Ibidasanzwe ku rugendo rwa Mutoni Assia umaze kumenyekana muri filime mu Rwanda

Yanditswe na Nsengiyumva Emmy
Kuya 3 Kanama 2020 saa 11:25
Yasuwe :
0 0

Abahoza amaso ku nsakazamashusho bareba filime nyarwanda, bakunze kubona umukobwa witwa Mutoni Assia wakinnye mu Intare y’Ingore, Seburikoko n’izindi nyinshi, ariko ubu agezweho mu yo yise “Gatarina”, ye bwite.

Uyu mukobwa w’imyaka 27 yavukiye i Nyamagabe [ahahoze hitwa ku Gikongoro] mu Ntara y’Amajyepfo, nubwo yakuriye i Kabuga mu mujyi wa Kigali. Yize kugeza mu cyiciro cya kabiri cya kaminuza, mu bijyanye n’ubukerarugendo.

Iyo umubajije abavandimwe be avuga ko atazi neza umubare wabo, kuko Se yashakanye n’abagore batatu bakabyarana abana benshi.

Ati “Ni benshi ntabwo mbibuka, njye tuvukana turi umunani ariko mu rugo turi 13 kuko hari abandi mama arera. Abavandimwe banjye ni benshi. Hari abo tuvugana kwa papa, afite abagore batatu, rero abana ntabwo mbazi umubare kuko hari n’uwavutse ejobundi ntazi.”

Ashimira Se kuko nubwo ngo yashatse abagore benshi, yakoze uko ashoboye akabarinda kuryana no kwangana.

Ati “Njye sinashobora gushaka umugabo ufite abagore benshi kuko ndafuha. Mba mbona mama yitonda, uburyo abishobora, ariko ndabikunda. Uziko ba mukeba be ari inshuti zacu? Turakundana cyane. Nicyo kintu papa yashoboye, kuko kugira abagore batatu bagakundana, n’abana bagakundana, si ibintu biba henshi.”

Yatangiye kugaragaza impano ye akiri umwana

Uyu mukobwa avuga ko kuva yiga mu mashuri abanza yakinaga amakinamico, mu gace yari atuyemo ndetse no ku Ishuri.

Ati “Ndibuka ko niga mu mashuri abanza mu wa kabiri, nakinnye ikinamico neza bampemba inkwavu eshatu.”

Uku gukunda gukina amakinamico byaramukurikiranye kugeza mu mashuri yisumbuye, naho arabikomeza.

Ati “Mu 2013 niga mu wa Gatandatu w’amashuri yisumbuye, nibwo numvise ko ku Ishyo Arts bakeneye abakinnyi ba filime. Naragiye, nkihagera bahita bamfata banyambika imyenda banyohereza gukina.”

Yanga wasobanuraga filime (ubu yabivuyemo) yaje kumubona amubwira ko ashaka kumukinisha muri filime ye, barayikina ariko ntiyanasohoka ako kanya.

Arangije amashuri yisumbuye yatekereje gukina filime ye ya mbere yise “Ejo heza”, iyi filime yari yashoyemo arenga 700 000frw, ayigurisha 100 000frw. Uku guhomba ngo kwatewe nuko atari azi neza uko bacuruza filime.

Ati ”Nahuye n’umuhungu witwa Claude anyemerera miliyoni, aba ampaye 100 000 Frw, ariko birangira atanyishyuye. Njye nifuzaga ko filime isohoka hanze nkamenyekana, sinatekerezaga amafaranga.”

Yari anyotewe no kuba icyamamare

Mutoni yakomeje ati “Mu rugo banyohereje i Bugande kwiga, ukuntu nifuzaga gukina filime byatumye nanga kuhiga, ahubwo mbeshya mu rugo ko abagabo baho bari kuntereta.”

Iwabo bacyumva ko umwana wabo ari guteretwa n’abanya-Uganda ngo baramugaruye ngo yige mu Rwanda, kuko we yifuzaga gukina filime. Filime yakinnyemo ya Yanga yatumye atangira kumenyekana.

Uyu mukobwa amaze kugaragara muri filime zitandukanye zirimo Giramata, Intare y’ingore, Seburikoko, City Maid, Jibu, Close Chapter yo muri Tanzania, Online Love na Gatarina.

Mutoni afite filime nshya yise Sécurité amaze igihe akoraho ndetse yitegura kumurikira abakunzi be, izajya hanze mu minsi iri imbere.

Gukina filime byamufashije kugira ubuzima bwiza kuko hari igice kinini cy’amashuri ye ya kaminuza yishyuriwe n’amafaranga yakuraga muri filime.

Mutoni yamaze no gufungura kompanyi y’ubukerarugendo “Assia Safaris”, izajya ifasha abantu bakeneye serivisi z’ubukerarugendo nko gusura ahantu nyaburanga ma pariki z’igihugu.

Ntiyibuka abavandimwe be, Ise afite abagore batatu! Byinshi kuri Mutoni Assia uzwi muri filime zo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .