Perezida Trump yemeye gutangira ingwate umuraperi A$AP Rocky ufungiwe muri Suède

Yanditswe na Muvunyi Arsène
Kuya 20 Nyakanga 2019 saa 05:48
Yasuwe :
0 0

Perezida wa Leta Zunze Ubumwe z’Amerika, Donald Trump, yiyemeje gutanga ingwate kugira ngo umuraperi A$AP umaze ibyumweru bibiri afungiwe muri Suède arekurwe.

ASAP Rocky ubusanzwe witwa Rakim Mayers yatawe muri yombi tariki 03 Nyakanga 2019 mu mujyi wa Stockholm akurikiranyweho icyaha cyo kurwana.

Tariki 5 Nyakanga 2019 urukiko rwategetse ko afungwa kugeza tariki 20 Nyakanga mu gihe Ubushinjacyaha bukiri gukora iperereza. Kuri ubu bwongeye gusaba ko afungwa indi minsi itanu kugira ngo burangize gutunganya ikirego.

Abanyamerika benshi bagaragaje kutishimira icyemezo cyo gufunga uyu musore ndetse bamwe babihuza n’irondaruhu kuko ari umwirabura.

Umuraperi Kanye West yafashe iya mbere asaba Perezida Donald Trump ko yagira icyo akora kugira A$AP Rocky arekurwe, na we atazuyaje amwerera ko agiye kubikurikirana.

Abinyujije kuri Twitter, Perezida Trump yatangaje ko yamaze kugirana ibiganiro na Minisitiri w’Intebe wa Suède amusaba ko barekura A$AP yemera no kumutangira ingwate.

Ati “Nagiranye ikiganiro cyiza kuri telefone na Minisitiri w’Intebe wa Suède Stefan Löfve wanyijeje ko umuturage wa Amerika A$AP Rocky ahabwa ubutabera bukwiye. Kandi namwijeje ko A$AP adashobora gucika niyemeza kuba namutangira ingwate ubwanjye n’ikindi gishoboka.”

Perezida Trump yavuze ko amatsinda ahuriweho n’ibihugu byombi agiye kuganira neza, bakaza gutanga umwanzuro nyuma y’amasaha 48.

Imirwano A$AP ashinjwa kugiramo uruhare yabaye tariki 30 Kamena 2019 ubwo yari yitabiriye igitaramo mu mujyi wa Stockholm. Amashusho yakwirakwijwe ku mbuga nkoranyambaga yagaragaje uyu muraperi akubita umusore w’umuzungu.

Nyuma nawe yaje kwerekana andi mashusho agaragaza ko uwo musore yari yabanje kubakurikira abiyenzaho.

A$AP afungunywe n’abandi basore babiri mu gihe umurinzi we yaje kurekurwa nyuma y’igihe gito. Uwo yakubise nawe ari gukorwaho iperereza n’Ubushinjacyaha.

Umuraperi A$AP amaze ibyumweru bibiri afungiwe muri Suède

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza