Platini yasobanuye uko indirimbo ‘Nta birenze’ yakozwe bitateguwe n’uko yayiririmbanye na Knowless

Yanditswe na Nsengiyumva Emmy
Kuya 18 Nzeri 2020 saa 07:51
Yasuwe :
0 0

Nyuma y’iminsi mike Platini asohoye indirimbo ‘Nta birenze’ yakoranye na Butera Knowless, yahishuye uburyo yakozwemo bitateguwe, na Knowless akongerwamo atyo. Ni indirimbo yakozwe ku gitekerezo cya Ishimwe Clement, wamuhamagaye amusaba kuririmba agendeye ku njyana yari yacuranze.

Uyu musore ahageze yahasanze Knowless, atangira guhimba amagambo ajyanye n’ingoma Clement yakoze n’undi akamwunganira, birangira bemeranyije kuyiririmbana. Ubu ni imwe mu ndirimbo zirimo guca ibintu mu Rwanda.

Platini yabwiye IGIHE ati ”Clement yakoze beat arampamagara, nagiye kuri studio ntangira kuyandikira aho. Ntayo nari mfite yanditse ndetse no mu mishinga yanjye nta ndirimbo yitwa ‘Nta birenze’ nari narateguye.”

“Uko nandikaga ndirimba niko Knowless na we yamfashaga, hari ibyo yaririmbye twumva biguyemo, birangira tuyikoranye.”

Platini avuga ko Butera Knowless ari umuhanzikazi ugira umurava mu kazi ke, n’ubushishozi mu bintu byose akora.

Muri iyi ndirimbo nshya Platini na Knowless bakoranye, bumvikana mu nkuru y’umukobwa n’umuhungu bacyurirana ko niba umwe atanyurwa n’ibyo mugenzi we amukorera, yakwigendera.

Platini agira ati ”Ntukiri wa mukobwa namenye, ikirungo ntikikigufata nk’uko wasaga ntereta, wahoraga uri ku myako, nta kosa wakoraga, wahoraga ufunze […] Ese ko wahindutse, ni njya mu byana uzavuga ko nagutaye kandi wizize?”

Knowless amusubiza yagize ati” Oya nta stress, niba udakunze ibyo ubona ngaho igendere, nta birenze.”

Knowless mu gitero cye agira ati” Wahagira utarazamuka, ese waza umbwira iki? Iyo mpumuro yawe itikoraho nyiheruka ukikoraho, […] ngaho iruka mu ba Miss n’ubundi byose ni iby’Isi. N’ubundi ntacyo nahombaga, ntaho ritarema. Niba udakunze ibyo ubona ngaho igendere.”

Mu buryo bw’amajwi iyi ndirimbo yakorewe muri Kina Music na Ishimwe Clement, amashusho yayo yafashwe anatunganywa na Big Team Production.

Ntabirenze Platini yakoranye na Butera Knowless igiye hanze ikurikira Veronika yaherukaga gushyira hanze igakundwa cyane, ‘Byose yakoranye na Rafiki, ‘Fata amano yakoranye na Safi Madiba ndetse na ‘Ya Motema’ yakoranye na Nel Ngabo.

Uyu muhanzi yatangiye gukora indiribo wenyine nyuma y’uko mugenzi we baririmbanaga mu itsinda rya Dream Boys agiriye muri Leta Zunze Ubumwe za Amerika. Platini yahise yiyemeza gutangira urugendo rwe wenyine mu muziki.

Ikiganiro na Platini

Indirimbo "Nta birenze" ya Platini

Platini yasobanuye uko indirimbo “Nta birenze” yakozwe bitateguwe, kimwe no gushyiramo Butera Knowless

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .