Marina, Jay C, Juno, Cyusa, Diplomate mu bakoze mu nganzo…indirimbo nshya za weekend

00:00:00 IGIHE NETWORK

KINYARWANDA

ENGLISH

FRANCAIS

Marina, Jay C, Juno, Cyusa, Diplomate mu bakoze mu nganzo…indirimbo nshya za weekend

Yanditswe na Uwiduhaye Theos

Kuya 6 December 2025 saa 05:16

Yasuwe :

Yavuzweho:

Nk’uko bisanzwe bigenda mu mpera za buri Cyumweru, IGIHE ibagezaho urutonde rw’indirimbo nshya z’abahanzi barimo abamaze kugera ku rwego rukomeye n’abakizamuka.

Kuri iyi nshuro abahanzi bakoze mu nganzo bagatanga ibihangano bishya barimo Zuba Ray, Cyusa Ibrahim, Giramata, Bwiza, Marina n’abandi batandukanye.

“Golo” - Mr. Kagame

Ni indirimbo nshya y’umuhanzi Mr. Kagame. Muri iyi ndirimbo uyu musore aba agaragaza ukuntu urukundo rubabaza, iyo umuntu arurimo ariko mugenzi amucengacenga.

“Boda Boda” - Bwiza

Ni indirimbo nshya y’umuhanzi ya Bwiza. Aba agaragaza ukuntu hari igihe mu rukundo nta mafaranga abakundana baba bafite ariko bagakomeza kubana mu mahoro nta kibazo bafitanye.

“Hot’’ - Utah Nice

Ni indirimbo nshya y’umuhanzi Utah Nice uri mu bakobwa bari kuzamuka neza. Utah Nice ubusanzwe avuka mu muryango w’ibyamamare, cyane ko avukana na Cedric Dric wubatse izina mu gutunganya amashusho y’indirimbo z’abahanzi bakomeye mu Rwanda no hanze ndetse na Isimbi Nailla nawe ukora amashusho y’indirimbo.

“Ese warikiniraga (Remix)” - Zuba Ray

Ni indirimbo nshya yasubiwemo n’umuhanzi Zuba Ray. Ubusanzwe ni iya King James ndetse ni n’imwe mu ze zakunzwe. Uyu muhanzi aba agaragaza ukuntu umuntu ashobora kwereka undi ko amukunda ariko ameze nk’uri mu mikino.

“Nzakagendana” - Javanix ft Theo BoseBabireba

Ni indirimbo nshya y’umuhanzi Javanix yasubiranyemo na Theo Bosebabireba. Iri kuri album nshya ye yise “Way to Shine”. Muri iyi ndirimbo aba bahanzi baba baririmba bagaragaza ko Imana ari yo ya mbere, ikwiriye kwishimirwa kubera imirimo myinshi ikora.

“Naganze” - Rata Jah Naychah

Ni indirimbo nshya ya Rata Jah Naychah. Aba agaragaza ukuntu Imana ikwiye kuganza mu buzima bwa buri munsi. Uyu muhanzi ni umwe mu bamaze kubaka izina mu muziki wo kuramya Imana cyane mu njyana ya Dancehall.

“Inyange” - Diplomate ft. Logic Hit

Ni indirimbo nshya y’umuhanzi Diplomate yahuriyemo na Logic Hit usanzwe atunganya indirimbo. Muri iyi ndirimbo aba bahanzi baba bagaragaza ukuntu u Rwanda rukwiriye kwaguka.

“Narahiriwe” - Emelyne Penzi

Ni indirimbo nshya y’umuhanzikazi Emelyne Penzi uri mu bakobwa bari kuzamuka muri iki gihe. Aba agaruka ku rukundo rw’Imana, akagaragaza ko Imana ari yo murengezi. Uyu muhanzi yatangiye umuziki mu 2021 ariko abikora nk’umwuga mu 2024.

“Mariza” - Juno Kizigenza ft. Ruti Joel

Ni indirimbo nshya yahuriyemo abahanzi Juno Kizigenza na Ruti Joel. Muri iyi ndirimbo baba bagaragaza ukuntu umuntu ashobora gukunda undi, kugeza igihe yumva nta yandi mahitamo afite.

“Yego” - Jay C Ambassador

Ni indirimbo nshya y’umuraperi Jay C Ambassador. Aba agaragaza ukuntu umuntu abaho mu buzima bwo gushakisha ndetse akirinda abantu bamusubiza inyuma.

“Intebe Yawe” - Fabrice Munyaneza

Umuhanzi w’indirimbo zo kuramya no guhimbaza Imana Fabrice Munyaneza yashyize hanze amashusho y’indirimbo nshya yise “Intebe yawe"

Munyaneza yatangaje ko iyi ndirimbo yashyize hanze iri kuri Album ye iri gutegurwa yitwa “Ni muzima ", ndetse ikaba ibaye indirimbo ya gatanu amaze gushyira hanze kuva atangiye kuririmba ku giti cye.

“Byaratunaniye” - Mulix

Ni indirimbo y’umuhanzi Mulix. Aba agaragaza ukuntu hari abantu bakundana bahora bashwana ariko byarabananiye gutandukana burundu.

"Ambwira Ko" - Fiston Iradukunda

Fiston Iradukunda yashyize hanze indirimbo nshya y’amashusho yise "Ambwira Ko", ikaba ije isanga “Ibanga” imaze amezi icyenda isohotse. "Ibanga" ifite amateka akomeye ku muryango we, kuko yanditswe kera ataravuka. Ayisobanura nk’indirimbo y’umwihariko yakundwaga cyane na se witabye Imana.

Uyu muramyi ubusanzwe witwa Consolateur Iradukunda ariko ukoresha mu muziki izina rya Fiston Iradukunda, ni umwe mu bahanzi baririmba indirimbo zo kuramya no guhimbaza, batamaze igihe kinini binjiye mu ruhando rw’umuziki.

“Intashyo” - Chacha Imfurikeye ft Fox Makare

Umuhanzi Chacha Infurikeye uri mu bakobwa bari kuzamuka neza yashyize hanze indirimbo nshya. Muri iyi ndirimbo yahuriyemo n’umuraperi Fox Makare baba baririmba bagaragaza ukuntu urukundo ari rwo rwa mbere.

“True Love” - Lydia Jazmine ft. Bwiza

Aba bahanzi uko ari babiri baba baririmba bagaragaza ukuntu urukundo nyakuri kurubona muri iki gihe bikomeye. Bakerekana ko iyo umuntu agize amahirwe akarubona aba ari imbonekarimwe.

“Sinibagiwe” - Giramata ft Niyo Bosco

Ni indirimbo nshya y’umuhanzikazi Giramata yahuriyemo na Niyo Bosco. Baba bagaragaza ukuntu ijambo ryavuzwe n’Imana n’iyo ryatinda ritajya rihera mu buzima.

Cyusa yashyize hanze album…

Umuhanzi Cyusa Ibrahim uzwi mu muziki gakondo, yashyize hanze album ye ya kabiri yise ‘Muvumwamata’ igizwe n’indirimbo 14, avuga ko yayituye nyirakuru wagiye amuba hafi kuva mu bwana bwe ndetse akanamwigisha zimwe mu ndirimbo za kera.

Yabigarutseho mu kiganiro yagiranye na IGIHE, ubwo yamaraga gushyira hanze iyi album. Ati “Iyi album Muvumwamata nayituye nyogokuru wanjye. Ni we wampaye ubuhanzi, ni we watumye menya kuririmba. Impamvu namuhaye igisigo cya Muvumwamata bivuga muragwamugisha, ni nk’igisigo namuhaye cyo kumushimira.”

Abajijwe ubutumwa buri kuri album ye nshya, yavuze ko butandukanye kuko yashakaga gukora ku nguni zose z’abakunzi be no ku mitima y’abakunzi b’umuziki muri rusange.