Mushikiwabo yashimye ubuhanga bw’Umukirigitananga Deo Munyakazi

Yanditswe na Muvunyi Arsène
Kuya 17 Kamena 2019 saa 09:07
Yasuwe :
0 0

Umunyamabanga Mukuru w’Umuryango Mpuzamahanga w’Ibihugu bivuga Ururimi rw’Igifaransa, Louise Mushikiwabo, yagaragaje ibyishimo yatewe no guhura n’umukirigitananga, Deo Munyakazi, mu nama mpuzamahanga yiga ku iterambere ry’umuco.

Iyi nama y’iminsi ibiri yiswe “Culture for the Future” yatangiye kubera i Bruxelles mu Bubiligi tariki 16 Kamena 2019.

Umukirigitananga, Deo Munyakazi na Carole Karemera washinze Ikigo cyigisha gukina ikinamico cya Ishyo Arts Centre ni bamwe mu Banyarwanda bayitumiwemo.

Mu kuyitangiza, Umunyamabanga Mukuru w’Umuryango Mpuzamahanga w’Ibihugu bivuga ururimi rw’Igifaransa, Louise Mushikiwabo, yatanzemo ikiganiro.

Mu butumwa yanyujije kuri Twitter, Mushikiwabo yagaragaje ko yishimiye guhurira muri iyi nama n’uyu musore ‘usobanutse’, anagaruka ku butumwa yahatangiye.

Ati “Nishimiye kubona uyu musore usobanutse w’Umunyarwanda witabiriye iyi nama natanzemo ikiganiro muri iki gitondo. Ubutumwa bwa ngombwa nari mfite ni uko ibihangano by’umuco bikwiye kandi bigomba kuvamo umusaruro utunga ba nyirabyo, ukanatera inkunga ubukungu bw’ibihugu byabo.”

Inganda ndangamuco zibarizwamo ibijyanye n’ubuhanzi bukorwa na Munyakazi, ni icyiciro gifite imbaraga nyinshi mu iterambere ry’igihugu. Muri rusange ubuhanzi ku Isi yose bwinjiza miliyari zirenze 2300 z’amadolari ariko muri Afurika haracyari intambwe nini yo guterwa nubwo hari ibihugu nka Nigeria bwinjiriza miliyoni zigera kuri 800 z’amadolari ku mwaka.

Munyakazi ni umwe mu bahanzi biziritse ku muco, akaba umwe mu bakiri bato bakenetse gukirigita imirya y’inanga.

Yitabiriye amaserukiramuco atandukanye arimo iry’i Paris aho yatumiwe mu gitaramo ‘Le Printemps des Poètes’; mu Budage yatoranyijwe mu bahanzi 10 bafite umwihariko kandi batanga icyizere muri muzika ku Isi.

Louise Mushikiwabo yishimiye guhura na Deo Munyakazi
Munyakazi Deo yashimwe na Louise Mushikiwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza