Ni mu gitaramo cyabaye kuri iki Cyumweru tariki 26 Ugushingo. Cyabanjirijwe n’ibindi byazengurutse intara birimo icyahereye i Musanze ku wa 23 Nzeri 2023, bikomereza i Huye ku wa 30 Nzeri; ku wa 7 Ukwakira 2023 byabereye i Ngoma mu gihe ku wa 14 Ukwakira 2023 byabereye i Rubavu.

Basile Uwimana wamenyekanye mu itangazamakuru cyane kuri televiziyo y’u Rwanda mu biganiro bitandukanye, niwe wayoboye iki gitaramo.

Ibi bitaramo byatangiye muri Kamena 2019, mu 2020 bikomwa mu nkokora kubera icyorezo cya COVID-19 ariko bikanyuzwa kuri televiziyo y’u Rwanda aho abahanzi batandukanye basusurutsaga abakunzi babo bari bari mu bihe bya Guma mu Rugo.

Nzayisenga Sophia ni we wabanje ku rubyiniro. Uyu mubyeyi yaririmbye ibihangano bitandukanye. Uyu mukirigitananga yifashishije iki gicurangisho yashimishije abitabiriye mu bihangano bye birimo “Urweze” yakoranye n’umusizi Murekatete uri mu bakobwa bari kuzamuka neza mu busizi n’ibindi bitandukanye.

Uyu mugore yanyuzagamo akivuga bya Kinyarwanda yabijyanisha no gukirigita Inanga bikizihira benshi bitabiriye.

Yakurikiwe n’Itorero Inyamibwa AERG rimaze kumenyekana cyane mu Rwanda. Ryaririmbye indirimbo zitandukanye zamenyekanye zirimo iyitwa “Amararo”, “Inkindi y’u Rwanda’’, “Nta makemwa” yamamaye mu myaka yo hambere, “Ndaraye” n’izindi zitandukanye.

Cyusa Ibrahim ni we wakurikiyeho aherekejwe na bamwe mu bagize Itorero Indashyikirwa bamucurangiye bakanamufasha kuririmba. Uyu muhanzi yaririmbye ibihangano bye bitandukanye birimo “Migabo” yahimbiye Perezida Paul Kagame, “Imenagitero” ya Rugamba Sipiriyani, “Rwanda nkunda”, “Muhoza’’, “Agasaza’’ na “Nyaruguru”.

Uyu muhanzi wavuye ku rubyiniro saa tatu n’iminota 16 yashimishije beshi ndetse mu bari bamubanjirije niwe wabashije guhagurutsa abantu.

Ibihame by’Imana nibo bakurikiye uyu muhanzi barahamiriza biratinda. Ibihame Cultural Troupe ni Itorero rigizwe n’abasore barenga 40, nta mukobwa n’umwe ubarizwamo. Batangiye gukora mu 2013 ari abantu batatu, ritangijwe na Bahizi Aimable hamwe na Igihangange Emery Mukuru wa Massamba Intore ndetse na Burigo Olivier.

Aba basore bari baherekejwe n’abarimo abana bakiri mu myaka iri munsi ya 15 bakurikiwe na Ruti Joël.

Ruti Joël yaririmbye indirimbo ze ziri kuri album ye ya mbere aheruka gushyira hanze yise ‘Musomandera’. Yaririmbye indirimbo ze zirimo “Mwiza”, “Cunda” n’izindi zitandukanye ariko asoreza ku “Igikobwa” yashimishije abiganjemo inkumi.

Uyu musore na we ibihangano bye byashimishije benshi bakunda umuziki gakondo ariko uvanzemo izindi njyana zigezweho.

Ruti asoza yafashe umwanya yibutsa abakunzi be ko ku wa 26 Ukuboza 2023 afite igitaramo mu Intare Arena.

Basile Uwimana wari uyoboye igitaramo, yahise ahamagara Inganzo Ngari. Abagize iri torero bahise bagera ku rubyiniro baca umugara nabo bashimisha benshi mu mbyino n’indirimbo zitandukanye zitandukanye bya Kinyarwanda.

Muyango wabanjirije Cécile Kayirebwa yasusurukije abantu mu bihangano bye bitandukanye byakunzwe. Yaririmbye indirimbo zirimo “Sabizeze”, “Karame Uwangabiye”, “Inganzo” n’izindi nyinshi.

Mu kuririmba yanyuzagamo agatebya, hari nk’aho yagize ati “Twari dukumburanye, nagize Imana hari abambanjirije ntabwo muri bundushye mwishimye […] mwihanganye, igihe bahereye babamena amatwi ntimurambirwa?’’

Uyu muhanzi yavugaga ibi agahita yanzika n’indi ndirimbo.

Cécile Kayirebwa ni we wasoje iki gitaramo. Uyu mubyeyi umaze kugira intege nke yaje ku rubyiniro asindagizwa maze ahabwa ibyicaro atangira gususurutsa abitabiriye. Yafashijwe ku rubyiniro na Symphony Band yamucurangiye ndetse n’itsinda rya Ange na Pamella ndetse n’umuririmbi Alouette Munganyinka bamufashije mu buryo bwo kuririmba.

Kayirebwa yaririmbye zimwe mu ndirimbo ze zakunzwe zirimo iyo yise “Indamukanyo”, “Urubambye Ingwe”, “Ndare”, “Ngarara” igaruka ku mugore wakumbuye umugabo we, “Tarihinda’’, “Iwacu” n’izindi.

Uyu mubyeyi nubwo atabashije guhaguruka ngo abyinane n’abakunzi be, uko yaririmbaga indirimbo abantu bihagurutsaga bakabyina bataraka abandi bakaririmbana nawe kuva ku ijambo rya mbere kugeza ku rya nyuma.

Uyu mubyeyi yari amaze igihe atagaragara mu bitaramo, iki kikaba ari kimwe mu byatumye benshi bitabiriye bari bamufitiye urukumbuye rwinshi.

Iki gitaramo cyari cyitabiriwe n’abantu bazwi barimo Dr Bizimana Jean Damascène uyobora Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), abahanzi barimo Jules Sentore, Bwiza, Tizzo wo muri Active n’abandi batandukanye.

Ikigo cy’Ibimenyetso bya gihanga, Rwanda Forensic Institute [RFI], muri ibi bitaramo byabaye muri uyu mwaka, cyegereye abatuye uturere twose byanyuzemo basobanurirwa ibikorwa na serivisi iki kigo gitanga zirimo gupima uturemangingo ndangasano, gupima uburozi n’ibiyobyabwenge, gupima imibiri y’abitabye Imana hagaragazwa icyateye urupfu, gupima alchool yageze mu mubiri w’umuntu n’ibindi byinshi.

Abakiri bato nabo bari bitabiriye iki gitaramo

Ukibabona binjira uhita umenya ko igitaramo kigiye kubera muri BK Arena gitandukanye n'ibisanzwe

Nzayisenga ni umwe mu bakirigitananga bakomeye mu Rwanda ndetse imaze kumwambutsa imipaka

Nzayisenga Sophia niwe watangiye iki gitaramo

Umukirigitananga Nzayisenga Sophia yafatanyije n'umusizi Murekatete ku rubyiniro

Cyusa yaririmbye ibihangano bye birimo n'indirimbo yise 'Migabo' yatuye Perezida Kagame

Cyusa ni uku yaserutse ku rubyiniro

Umuhanzi Cyusa ni uku yaserutse ku rubyiniro

Basile Uwimana niwe wayoboye iki gitaramo

Itorero Ibihame by'Imana ryagaragaje ubuhanga mu guhamiriza

Itorero Ibihame by'Imana ryahamirije rinyura benshi

Nyampinga w’Umuco n’Umurage mu mwaka wa 2020 Teta Ndenga Nicole uri iburyo na Tumukunde Joselyne [Jojo] b’Itorero Inyamibwa bashimishije benshi

Umukoraza wo mu Itorero Inyamibwa mu gitaramo cyo gusoza 'MTN Iwacu Muzika Festival'

Bamwe mu bakobwa babyina mu Itorero Inganzo Ngari bataramye banunamira uwari umuyobozi waryo uherutse gutabaruka

Itorero Inganzo Ngari ryatunguranye muri iki gitaramo

Ruti Joël akaba Rumata wa Musomandera ni uku yaserutse mu gitaramo cya 'MTN Iwacu Muzika Festival'

Ruti Joël yanyuzagamo akabyina bya kinyarwanda

Ruti Joël yateguje abantu igitaramo cye ku wa 26 Ukuboza mu Intare Arena Rusororo

Muyango yari kumwe n'itsinda ry'abacuranzi bamufashije ku rubyiniro

Muyango ubwo yari ari ku rubyiniro

Uyu mwana ukiri muto yashimishije benshi kubera uko yabyinaga indirimbo za Cécile Kayirebwa, uyu muhanzi asaba ko bamumuzanira imbere akamuramutsa

Cécile Kayirebwa niwe wasoje iki gitataramo

Ange na Pamella bamaze igihe bakorana na Cécile Kayirebwa bamufashije ku rubyiniro

Ibyishimo byari byose ku bitabiriye iki gitaramo

Akadiho kacinywe muri BK Arena biratinda

Nubwo ari igitaramo cy'umuco nyarwanda n'abanyamahanga ntibacitswe

Byagaragaye ko umuziki gakondo atari uw'abakuru gusa ahubwo ukundwa n'abakibyiruka

Byari byamurenze ...

Bamwe banyuzagamo bakikoza ibicu bagacinya akadiho

Iki gitaramo cyari cyitabiriwe n’abantu bazwi barimo Dr Bizimana Jean Damascène uyobora Minisiteri nshya y’Ubumwe bw’Abanyarwanda n’Inshingano Mboneragihugu (MINUBUMWE)

Abitabiriye iki gitaramo bizihiwe bikomeye

Ni ubwa mbere iki gitaramo cyari cyibaye gihuje abahanzi bo mu gisekuru cya kera n'ab'ubu baririmba gakondo

Ni uko byari byifashe muri BK Arena

BK Arena nubwo itari yakubise ngo yuzure ariko yarimo abantu

Ni igitaramo cyitabiriwe n'ingeri zitandukanye z'abantu, abakiri bato n'abakuze

Umudiho wacinywe karahava

Umuziki Gakondo wagaragarijwe urukundo

Uyu mubyeyi we ni umwe mu bari bitabiriye iki gitaramo cya gakondo

Amafoto: Salomo Nezerwa