MTN yavuze ku mukobwa bafitanye imikoranire witabiriye Miss Rwanda2020 bigakurura impaka (Video)

Yanditswe na Nsengiyumva Emmy
Kuya 22 Mutarama 2020 saa 07:23
Yasuwe :
0 0

Kuva mu minsi ishize ku mbuga nkoranyambaga impaka zaragwiriye kubera umukobwa witwa Nishimwe Naomie usanzwe afite imikoranire na MTN Rwanda uri mu bahataniye ikamba rya Miss Rwanda 2020, iyi Sosiyete y’Itumanaho ibereye umuterankunga.

Benshi mu bagaragazaga impungenge bavugaga ko kuba uyu mukobwa ufitanye imikoranire na MTN Rwanda yaritabiriye Miss Rwanda bimuha amahirwe yo gutsinda bimworoheye.

Hari n’abatebyaga bavuga ko iyi sosiyete yitwaje umukobwa wakunzwe cyane "Miss Popularity" ari na we izahemba.

Nishimwe Naomi n’itsinda ry’abavandimwe be baherutse guhabwa akazi na MTN Rwanda ko kwamamaza igikorwa cya Connect Rwanda kigamije kongera umubare w’imiryango ikoresha telefoni zigezweho [smartphones] mu Rwanda.

Abantu bakurikira iri rushanwa ku mbuga nkoranyambaga batangiye kwibaza uburyo uyu mukobwa yitabira irushanwa mu gihe riterwa inkunga na MTN bafitanye imikoranire.

Mu kiganiro n’abanyamakuru cyabaye kuri uyu wa Gatatu tariki 22 Mutarama 2020, Umuyozi muri MTN Rwanda, Wibabara Gisèle yavuze ko bakoranye n’itsinda Nishimwe Naomie abarizwamo bityo ko nta mpungenge bikwiye gutera abandi bakobwa bahanganye na we.

Ati “Twabahaye akazi nk’itsinda, rero iyo umuntu avuye mu itsinda akajya gukora ibintu byamuteza imbere numva twebwe nta kibazo byari bidutwaye. Numva nta mpungenge bikwiye gutera abandi bakobwa, bakwiye kwigirira icyizere kugira ngo wumve ko ushobora guhatana n’umuntu.”

Yakomeje avuga ko ntaho MTN ihuriye n’akanama nkemurampaka kazatanga amanota.

Yagize ati “Twebwe ntitujya mu bijyanye no gutanga amanota cyangwa gutora, keretse niba mutizeye uburyo bazatorwamo. Ikigo cyacu gikorana ubunyangamugayo kandi ntabwo twabuza umuntu amahirwe ye.”

Ku bijyanye n’uko hari umuyobozi muri MTN wagaragaje ko ashyigikiye Nishimwe Naomie, Umuyobozi wa Rwanda Inspiration Back Up itegura iri rushanwa, Ishimwe Dieudonné, yavuze ko buri wese afite uburenganzira bwo kujya inyuma y’uwo ashaka.

Ati “Buri Munyarwanda wese afite uburenganzira bwo gushyigikira uwo ashaka. Icya kabiri iyo tugiye kwakira umuntu muri Miss Rwanda ntabwo twita ku byo yakoze n’imirimo akora. Uwaba yaramwamamaje n’ubwo ntabizi ahubwo nashyiremo akabaraga anamutore. Naba ashoboye azabatsinda naba adashoboye azasigara.”

Ubuyobozi bwa Rwanda Inspiration Back Up bwasabye itangazamakuru kutagumya gushyira igitutu kuri uyu mukobwa (Nishimwe Naomie) cyane ko nta kinyuranye n’amategeko y’irushanwa yishe cyangwa abamushyigikira bishe.

Nishimwe yiyamamarije mu Mujyi wa Kigali aho yatoranyijwe mu bakobwa 20 mu ijonjora ryabereye muri Hilltop Hotel i Remera ku wa 18 Mutarama 2020.

Yabwiye Akanama Nkemurampaka ko aramutse abaye Nyampinga w’u Rwanda azashyira mu bikorwa umushinga wo kugabanya agahinda gakabije mu rubyiruko (depression).

Biteganyijwe ko guhera tariki 2 kugera ku wa 8 Gashyantare 2020 aba bakobwa bazaba bari mu gikorwa gisa n’umwiherero ariko bawukorera iwabo, aho bazajya bahabwa imikoro itandukanye ari nako bitegura kujya mu mwiherero uzabera kuri Golden Tulip Hotel i Nyamata.

Irushanwa rya Miss Rwanda rigeze aharyoshye, kuri ubu hagiye gutangira amatora azakorwa mu buryo bwa Online na telefoni hakaziyongeraho amajwi y’abagize Akanama Nkemurampaka hashakishwa 20 bazajya mu mwiherero mu gihe 34 bazahita bataha.

Abazajya mu mwiherero bazawutangira tariki 2 Gashyantare bageze ku wa 23 Gashyantare 2020.

Mu buryo bwo gutora hifashishijwe internet, abakurikirana Miss Rwanda bazatorera kuri IGIHE.com mu gihe abazatora kuri telefoni bazifashisha nimero 1525, wanditse ubutumwa bugufi bugizwe na Miss ugasiga akanya nimero y’uwo utoye ukohereza.

Abakobwa babiri bazagira amajwi menshi bazahita bakomeza mu mwiherero. Abo amajwi yabo azabarwa ku buryo bukurikira; SMS 60%, website 20% n’uburyo abantu bazashyigikira umukobwa 20%.

Byitezwe ko amatora agomba gutangira guhera kuri uyu wa Kane tariki 23 Mutarama 2020 saa sita z’amanywa.

Abakobwa bibukijwe ko tariki 1 Gashyantare 2020 hazabaho Pre-selection iteganyijwe kubera i Gikondo muri Expo Ground.

Kwinjira mu birori byo gutoranya abazajya mu mwiherero, itike izaba igura 3000 Frw na 5000 Frw mu myanya y’icyubahiro mu gihe abazagura amatike mbere hifashishijwe MTN bazagabanyirizwa igiciro.

Reba icyo MTN Rwanda na Rwanda Inspiration Back Up bavuze kuri iki kibazo

Nishimwe Naomie usanzwe akorana na MTN yateje impaka mu bakurikiranira hafi irushanwa rya Miss Rwanda
Abategura Miss Rwanda n'ubuyobozi bwa MTN basobanuye byinshi ku mpaka zavutse ku mbuga nkoranyambaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza