Miss Earth: Igiraneza ntiyahiriwe mu cyiciro cyo kwiyerekana muri Bikini (Amafoto)

Yanditswe na Uwiduhaye Theos
Kuya 14 Ukwakira 2019 saa 12:57
Yasuwe :
0 0

Igiraneza Ndekwe Paulette uhagarariye u Rwanda mu irushanwa rya Miss Earth 2019 riri kubera muri Philippines ntabwo yabashije kuza mu myanya y’imbere mu cyiciro itsinda arimo ry’Amazi ryahatanyemo cyo kwiyerekana muri Bikini.

Uyu mukobwa ari muri 85 bari guhatanira ikamba. We na bagenzi be 29 bo mu itsinda rimwe bahatanye mu cyiciro cyo kwiyerekana bambaye bikini.

Igiraneza utabashije kwegukana umudali n’umwe, yari yambaye bikini y’umukara ifite akenda kamanutse inyuma ku kibuno kagera hasi.

Abakobwa babashije kuza mu myanya itatu ya mbere ni uwo muri Ukraine witwa Diana Shabas, uwo muri Puerto Rico witwa Nellys Pimentel ndetse n’uwo muri Équateur witwa Antonela Paz.

Mu byiciro bibiri bimaze guhatanirwa mu itsinda rya Igiraneza birimo icyo kwiyerekana muri Bikini no mu makanzu maremare nta na kimwe uyu munyarwandakazi arabasha kwegukanamo umudali.

Ikamba muri iri rushanwa rizatangwa mu ijoro ryo ku wa 26 Ukwakira 2019, mu birori bzabera mu nyubako ya Jesse M. Robredo Coliseum yo mu Mujyi wa Naga City muri Philippines.

Irushanwa rya Miss Earth rihuza abakobwa baturuka mu bihugu bitandukanye ku Isi, ryatangijwe ku mugaragaro mu 2001 rifite intego yo kwifashisha ba Nyampinga mu buvugizi no guteza imbere urwego rw’ibidukikije.

Abakobwa benshi bakunze guhagararira u Rwanda mu marushanwa mpuzamahanga y’ubwiza, batahana inkuru zijyanye na bikini. Bamwe bavuga ko kuyambara ari uguta umuco kuko nta mukobwa w’i Rwanda wakagiye ku karubanda akerekana imwe mu myanya y’ibanga ye.

Byatangiye kugira ubukana ubwo Miss Umutesi Aurore Kayibanda yahagarariraga u Rwanda muri Miss Supranational 2013 akanga kwambara bikini. icyo gihe yashimwe na benshi ariko hari abataratinye kuvuga ko yagiye kwitemberera kuko yanze gukurikiza rimwe mu mabwiriza y’irushanwa kandi yararigiyemo abizi.

Mu 2014 ubwo Umwari Neema yahagarariraga u Rwanda muri iri rushanwa yanze kwambara bikini, 2015 Sonia Gisa arayambara biteza impagarara zakomeje ubwo Colombe Akiwacu wahagarariye u Rwanda mu 2016 na Ingabire Habibah waruserukiye mu 2017 bose bazambaye.

Uwase Hirwa Honorine nawe mu 2017 yagiye mu irushanwa rya Miss Earth, mu bice bibiri byose byari birimo kwambara bikini aratsemba.

Ndekwe we ajya kuva mu Rwanda yavuze ko azambara bikini uko bizagenda kose ariko na none yabona ikabije akarenzaho akantu nk’uko yabigenje.

Ati “Bikini nzayambara kuko ni kimwe mu biri mu irushanwa gusa nimbona ikabije nzashyiraho akantu inyuma, niba ntacyo itwaye nzayambara uko imeze.”

Igiraneza yabaye Nyampinga w’Ishuri rya ETMR (Ecole Technical Muhazi Rwanda) mu 2016, yitabira Miss Rwanda mu 2019 ndetse aza kuba muri 20 bitabiriye irushanwa rya Miss Supranational Rwanda mu 2019, ari nabwo bwa mbere ryari ribaye.

Ni ku nshuro ya gatatu u Rwanda rwitabiriye Miss Earth, mu 2017 rwaserukiwe na Uwase Hirwa Honorine wubatse izina nka “Miss Igisabo” mu gihe mu mwaka ushize Umutoniwase Anastasie ari we waryitabiriye.

Igiraneza yambaye bikini ifite akantu kamanutse inyuma
Igiraneza yari yatangaje ko azambara bikini ariko idakabije
Ndekwe ntabwo yabashije kuza mu myanya y'imbere mu kwiyerekana muri bikini
Ubwo hatangazwaga abakobwa babashije kuza mu myanya y'imbere mu cyiciro cyo kwiyerekana muri Bikini
Abakobwa babashije kuza mu myanya itatu ya mbere ni uwo muri Ukraine , uwa Puerto Rico ndetse n'uwo muri Équateur

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza