Abahanzi nyarwanda, Knowless Butera na Urban Boyz baje ku rutonde rw’abahanzi 10 ba mbere bigaruriye umuziki wa Afurika y’Uburasirazuba mu mwaka wa 2014 nk’uko byagaragajwe n’impuguke mu muziki mu Karere.

Uru rutonde rw’abahanzi 10 bigaragaje cyane muri Afurika y’Uburasirazuba, rwakozwe n’impuguke zitandukanye mu Karere u Rwanda ruherereyemo, hifashishijwe abanyamakuru, abahanga mu muziki n’abahagarariye ibigo bitanga ibihembo bya muzika.

Urutonde rumaze gukorwa, rwasomewe kuri Radiyo ikomeye East African Radio ivugira kuri 88.1 FM mu Mujyi wa Dar Es Salaam.

Kuri uru rutonde ruyobowe na Diamond Platinumz, rwabonetseho abahanzi bo mu Rwanda babiri, Knowless uri ku mwanya wa gatanu na Urban Boyz iri ku mwanya wa cyenda.

Knowless wo muri Kina Music ari imbere y’abahanzi bakomeye mu Karere barimo Jaguar, Jose Chameleone na Radio&Weasel hanyuma ku mwanya wa cyenda hakaza Urban Boyz naho ku wa cumi hagaheruka Sat B w’i Burundi.

Knowless Butera na Urban Boyz baje kuri uru rutonde mu gihe banahatanye mu cyiciro kimwe n’ibyamamare mu muziki muri Afurika y’Uburasirazuba mu bihembo bya HiPipo Music Awards bizatangirwa muri Uganda muri Gashyantare 2015.

Muri HiPipo Music Awards Knowless Butera na Urban Boyz bo mu Rwanda bahanganye na Diamond(Tanzania), Jaguar(Kenya), Eddy Kenzo(Uganda), Sauti Sol(Kenya), Bebe Cool(Uganda), na Ommy Dimpoz(Tanzania).

Urutonde rw’abahanzi bigaragaje cyane muri Afurika y’Uburasirazuba muri 2014:

1.Diamond Platnumz(Tanzania)
2.Eddy Kenzo(Uganda)
3.Sauti Sol(Kenya)
4.Bebe Cool(Uganda)
5.Knowles Butera(Rwanda)
6.Jaguar(Kenya)
7.Jose Chameleone(Uganda)
8.Radio na Weasel(Uganda)
9.Urban Boyz(Rwanda)
10.Sat B(Burundi)

[email protected]