Miss Mutesi Jolly yasobanuye byimbitse filime mbarankuru ivuga ku buzima bwe aherutse gusohora

Yanditswe na Nsengiyumva Emmy
Kuya 14 Gicurasi 2020 saa 05:04
Yasuwe :
0 0

Mutesi Jolly wabaye Nyampinga w’u Rwanda 2016, yasohoye amashusho ya filime mbarankuru yise “This is Jolly”, ivuga ku buzima bwe mbere ndetse na nyuma y’uko yambitswe ikamba rya Miss Rwanda.

Iyi filime yasohotse ku gicamunsi cyo ku wa Gatatu tariki 13 Gicurasi 2020 ifite iminota 16 n’amasegonda 3’ yatunganyijwe na Birindwa Jean Claude benshi bazi nka BJC.

Iri mu rurimi rw’Icyongereza iherekejwe n’amashusho yafashwe ubwo yegukanaga ikamba rya Miss Rwanda 2016, amafoto yo mu buto bwe, ibiganiro bitandukanye yagiye agirana n’itangazamakuru n’ibindi.

Mu kiganiro na IGIHE, Mutesi Jolly yavuze ko yakoze iyo filime ashaka kwerekana uwo ari we bitandukanye nuko wenda bamwe bamufata.

Ati “Ni filime ngufi ivuga ku buzima bwanjye kuva namenyekana. Abantu bamenye cyane nk’uwo babona mu itangazamakuru nyamara hari undi muntu ndiwe. Muri iyi filime nashakaga kwereka abantu njyewe wa nyawe atari uvugwa ku mbuga nkoranyambaga.”

Jolly Mutesi yavuze ko igitekerezo cyo gukora iyi filime yagikuye ku bana b’abakobwa benshi bakunze kumubwira ko bamureberaho bityo yifuza kubasangiza ubuzima bwe muri rusange kugira ngo abo bamufataho icyitegererezo babikore bamuzi.

Yagize ati “Ntabwo gusangiza abantu inkuru yabafasha bisaba kuba ukuze cyane, nabonye abantu bakunda kubyibaza cyane ariko rwose no mu cyumweru kimwe ushobora guhura n’ibintu wasangiza abanda bikabagirira akamaro. Si ngombwa ngo ube ufite imyaka runaka.”

Ku kuba filime yarakozwe mu Cyongereza, Mutesi Jolly yavuze ko byatewe nuko ashaka ko ubutumwa bwe bugera kuri benshi atari mu Rwanda gusa.

Icyakora yanongeyeho ko ateganya kuyisobanura mu Kinyarwanda ku buryo n’utumva Icyongereza neza yazasobanukirwa.

Muri iyi filime Jolly Mutesi agaragaza ko mbere y’uko aba Nyampinga w’u Rwanda yari umwana nk’abandi ufite uko abayeho ndetse utanakunda kuvugira mu ruhame kuko yagiraga isoni.

Yavuze ko akimara kwegukana ikamba rya Miss Rwanda ibintu byose byamuhindukanye aba icyamamare atangira kuvugwaho ibintu bitandukanye birimo n’ibyamusetsaga nawe ubwe kuko byabaga bihabanye n’ukuri.

Ati “Nkimara kuba Nyampinga abantu batangiye kuntekerereza uko nabaho mu buryo bo bashaka nyamara ntabwo byari gushoboka kuko nyine njye ni njyewe nabo nibo.”

Yavuze ko byinshi byamuvuzweho amaze kuba nyampinga bimwe bajyaga banabivuga yiga mu mashuri yisumbuye ariko byose bihabanya na we ubwe.

Ati “Nakuze bamvuga ko nirata rero ntabwo ubu aribwo bari kubimvuga ngo mbabare kuko nabivuzwe kuva cyera narabimenyereye, ahubwo biransetsa cyane kuko unzi neza aba azi njye utandukanye n’uwo bavuga.”

Jolly yavuze ko amaze gutorwa yashyize mu ngiro umushinga we, ashakira amata abana b’inshuke ndetse anasura ikigo cya Iwawa anongeraho ko yishimira ko yagerageje gushyira mu ngiro umushinga we kandi yishimira ko yabigezeho kabone ko haba hari hari ibivugwa ukundi.

Ashimangira ko muri uru rugendo yigiyemo kugira umutima ukomeye, kwigirira icyizere, kugira intego n’ibindi bituma arushaho gukomera.

Yasabye abakobwa bagenzi be kudatinya uruvugo n’ibindi bisitaza, baharanira kugera ku nzozi zabo.

Ikiganiro na Miss Jolly Mutesi wasobanuye iby’iyi Filime mbarankuru y’ubuzima bwe yaba mbere na nyuma yo kuba Nyampinga w’u Rwanda

Reba Filime mbarankuru "This is Jolly" ivuga ubuzima bwa Jolly Mutesi

Miss Jolly Mutesi yasobanuye byimbitse Filime mbarankuru ivuga ku buzima bwe aherutse gusohora
Miss Jolly Mutesi yasohoye Filime mbarankuru y'ubuzima bwe yise "This is Jolly"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .