Bitewe n’uko Yvan Muziki yatunguriye Marina mu gitaramo akamwambika impeta, kandi akaba yari yarabigize ibanga rikomeye, hari benshi mu nshuti zabo batari barabashije gutumira ari nayo mpamvu bateguye uyu mugoroba wo kwinegura.

Ni umugoroba utaranzwe n’amagambo menshi cyane ko wari uwo guhura bagasangira bagasabana, Marina akereka Yvan Muziki inshuti ze ndetse nawe akabona inshuti z’uwo bitegura kurushinga.

Muri ibi birori Yvan Muziki yashimiye abitabiriye ibirori byabo, ahamya ko we na Marina bamaze imyaka itandatu mu rugendo rw’urukundo rwaranzwe n’ibibazo, icyakora bakabitsinda uyu munsi bakaba bariyemeje kurushinga.

Ati “Uyu muntu yambereye imfura ambera inshuti nziza, sinzi ikintu nakubwira uretse kukubwira ko wambereye umugisha. Burya inshuti yawe ntabwo iguta ikurwanaho kugeza igihe yizereye ko igufite.”

Uyu muhanzi yahishuye ko itariki 14 Gashyantare 2026 yamwambikiyeho impeta ifite igisobanuro kidasanzwe kuri bo kuko ari wo munsi bakundaniyeho mu myaka itandatu ishize.

Marina we mu ijambo rye yagize ati “Reka mbabwize ukuri, njye byarandenze, ntabwo nigeze ntekereza ko uyu munsi wagera ndi kumwe n’inshuti zanjye n’inshuti ze turi kwishimira urukundo […] umugabo wanjye ndamukunda cyane yambereye inshuti nziza mu buryo ntabasha gusobanura kandi ndamukunda, ibintu tutacanyemo mu myaka itandatu ndizera ko nta bihari kuko ikizami twaragitsinze.”

Mu Kiganiro na IGIHE, Yvan Muziki na Marina bahamije ko bari mu myiteguro y’ubukwe icyakora bagira ibanga itariki n’ukwezi bazabukorera, gusa bahamya ko ari muri uyu mwaka.

Mu ijoro ryo ku wa 13-14 Gashyantare 2026 mu gitaramo cyo kumurika album ya mbere ya Yvan Muziki, yaratunguranye yambika impeta y’urukundo Marina amusaba ko yazamubera umugore ndetse biyemeza kurushinga.

Ubwo Marina na Yvan Muziki bageraga ahabereye ibi birori

Ukinjira ahabereye ibi birori wahitaga umenya ibyo ugiyemo

Marina yafatanye ifoto y'urwibutso n'inshuti ze zitabiriye ibi birori

Bari batumiye umuhanga mu gucuranga Saxophone wasusurukije ibirori byabo

Ange Bae ni umwe mu nshuti za Marina zari zitabiriye ibi birori

Marina na Yvan Muziki bongeye guhamiriza inshuti zabo urukundo rwabo

Byari ibyishimo ku bitabiriye ibi birori

Shizzo aganira na Safi Eric usanzwe areberera inyungu za Marina

Ni ibirori byitabiriwe n'inshuti zabo nke cyane

Byari ibyishimo ku nshuti za Marina na Yvan Muziki zari zitabiriye ibi birori

Yvan Muziki na Marina bakatana cake

Wari umugoroba wo gusangira

Marina na Yvan Muziki bahishuye ko bamaze imyaka itandatu bakundana

Hari hateguwe aho gufatira agafoto no gusiga umukono w'uko uri mu nshuti zabo zitabiriye ibi birori

Amafoto: Ntirenganya Elie