Mico The Best yabonye igihembo cya mbere mu muziki! Urutonde rw’abegukanye Kiss Summer Awards 2020

Yanditswe na Nsengiyumva Emmy
Kuya 12 Nzeri 2020 saa 10:41
Yasuwe :
0 0

Kuri uyu wa Gatandatu tariki 12 Nzeri 2020, abahanzi barushije abandi gukora neza mu mpeshyi y’uyu mwaka bashimiwe na Radio Kiss Fm, mu bihembo byiswe Kiss Summer Awards 2020, byatangwaga ku nshuro yabyo ya gatatu.

Ibi bihembo byatangiwe mu kiganiro cyihariye cyabereye kuri Kiss Fm guhera saa kumi z’umugoroba.

Muri uyu mwaka icyiciro cy’indirimbo y’impeshyi harimo ’Ntiza’ ya Mr Kagame na Bruce Melodie, ’Do Me’ ya Marina na Queen Cha, ’Ubushyuhe’ ya DJ Pius na Bruce Melodie, ’Igare’ ya Mico The Best na ’Saa Moya’ ya Bruce Melodie.

Igare ya Mico The Best niyo yahembwe nk’indirimbo yakunzwe mu gihe cy’impeshyi. Cyari igihembo cya mbere kuri uyu muhanzi umaze igihe mu muziki kuko nta kindi icyo aricyo cyose yigeze yegukana.

Icyiciro cy’umuhanzi mushya w’impeshyi cyarimo B-Threy, Ariel Wayz, Kevin Kade na Calvin Mbanda. Iki gihembo cyegukanywe na Kevin Kade. Uyu musore mushya mu muziki utaranarangiza amasomo ye mu ishuri rya muzika rya Nyundo, abarizwa muri Incredible Record ya Bagenzi Bernard.

Abahanzi bahataniraga igihembo cy’uwigaragaje mu mpeshyi harimo Bruce Melodie, The Ben, Nel Ngabo na King James. Hatsinze Bruce Melodie nubundi wisubizaga igihembo yegukanye umwaka ushize.

Mu cyiciro cy’utunganya indirimbo wahize abandi muri iyi mpeshyi hari harimo Madebeat, Knoxbeat, Element na Clement. Madebeat ni we wongeye kwisubiza iki igihembo yari yaregukanye umwaka ushize.

Mu itangwa ry’ibi bihembo, hongewemo icyiciro cya Lifetime Achievement Award cyahawe umuntu wagize uruhare rukomeye mu gushyigikira no guteza imbere umuziki nyarwanda. Iki gihembo cyashyikirijwe DJ Bob. Uyu mugabo azwi nk’uwakwirakwije umuziki w’abahanzi nyarwanda mu bawukunda, mu gihe ikoranabuhanga ryari ritaratera imbere.

Iki gihe yakoraga ama CD y’umuziki akayagurisha abakunzi b’umuziki, benshi mu bahanzi babaga bifuza ko abafasha kumenyekanisha indirimbo zabo.

Kuva mu 2018, KISS FM yatangiye gutanga ibihembo ishimira abahanzi bitwaye neza mu mpeshyi ya buri mwaka. Bitandukanye n’imyaka yabanje, uyu mwaka Skol Rwanda yari umuterankunga mukuru w’ibi bihembo.

Ku nshuro ya mbere abegukanye ibihembo ni The Ben nk’umuhanzi w’impeshyi, Bob Pro nk’uwatunganyije indirimbo nziza mu gihe “Nta Kibazo” ya Urban Boys, Bruce Melodie na Riderman yabaye indirimbo y’impeshyi.

Ku nshuro ya kabiri hiyongereyemo icyiciro cy’umuhanzi mushya cyegukanywe na Amalon, icyo gihe Bruce Melodie yabaye umuhanzi w’impeshyi, Kontwari ya Safi Madiba iba indirimbo y’impeshyi naho Madebeat atorwa nk’uwatunganyije indirimbo zashyuhije umujyi kurusha abandi.

Isheja Sandrine, umunyamakuru wa Kiss FM ni uku yaserutse yambaye
Antoinette Niyongira ni uku yaserutse yambaye
Antoinette Niyongira mu kiganiro cyatangiwemo ibihembo bya Kiss Summer Awards
Ubwo Uncle Austin yari ahingutse ku kazi
Cyuzuzo ubwo yari ahingutse ku kazi
Cyuzuzo mu kiganiro cyatangiwemo ibihembo bya Kiss Summer Awards
Ni uku Nkusi Arthur yahingutse ku kazi
Nkusi Arthur ukora kuri Kiss Fm yari yabukereye
Keza Joannah ni uku yahingutse ku kazi
Bagwire Keza Joannah umunyamakuru wa Kiss Fm mu kiganiro cyatangiwemo ibi bihembo
Miss Nishimwe Naomie yari yatumiwe ngo ashyikirize umwe mu batsinze igihembo
Kevin Kade agihinguka kuri Kiss Fm
Kevin Kade nyuma yo gushyikirizwa igihembo cye nk'umuhanzi ukizamuka witwaye neza, yashimiye ubuyobozi bwa Kiss Fm asaba abanyarwanda gukomeza kumuba hafi
Madebeat ahingutse kuri Kiss Fm agiye gufata igihembo cye
Madebeat yisubije igihembo yari yaregukanye n'umwaka ushize
Dj Bob yahawe igihembo cya Lifetime Achievement Award
Bruce Melodie ni uku yaserutse yambaye
Bruce Melodie yabanje kuganira n'abanyamakuru kuri Kiss Fm
Bruce Melodie amaze gushyikirizwa igihembo na Antoinette Niyongira
Mico The Best agiye gutora igihembo cy'indirimbo yakunzwe cyane mu Mpeshyi y'uyu mwaka
Igare ya Mico The Best niyo yegukanye igihembo cya Kiss Summer Awards 2020
Byari ibyishimo kuri Mico The Best wari wegukanye igihembo cye cya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .

Article (139589) Re-process this page