Niyonsenga Elisée yahize kwifashisha Roller Skating mu kumenyekanisha u Rwanda

Yanditswe na Uwiduhaye Theos
Kuya 12 Nzeri 2020 saa 09:06
Yasuwe :
0 0

Hambere aha gukora siporo rusange bicyemewe, mu Mujyi wa Kigali benshi biganjemo urubyiruko hari igihe bafata akanya bakazenguruka bambaye inkweto zifite amapine, bakina Roller Skating; umukino uryohera amaso kuwureba.

N’ubwo bimeze gutyo ariko, nta banyarwanda bajya bawukina nk’umwuga ahubwo benshi babikora bashaka kwishimisha, ndetse nta Munyarwanda wari usanzwe uzwi ukina uyu mukino ku rwego mpuzamahanga.

Uwitwa Niyonsenga Elisée yafashe iya mbere mu kubyaza uyu mukino umusaruro ndetse ubu ni umukinnyi mpuzamahanga.

Yabwiye IGIHE ko ari impano yakuze yiyumvamo ndetse aza gutekereza uburyo, ariyo yazakora nk’umwuga none yakabije inzozi ze.

Ati “Nakuze nkunda uyu mukino wa Roller Skating. Ntabwo nabashije kubikora nk’umwuga kuva mu buto kubera ibibazo bitandukanye ubu maze igihe cy’umwaka umwe gusa ntangiye kuwukora mu buryo bwa Kinyamwunga. Byabanje kumbera imbogamizi kugira ngo menyekanishe uyu mukino udasanzwe uzwi cyane mu Rwanda .”

Yakomeje avuga ko muri icyo gihe cy’umwaka amaze akina uwo mukino, yabashije gushinga ikigo yise Future Vision Agency 2 cyo gufasha urubyiruko rw’abana b’Abanyarwanda, ndetse n’abanyamahanga umukino wa Roller Skating kandi ashimira Imana kuko icyo kigo cyamwaguriye amarembo mu ruhando mpuzamahanga kuri ubu akaba abasha kwitabira amarushanwa menshi akomeye kw’isi.

Ati “Ntabwo nashatse kwikubira ahubwo maze kubona amahirwe yo gutangira gukina uyu mukino, nshinga ikigo kandi biramfasha ku giti cyanjye ndetse bikanafasha abana mfasha.”

Uyu musore avuga ko yakoresheje ingufu nyinshi kugira ngo agere ku bategura umukino wa Rollers Skating ku rwego mpuzamahanga.

Ati “Ni umukino abazungu bumva ko utazwi cyane mu Rwanda kandi ni nako bimeze, nakoresheje imbaraga nyinshi ngo mbashe kugera ku bawutegura ku rwego mpuzamahanga. Ikintu nshaka ni uko uyu mukino wagera na hano mu karere ka Afurika y’iburasirazuba kandi bidatinze bizakunda.”

Indi ntego we afite ni uko uyu mukino waba imwe mu nzira zo kumenyekanisha ubwiza bw’u Rwanda, muri gahunda ya Made in Rwanda na Visit Rwanda.

Ati “Nshaka ko uyu mukino uba kimwe mu bintu byifashishwa mu kumenyekanisha u Rwanda kandi nzabigeraho. Ikintu cyari gikomeye ni ukumvisha abantu ko mu Rwanda uhari kandi benshi batangiye kubyumva. Nshaka kujya nitabira amarushanwa mpuzamahanga nkamenyekanisha u Rwanda mbinyujije muri uyu mukino.”

Niyonsenga afite gahunda yo kuzana ibikoresho by’uyu mukino byo ku rwego rwo hejuru, kugira ngo awuzamure mu rubyiruko rubyifuza nibinakunda bashinge ikipe izajya ihagararira u Rwanda mu ruhando mpuzamahanga.

Uyu musore uyu mwaka yagombaga kwitabira amarushanwa akomeye ane yabereye ku mugabane w’u Burayi, ariko agezeyo bihurirana n’icyorezo cya COVID-19.

Amwe muri ayo marushanwa yagombaga kwitabira ni World Rollers Championship yari kubera muri Czech Republic muri Gicurasi , 6 Heures de Paris na Paris Rollers Marathon yagombaga kubera mu Bufaransa na 24 Heures Lemans Rollers Marathon.

Aya marushanwa yose yari guhuriramo n’abakinnyi baturuka ku Isi hose kandi bakomeye ariko yarasubitswe kubera icyo cyorezo.

Uyu musore arasaba abanyarwanda kumushyigikira akazitabira irushanwa rya Deine Weltrekord Challenge, rizabera i Berlin mu Budage ku itariki 26 Nzeri uyu mwaka.

Ibi, bimusaba kuba akurikirwa n’abarenga 10000 ku mbuga nkoranyambaga ze nka Instagram na Facebook.

Reba Niyonsenga ari gukina uyu mukino

View this post on Instagram

Think like a champion

A post shared by Elisee Kiremwa (@eliseekiremwa) on

Niyonsenga ashaka kwifashisha uyu mukino akamenyekanisha u Rwanda
Niyonsenga afite ubuhanga bwinshi muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .