judith ko akwiye kurya ari menge…

Ubwo Parfine yatandukanaga na Safi, mu butumwa bwagiye hanze baterana amagambo hari aho Parfine yamubwiye ko atazarambana na Judith none iryavuzwe riratashye.

Icyo gihe Safi yaramwandikiye amubwira ko atari umugore wo kubaka, undi mu gusubiza yagize ati “Uransetsa hanyuma wowe? mutanyurwa na gato? uzubaka n’umugore udakunze, uzahora ushakisha ubundi buryo bwa kabiri. Sinigeze nkugura twasangiraga kubera urukundo. Ariko wowe ugenda wemera ko bakuguze! Umugabo wemera kugurwa se? Safi ntukunda umugore wawe ntuzigera unamukunda, wakunze ibyo yaguhaye.”

Parfine yariye intumva?

Mu ntangiriro za Mata uyu mwaka nibwo ku mbuga nkoranyambaga hatangiye gucicikana ibiganiro bigaragaza ko Safi Madiba na Umutesi Parfine baba bashaka gusubira mu rukundo.

Ubutumwa aba bombi bandikiranye kuri WhatsApp [IGIHE ifitiye kopi] bwagaragazaga neza ibiganiro bagirana ko biganisha ku kongera gusubukura umubano wari warazanywemo kidobya n’uko Safi Madiba yasezeranye.

Muri ibyo biganiro hari aho Umutesi Parfine yagaragaye abwira Safi ati “Sha ni ukuri Safi unyizere, gusa nawe niba unkunda by’ukuri Imana izadufasha twongere twishimane.”

Hari ahandi Parfine agaragara avuga ngo “Fata ibihe urimo nk’igifungo ariko kizakugeza ku byiza byose wifuje mu buzima bwawe.”

Safi Madiba nawe hari aho amusubiza ati “Birumvikana. Ariko nanjye ndi indwanyi.” Bivugwa ko umubano w’aba bombi uganisha ku kuba Safi Madiba ateganya gusanga Parfine bakibanira i Burayi.

Urukundo rwa Safi rutuma inganzo imukirigita, ariko ntirurambe

‘Umwanzuro’ ni imwe mu ndirimbo za Urban Boyz zifite uburyohe, yagiye hanze mu mpera za 2010 ubwo urukundo rwa Safi na Knowless rwasaga n’urugifite icyanga. Ndetse Safi yifashishije uyu mukobwa bakina urukundo mu mashusho y’iyi ndirimbo. Ibi byerekana ko Safi iyo akunze atihishira ariko bikarangira vuba.

Ni nabyo byabaye kuri Parfine, mu ndirimbo ‘Mama’ ya Urban Boyz yagiye hanze muri Kanama 2017, ngo yari yahimbiwe Parfine ndetse bagombaga kuzayiririmba mu bukwe bwe na Safi, ibi byarangiye iririmbiwe Niyonizera Judith nyamara ngo ni uyu mukobwa uba mu Busuwisi wari wayishyuye.

Parfine yigeze kubwira IGIHE ko ubwo iyi ndirimbo yakorwaga yari kumwe na Urban Boyz i Kampala ndetse ngo Safi yamubwiye ko ari iyo yamuhimbiye. Yagize ati "Ibyo Safi yarabimbwiye byo si ibanga, yambwiraga ko azayindirimbira mu muhango wo gusaba no gukwa ..."

Ibi ni nabyo byabaye ku ‘Igifungo’ yahimbiye Niyonizera Judith none urukundo rwabo rwabaye umuyonga.

Safi Madiba yigeze kwifuriza Parfine isabukuru y’amavuko yakirizwa incyuro z’umwenda w’imodoka agendamo
Safi Madiba yari aryohewe n'urukundo rw'umugore we bagikora ubukwe none yarashaririwe
Niyonizera Judith yamaze gutandukana na Safi
Safi na Judith bagiranye ibihe byiza bitazibagirana ku mpande zombi. Aha bari mu kwezi kwa buki muri Zanzibar
Kuri Noheli ya 2018 , Safi yaririmbiye umugore we mu gitaramo cya Celebrities X-mas Party
Umuryango wari wishimiye ko umukobwa wawo ashyingiwe icyamamare ubu uri kuririra mu myotsi
Safi yigeze kujya i Dubai agiye kwambika Parfine impeta y'urukundo agezeyo yisubiraho
Safi yakanyujijeho mu rukundo rw'amateka na Knowless. Aha ni mu ntangiriro za 2011 ubwo bafataga amashusho ya 'Byarakomeye' indirimbo bivugwa ko Knowless yahimbiye Safi
Safi na Parfine bafitanye amateka akomeye ndetse mu minsi ishize byavuzwe ko bongeye gucudika
Safi na Knowless mu bihe byiza by'urukundo byarangijwe n'amarira, Urban Boyz igatangira guhimba kubera amarangamutima ya Safi
Ibyo Parfine yandikiye Safi byasohoye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .