Ntabwo Mfunzwe! Miss Isimbi Amandah yavuze ibye na Sheilah Gashumba baherutse gukozanyaho (Video)

Yanditswe na Nsengiyumva Emmy
Kuya 4 Ugushyingo 2019 saa 02:52
Yasuwe :
0 0

Isimbi Amandah uzwi cyane ku mbuga nkoranyambaga wanabaye igisonga cya kabiri cya nyampinga wa SFB mu 2014, yahakanye amakuru y’uko ari gukurikiranwa n’inzego z’umutekano zo muri Uganda azira guharabika umunyamakurukazi witwa Sheilah Gashumba.

Kuva ku wa 22 Ukwakira 2019 imyidagaduro yo muri Uganda yashyuhijwe na Miss Isimbi Amandah ndetse n’umunyamakurukazi wo muri icyo gihugu uri mu bakunzwe, byavugwaga ko bapfaga umusore.

Ibinyamakuru byo muri icyo gihugu byatyajije amakaramu umunota ku wundi bishyira hanze inkuru ubutitsa zivuga ku munyarwandakazi uhamaze amezi abiri gusa agashyushya benshi imitwe.

Isimbi yari amaze iminsi acuditse bikomeye n’umusore wo muri Uganda witwa Rickman, umuhanzi ukorera umuziki we muri Suede, gusa nawse yemeza ko bamaze gutandukana.

Bijya gushyuha, hasakajwe amashusho ya Sheilah Gashumba na Miss Amandah bari kwishimirishiza mu nyubaho uyu munyarwandakazi yari acumbitsemo.

Aya mashusho yarangizwaga n’intonganya za Sheilah ari kurira mu buryo bukomeye abwira Amandah kumurekera umusore yavugaga ko yamutwaye, ndetse akaba yaranagiye amujya mu matwi ashaka kubateranya.

Icyo gihe Gashumba yavugaga ko ngo uyu mukobwa yabwiye God’s Plan bakundana ko yaryamanye n’undi musore mu rugo iwe.

Mu mashusho yafashwe na Amandah, Sheilah yumvikanaga atakamba asaba uyu mukobwa kureka kumuteranya n’umukunzi we Ali Marcus Lwanga uzwi nka God’s Plan. Undi amusubiza amubwira ko nta kibazo bafitanye ku buryo yamugendaho.

Mu yandi mashusho yagiye hanze tariki 24 Ukwakira 2019, Isimbi noneho yumvikanye avuga ko Sheilah yaryamaniye n’umuhanzi witwa Grenade wo muri Uganda mu nyubako yari acumbitsemo.

Ati “Barasambanye. Ndi kuguha amakuru y’impamo yihariye, Grenade na Sheilah, babikoreye mu nzu yanjye. Ntabwo nigeze nifuza kubivuga kuko numvaga ko byateza ikibazo hagati ya Sheilah n’umukunzi we ariko Grenade yagiye mu itangazamakuru avuga byinshi ndetse n’umukunzi we ntabwo yari azi ko yamuciye inyuma.”

Howwe.biz yandika imyidagaduro muri Uganda yanditse ko Sheilah Gashumba yagiye kurega Amandah amushinja kumwandagaza ku karubanda agamije guhindanya izina rye. Icyo gihe byanavugwaga ko Isimbi atemerewe gusohoka muri Uganda ndetse Polisi iri kumuhiga bukware.

Mu kiganiro cyihariye yagiranye na IGIHE, Isimbi yavuze ko ibyo yavuze byari ukuri uyu munyamakurukazi yaryamanye na Grenade ndetse na camera zaho babikoreye zibagaragaza binjirana ndetse banasohokana.

Ku kijyanye no kuba yarahamagajwe na Polisi cyangwa yarashyiriweho impapuro zo kumuta muri yombi, Isimbi yabihakanye avuga ko ku wa Gatandatu tariki 2 Ugushyingo 2019 yasohotse muri Uganda kandi nta muntu wigeze amuhagarika.

Ati “Njye n’umunyamategeko wanjye twagiye kubaza muri Polisi nsanga nta kirego mfiteyo, njya gusohoka nta muntu wigeze ambuza. Birashoboka ko bakoresheje amafaranga bakabona impapuro zo gushyira mu itangazamakuru ariko njye nta wigeze amfata cyangwa ngo ampamagare nange kwitaba.”

Uyu mukobwa ubu uri kubarizwa i Kigali avuga ko nta bwoba yigeze aterwa n’ibyavuzwe ko ashakishwa na Polisi, yongeraho ko yiteguye gutemberera muri Uganda igihe icyo aricyo cyose kuko asanzwe ahakorera akazi ko gutegura ibitaramo.

Isimbi ariko kandi yahakanye amakuru avuga ko yakundanye na Sarpong Michael rutahizamu wa Rayon Sports byigeze kuvugwa ko bajyanye muri Ghana.

Yavuze ko uyu musore baziranye gusa ariko batigeze bakundana. Yahishuye ko nyuma yo gutandukana na Rickman ubu afite umukunzi mushya nubwo atifuza kumutangaza, ati “Igihe nikigera nzamukubwira.”

Isimbi Amandah, yabaye igisonga cya kabiri cya nyampinga wa SFB mu 2014.

Ni umwe mu bakobwa bagiye bagira umuriri ukomeye mu itangazamakuru ryo mu Rwanda, yavuzwe cyane mu birori byabaye mu Ugushyingo 2014 bya High School Idols aza gufotorwa bamwe bavuga ko atambaye umwambaro w’imbere, mu gihe we yabiteye utwatsi avuga ko barebye nabi.

Uyu mukobwa yanagarutsweho ubwo yitabiraga igitaramo cya Kiss Daniel cyabereye muri Kigali Serena Hotel muri 2016, abyinisha uyu muhanzi, bitewe n’umwambaro yari yambaye wino z’abanditsi zibona akazi yongera kugarukwaho mu mitwe y’inkuru z’imyidagaduro i Kigali.

Mu minsi ishize yasaga n’uwimukiye i Kampala aho yajyaga gusura umukunzi we Rickman nawe uhaza ari mu biruhuko dore ko atuye muri Suede.

Sheilah Gashumba bashyamiranye ni umunyamakuru wa NTV Uganda akaba n’umushyushyarugamba ubimazemo imyaka 10. Ni umukobwa w’umuherwe Gashumba Frank.

Reba ikiganiro kirambuye twagiranye na Isimbi Amandah

Isimbi Amandah avuga ko nta Polisi yigeze ishaka kumufata ndetse ko yavuye muri Uganda akagera i Kigali nta n'umuriye urwara
Isimbi Amandah avuga ko atigeze abuzwa gusohoka muri Uganda nk'uko byavuzwe mu bitangazamakuru by'iki gihugu
Sheilah Gashumba yabwiye ibinyamakuru byo muri Uganda ko yamaze gutanga ikirego cya Isimbi Amandah kuri Polisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .