Nishimwe Naomie wahogoje Abanya-Sénégal ari mu bakobwa bakomeje muri Miss Rwanda 2020

Yanditswe na Uwiduhaye Theos
Kuya 18 Mutarama 2020 saa 11:33
Yasuwe :
0 0

Umukobwa witwa Nishimwe Naomie usanzwe ari mu bakurikirwa cyane kuri Instagram ufite abarenga ibihumbi 65 kuri uru rubuga, wigeze no gutangarirwa ubwiza bwe ku mbuga nkoranyambaga Abanya- Sénégal bagaterana amagambo, ari mu bakobwa babonye itike yo guhagararira Umujyi wa Kigali muri Miss Rwanda 2020.

Ijonjora ryo guhitamo abakobwa bazahagararira Kigali ryabereye kuri Hilltop Hotel i Remera kuri uyu wa Gatandatu, ku wa 18 Mutarama 2020.

Nishimwe Naomie yari yambaye No 26 ubusanzwe yasoje amashuri yisumbuye, afite imyaka 20. Yahisemo gusubiza mu Kinyarwanda.

Imbere y’akanama nkemurampaka bamubwiye kugira inama bamwe mu Banyarwandakazi badakunda siporo, bamusaba kuvuga ibyiza byayo.

Mu gusubiza yagize ati “Ikintu cya mbere ni uko ivura indwara nyinshi zirimo umutima no kuvuduka kw’amaraso kandi igatuma umuntu aramba.”

Yavuze ko ibibi bya siporo birimo kuba umuntu ashobora kuyikora akavunika.

Yabajijwe icyo yakora aramutse abaye Nyampinga w’u Rwanda, avuga ati “Ndamutse mbaye Nyampinga w’u Rwanda nasangiza abantu ibyo nateganyije mu mushinga wanjye ujyanye no kugabanya agahinda gakabije mu rubyiruko (Depression). Urubyiruko rukunze kukagira rukirukira mu biyobyabwenge rukaniyahura.”

Uyu mukobwa asanzwe akurikirwa cyane [afite abantu ibihumbi 66.1 kuri Instagram] ndetse byagaragajwe cyane n’uburyo yahamagawe [ariwe wa nyuma] abantu bari bari mu cyumba cyabereyemo igikorwa cyo kujonjora bakiyamira.

Uretse ibyo, muri Kamena umwaka ushize muri Sénégal ubwiza bw’Abanyarwandakazi bwakuye benshi mu byimbo butuma bamwe bavugishwa, havuka iteranamagambo hibazwa igihugu gifite abakobwa beza hagati y’u Rwanda na Sénégal.

Icyo gihe ifoto ya Nishimwe Naomie yavugishije benshi bari batangariye ubwiza bwe.

Ku mbuga zitandukanye muri Sénégal hakwirakwiye ifoto y’uyu mukobwa wari uhagarariye Abanyarwandakazi muri rusange hagereranywa ubwiza bwe n’ubw’abakobwa bo muri icyo gihugu.

Izi mpaka zakwirakwiriye ku mbuga za internet zitandukanye muri Sénégal, zatangiriye mu itsinda [Group] rya Facebook rikunzwe muri iki gihugu ryitwa ‘T’es De Dakar Si’ hibazwaga hagati y’u Rwanda n’iki gihugu ahari abakobwa b’uburanga.

Kuva ubwo havutse ibice bibiri muri iri tsinda, icya mbere cy’abagabo bo muri Sénégal bemeza ko ‘Abanyarwandakazi bafite uburanga burangaza benshi kurusha ubw’abakobwa bo muri iki gihugu’ mu gihe hari n’abakobwa batabyishimiye maze nabo bishyira hamwe bamagana ibyo basaza babo bavuze.

-  Indi nkuru wasoma: Abakobwa 20 b’uburanga bemerewe guhagararira Kigali muri Miss Rwanda 2020 (Amafoto & Video)

Nishimwe Naomie wahogoje Abanya-Sénégal ari mu bakobwa bakomeje muri Miss Rwanda 2020
Abakobwa 20 batsindiye guhagararira Umujyi wa Kigali

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza