00:00:00 IGIHE NETWORK KN KINYARWANDA EN ENGLISH FR FRANCAIS

King James yamuritse urubuga rugiye gufasha abahanzi Nyarwanda

Yanditswe na Uwiduhaye Theos
Kuya 2 Ukuboza 2021 saa 11:15
Yasuwe :

Ruhumuriza James wamamaye mu muziki nka King James yamuritse urubuga rushya rugiye kujya rwifashishwa n’abahanzi bakora ibihangano bitandukanye mu kugurisha ibyo bakora.

Uru rubuga ruzajya rwifashishwa n’abakora filime, indirimbo, imideli n’ibindi bijyanye n’imyidagaduro.

Ni urubuga yise Zana Talent, yarumuritse yifashishije album ye nshya yise ‘Ubushobozi’.

Mu kiganiro yagiranye n’itangazamakuru kuri uyu wa Gatatu tariki 1 Ukuboza 2021 yagize ati “ Mu minsi yashize nari nabaye nk’ubikomozaho ku bijyanye n’uburyo album izasohokamo. Izasohokera ku rubuga rwa Zanatalent.com.”

“Album izasohoka ku wa 12 Ukuboza 2021. Icyo twashyizeho ni uko umuntu azayumvira hariya ku rubuga ndetse n’uwamaze kuyigura akaba azabasha kuyumva mu gihe nta internet afite.”

Yavuze ko igitekerezo cyo gutangiza uru rubuga cyaje nyuma y’igihe kinini yari amaze asabwa n’abantu batandukanye ubufasha.

Ati “Byatangiye mu gihe abantu bajyaga bansaba kubafasha hari n’abansanga ku Ruyenzi mu rugo bashaka ko mbafasha. Ni aho hahise hava igitekerezo cya Zana Talent.”

“Nashakaga ko kiba ikintu umuntu azajya aza gusura akeneye impano nshya. Ikindi ku bahanzi basanzwe bazwi mu ngeri zitandukanye muri ibi bihe bya COVID-19 twabonye kugira ngo umuntu agurishe ibihangano bye byari bigoranye, tuzana urubuga abantu bagurishirizaho ibihangano byabo mu buryo buboroheye.”

Uyu muhanzi kuri ubu ari gukorana n’abafite label zifasha abahanzi kugira ngo ibihangano by’abo bafasha bibe byashyirwa kuri uru rubuga.

Buri muhanzi azajya ashyiraho igiciro cy’igihangano cye nyuma aze gutangaho amafaranga make bitewe n’uko uru rubuga ruzasaba gukomeza kubaho.

Ati “Ijanisha rizajya ryishyurwa ni iryo kugira ngo urubuga rukore . Rizaba riri ku kigero gito.”

King James yashyize kuri uru rubuga rwe album ye ya karindwi yise ‘Ubushobozi’ ndetse niho ateganya kuyigurishiriza.

Album nshya ya King James iriho indirimbo 17 zirimo ‘Ejo’, ‘Ubanguke’, ‘Ndagukumbuye’ ye na Ariel Wayz, ‘Ubushobozi’, ‘Ubudahwema’, ‘Habe namba’, ‘Uhari Udahari’ , ‘Uyu Mutima’, ‘Nyabugogo’, ‘Reka gukurura, ‘Kimbagira’, ‘Nyishyura Nishyure, ‘Ikiniga, ‘Nzakuguma Iruhande’, ‘Pinene yahuriyemo na Bulldogg, ‘Hinduka’ na Inshuti Magara yakoranye na Israel Mbonyi.

Izina ‘Ubushobozi’ yarihisemo kubera ubushobozi urukundo rushobora kugira mu mibereho y’abantu cyane hagati y’umubyeyi n’umwana we.

Reba indirimbo King James aheruka gushyira hanze

King James yamuritse urubuga rugamije gufasha abahanzi mu ngeri zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .