Igitaramo cyiswe “Shineboy Fest” cyayobowe n’Umunyamakuru wa RBA, Luckman Nzeyimana, winjiye ku rubyiniro Saa Tatu n’iminota 10 z’ijoro.

Yatangiye avuga ku myaka 10 Davis D amaze akora umuziki, agaragaza ko yahanyanyaje kandi akagera ku ntsinzi.

Lucky yunganiraga DJ Flixx umaze kwamamara ku mbuga nkoranyambaga ndetse ni na we wari uri kuvanga imiziki ubwo abantu binjiraga.

Abacyitabiriye wabaregeraga ugatahura ko bose atari Abanyarwanda, wabavugisha bakaguhamiriza ko baje kwihera ijisho ya Nasty C.

Benshi biganjemo abiga muri kaminuza mu Rwanda baturutse mu bihugu nka Liberia n’ahandi.

Abazi Davis D bakunze kumufata nk’umuhanzi w’umunyamafiyeri menshi, bishingiye ku myambarire ye, uko amashusho y’indirimbo ze aba ameze n’ibindi biranga umuziki we

N’abafana be benshi bitabiriye igitaramo cye, wababonaga bari bambariye kumushyigikira.

Inkumi zari zakoranyeho mu myambaro migufi, ‘make up’ nziza, benshi banitwaje amafirimbi ku buryo bavuzaga akaruru kakahava.

Ni na bo batonze umurongo ubwo igitaramo cya Davis D cyatangiraga batangira kubyina, bashimisha abari bitabiriye byuzuye.

Davis D ubwe yazanye umukobwa uzwi nka Kelly Boo ku rubyiniro abyinira impande ya moto yari ku rubyiniro, abantu barumirwa.

Abahanzi bari bitezwe hafi ya bose baririmbye

Umuhanzikazi Teta Cyuzuzo Liza ukoresha amazina ya Lisaa uri mu bakizamuka, ni we wabimburiye abandi.

Yaririmbye ibihangano birimo indirimbo aheruka guheraho ubwo yatangiraga umuziki mu mezi ashize yitwa “Forever”.

Ahagana Saa Tatu na 40, Lizaa yakurikiwe na Diez Dola na we uri mu bahanzi bakizamuka. Yinjiranye imbaraga ku rubyiniro ariko ubona ipantalo yenda ku muvamo.

Yaririmbye indirimbo ye yakunzwe yise “What If” yahuriyemo na Passy Kizito, benshi bacinya akadido karahava.

Ruti Joel ni we wakurikiyeho afatanyije na Kesho Band. Yari yambaye imyambaro y’umukara, yinjira aririmba indirimbo zirimo “Cunda”, “Amaliza”, “Igikobwa” na “Oulala” yasabwe n’abafana ahita agenda.

Alyn Sano uri mu bahanzwe amaso mu muziki muri iki gihe, yinjiranye indirimbo yise “Head” na “Tamu Sana” arangije asezera abakunzi be.

Nel Ngabo udakunze kugaragara mu bitaramo, kuri iyi nshuro ntabwo yatanzwe mu cya Davis D. Yari yaherekejwe na Ishimwe Clement usanzwe ari Umuyobozi wa Kina Music, inzu ifasha abahanzi na Nel Ngabo abarizwamo.

Nel Ngabo yinjiye ku rubyiniro aririmba izirimo “Nywe”, “Zoli” na “Molomita” ahita asezera abakunzi be.

Lucky yahamagaye Davis D undi yinjirana n’ababyinnyi benshi bose bambaye imyenda y’umukara.

Uyu muhanzi yazanye ku rubyiniro na The Target Band yamucurangiye na Selekta Maurice wamuvangiraga imiziki.

Yahereye ku ndirimbo yise “Micro” na “Ifarasi”, ashimira abakunzi be ati “Ndabashimira kukona mu myaka 10 mfite abakunzi bangana gutya. Ndishimye! Nagiye mpura n’utuzazane twinshi ariko mwarahabaye, ndabashimira.”

Ubu ni bwo igitaramo cyari gitangiye, abatangiriza kuri “Bon” na “Kimwe Zero”, hanyuma yakira Platini baririmbana indirimbo iyo bise “Jeje”. Yamusize ku rubyiniro undi aririmba indirimbo ze zirimo “Atansiyo” na “Icupa”.

Drama T w’i Burundi ni umwe mu baje gushyigikira uyu muhanzi, aririmba izirimo “Your Love”, “Kosho” na “Chakula”.

Mu gusoza uyu musore yasoreje ku ndirimbo yiswe “Hakuna Mungu Kama Wewe” ya Modest Morgan ashimira Imana ku bwo kuba umwaka ugiye kurangira abari bitabiriye igitaramo bagifite ubuzima.

Nasty C yashimuse igitaramo…

Umunyafurika y’Epfo Nsikayesizwe David Junior Ngcobo, wamamaye nka Nasty C ari mu bahanzi baririmbye igitaramo kiri guhumuza.

Uyu muhanzi waherukaga mu Rwanda mu minsi mike ishize, yongeye kugaragara ku kibuga cy’indege ku wa 28 Ugushyingo yitabiriye igitaramo cya Davis D.

Uyu musore w’imyaka 27, yagiye ku rubyiniro akurikiye Drama T. bakimuhamagara abantu benshi bahagaze ku ntebe ndetse bamwe bibwiriza gucana amatoroshi, cyane ko amatara yari yazimijwe.

Guhera ku ndirimbo ye ya mbere kugeza ku ya nyuma yaririmbanye n’abari bitabiriye hafi ya bose badategwa.

Hari aho byageze aririmba yitaje abafana nyuma yo gukururwa n’umwe ukuguru bikamurakaza undi akamukubita umugeri.

Yahereye ku ndirimbo yise Sting and Bling, Jack, Gravy, Audio Czzle, Why Me? , Said ye na Runtown yashimishije benshi, Particula yahuriyemo na Major Lazer, DJ Maphorisa, Ice Prince, Patoranking na Jidenna.

Hari kandi izindi nka Hell naw na SMA VOL 1 yakoranye na Rowlene yanasorejeho, ashimira abantu urukundo yeretswe.

Se wa Davis D yaririmbye, ahimbaza Imana…

Umubyeyi wa Davis D, Jean Damascene Bukuru, ni umwe mu bagombaga kuririmba. Ntabwo yatengushye umuhungu we. Ubwo igitaramo cyari kiri kugana ku musozo, yagiyeho afata indangururamajwi.

Arangije ati “Uyu musore nanjye yantije igitaramo ngiye kubaririmbira.”

Yahise aririmba indirimbo ya 15 mu ndirimbo z’Agakiza, izwi nka ‘Amasezerano Yose’, ashimira abantu batandukanye barimo Bagenzi Bernad. Na Davis D ahita yungamo, ati “Mumushimire ni we wakoze ishusho ya Davis D.”

Davis D yaririmbye indirimbo yise Bermuda afatanyije na Bushali, uyu musore na we akurikizaho indirimbo ye yise Kinyatrap. Nyuma Davis D na Melissa baririmbana indirimbo bahuriyemo bise My Dreams.

Abandi bahanzi baririmbye barimo DJ Marnaud na Danny Na None buri umwe akubita abangura cyane ko benshi bari bamaze gutaha n’amasaha yabafashe.

Davis D yahawe impano na Se, hakatwa umutsima hishimirwa imyaka 10, Davis D amaze akora umuziki.

Bamwe mu bari bitezwe muri iki gitaramo batagaragayemo barimo Bulldogg, Khire, DJ Toxxyk na Davy Scott, ugezweho mu ndirimbo yise Ambulance.

Uretse Nasty C kandi na Davis D nta wundi muhanzi waririmbye indirimbo zirenze eshatu, Bushali yakwa indangururamajwi ubwo yaririmbaga ashaka kurenza igihe yari yagenewe.

Abafana bashakaga gusuhuza Davis D aho ageze hose

Ababishoboye batahanye amafoto y'urwibutso

Davis D yari yakoresheje abakobwa bakeye mu gitaramo cye

Abahanzi batandukanye na bo bari bahimbawe

Ubwo Nasty C yakirwaga hazimijwe amatara

Alyn Sano n'ababyinnyi be bari birekuye

Bamwe bari bitwaje n'amafirimbi yo kuryoshya ibirori

Bamenya na we yari yabukereye

Buri wese yabyinaga uko abyumva mu gitaramo cya Davis D

Bushali yasusurukije abakunzi be biratinda

Davis ari kumwe na Se witwa Jean Damascene Bukuru waririmbaga indirimbo ihimbaza Imana mu gitaramo cy'umuhungu we

Davis D yahaye abakunzi be ibyishimo bisendereye

Davis D ari kumwe n'umuryango we ubwo yizihizaga imyaka 10 amaze mu muziki

Davis D yafashije abantu gusoza Ugushyingo 2024 mu byishimo

Davis D ashimira Bernard Bagenzi wamufashe ukuboko mu myaka 10 ishize mu muziki

Davis D yatewe inkunga na Primus mu gitaramo cyo kwizihiza imyaka 10 aririmba

Davis D yazanye imbunda y'igikinisho ku rubyiniro

Diez Dola uri mu bahanzi bari kuzamuka neza yerekanye ubuhanga afite mu kuririmba

DJ Flixx ukizamuka mu byo kuvanga imiziki yahawe umwanya asusurutsa abitabiriye

DJ Marnaud yagiye ku rubyiniro igitaramo kiri mu bihe byacyo bya nyuma

DJ Pius aganira na Alyn Sano nyuma y'aho uyu mukobwa yari avuye ku rubyiniro

Eric Semuhungu mu bari bagiye gushyigikira Davis D

Hakaswe umutsima ubwo hizihizwaga imyaka 10 ya Davis D mu muziki

Utafashe ifoto y'urwibutso mu gitaramo cya Davis D ni uko atabishakakaga

Alyn Sano yaje yambaye bidasanzwe

Imibyinire ya David D na Kelly Boo yatangaje benshi

Lisaa uri mu bahanzi bakiri kuzamuka ni muwe mu bigaragaje neza

Lucky yashimiye umubyeyi wa Davis D

Melissa waririmbanye na Davis D ni ubwa mbere yari agaragaye ku rubyiniro

Abantu bari buzuye muri Camp Kigali ahabereye igitaramo cya Davis D

Muyoboke Alex (hagati) na David Bayingana (ubanza iburyo) mu bitabiriye igitaramo cya David D

Nasty C yageze aho aririmba yitaje abafana nyuma y'aho umwe amukuruye ukuguru

Nel Ngabo na we yanyuze abakunzi be mu gitaramo cya Davis D

Platini ni uku yaserutse

Producer Loader uheruka kwinjira mu muziki na we yahawe umwanya

Rugemana Amen uzwi nka Babu, ukora ikiganiro cy'imyidagaduro ku Isibo TV cyitwa The Choice Live ni umwe mu bitabiriye igitaramo cya Davis D

Ruti Joel yafashije abakunda indirimbo z'umudiho wa Kinyarwanda kwishima

Se wa Davis D yashimiye Bernard Bagenzi wafashije umuhungu we mu muziki

Ushaka amafoto menshi wakanda hano: https://www.flickr.com/photos/igihepictures/albums/72177720322271189/with/54173428633

Amafoto: Kasiro Claude

Video: Amir Rwibutso