Nimu Roger, umunyarwenya wabijemo neza abyinjijwemo n’inzara

Yanditswe na Nsengiyumva Emmy
Kuya 13 Ukwakira 2019 saa 05:34
Yasuwe :
0 0

Mugisha Niyonsaba Roger wamaze gufata akazina ka Nimu Roger ni umwe mu banyarwenya bashya ariko nanone bagezweho muri iyi minsi cyane mu bakoresha imbuga nkoranyambaga.

Uyu musore yaduhishuriye ko yamaze kurangiza amasomo muri Kaminuza y’u Rwanda aho ategereje kwambara ikanzu mu ntangiriro z’Ugushyingo 2019.

Nimu Roger ni umwe mu banyarwenya baherutse kongerwa mu itsinda rya Day Makers, kugeza ubu uyu musore arangije amasomo muri Kaminuza y’u Rwanda ishami rya Huye aho yize ubuhinzi.

Mu kiganiro yagiranye IGIHE, yavuze ko yarangije amasomo kuri ubu yaje i Kigali gushakisha ubuzima ahereye mu mwuga wo gusetsa abantu abona wanatangiye kumuhira.

Igitaramo cya Bigomba guhinduka II nicyo cya mbere yari akoreye i Kigali nubwo yemeza ko i Butare yari azwi cyane.

Nimu Roger yavuze ko usibye kuba yari asanzwe yumva afite impano yo gusetsa ubwo yari ageze muri Kaminuza y’u Rwanda ishami rya Huye aribwo ubuzima bwamukomeranye agahitamo gushaka uko yabyaza umusaruro impano ye.

Avuga ko nta muntu wo mu muryango akomoraho inganzo ahubwo yagiye mu byo gusetsa kugira ngo arwanye inzara yahuye nayo muri Kaminuza.

Yagize ati” Njye sinabikoraga nk’umwuga,ugeze muri kaminuza iyo inzara ikuriye urasetsa. Impano yari ihari ariko inzara indiye biba nko gukora mu mbarutso.”

Yunzemo ati” Nabitangiye nkiri umwana, ariko inzara indiye ndi i Butare muri 2016 nagiye gushaka ibiraka.”

Ahamya ko urugendo rwe nk’umunyarwenya wari ukizamuka rutari rworoshye ati” Ahantu ha mbere nagiye gushaka ibiraka abakiriya nibo banyiyirukaniye.”

Usibye ibitaramo yagiye akorera ubuntu agitangira, Nimu Roger yemera ko igitaramo cya mbere yakoze yagikoreye amafaranga igihumbi (1000 Frw), ariko ngo ntabyicuza ahubwo yagiye abyigiraho.

Kuri ubu uyu musore yatangiye gukorera amafaranga afatika ku buryo arinayo yamufashije mu masomo ye. Aya mafaranga nubwo atayishyuragamo ishuri ariko yamufashaga mu buzima bwa buri munsi bwo ku ishuri.

Nyuma yo gushyira hasi iby’amasomo, Nimu Roger ngo agiye kwinjira mu byo gusetsa nk’umwuga kandi yizeye ko wanamubeshaho nubwo bitavuze ko agiye kureka gukora ibyo yize.

Nimu Roger, umunyarwenya wabitangiye kubera inzara bikaba bimufashije kurangiza Kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza